ລິ້ງ ສຳຫລັບເຂົ້າຫາ

ວັນສຸກ, ໑໙ ເມສາ ໒໐໒໔

ຊາວອັຟການິສຖານປະທ້ວງ ການສັງຫານ ທ່ານຣາບານີ


ຜູ້ສະໜັບສະໜຸນອະດີດປະທານາທິບໍດີອັຟການິສຖານ ທ່ານ Burhanuddin Rabbani, ຖືຮູບພາບທ່ານ ຢູ່ນອກບ້ານພັກ
ຂອງທ່ານ ນຶ່ງມື້ຫລັງຈາກທ່ານຖືກລອບສັງຫານໃນກຸງຄາບູລ.
ວັນທີ 21 ກັນຍາ 2011.
ຜູ້ສະໜັບສະໜຸນອະດີດປະທານາທິບໍດີອັຟການິສຖານ ທ່ານ Burhanuddin Rabbani, ຖືຮູບພາບທ່ານ ຢູ່ນອກບ້ານພັກ ຂອງທ່ານ ນຶ່ງມື້ຫລັງຈາກທ່ານຖືກລອບສັງຫານໃນກຸງຄາບູລ. ວັນທີ 21 ກັນຍາ 2011.

ປະຊາຊົນ​ອັຟກາ​ນິສຖານ​ຫລາຍ​ຮ້ອຍ​ຄົນ​ພາກັນ​ໂຮ​ມຊຸມນຸມ​ກັນ​ໃນ​ວັນ​ພຸດ​ມື້​ນີ້​ເພື່ອ​ທໍາ​ການ​ປະ​ທ້ວງ​ຕໍ່​ການ​ສັງຫານ​ທ່ານ Burhanuddin Rabbani ອະດີດ​ປະທານາທິບໍດີ​ ແລະ​ຜູ້​ເຈລະຈາ​ສັນຕິພາບ​ອັຟການິສຖານ​ ຢູ່​ທີ່​ບ້ານ​ພັກ​ຂອງ​ທ່ານໃນ​ນະຄອນຫລວງ​ຄາ​ບູລນັ້ນ.

ຕໍາຫລວດ​ກ່າວ​ວ່າ ທ່ານ Rabbani ທີ່​ເຄີຍ​ເປັນ​ປະທານາທິບໍດີ​ນັບ​ແຕ່ປີ 1992 ຫາ​ປີ 1996 ​ໄດ້​ຖືກ​ສັງຫານ​ໃນ​ວັນ​ອັງຄານ​ວານ​ນີ້​ ໂດຍ​ຜູ້ວາງລະ​ເບີດ​ສະລະ​ຊີບ​ຕາ​ລີ​ບັນ ທີ່​ໄດ້​ບີບກະນວນ​ລະ​ເບີດ ​ທີ່​ເຊື່ອງ​ໄວ້​ໃນ​ຜ້າ​ປົກ​ຫົວ​ຂອງ​ຜູ້ກ່ຽວ.

ຢ່າງ​ໜ້ອຍ​ປະຊາຊົນ​ອີກ 4 ຄົນ​ໄດ້​ເສຍ​ຊີວິດ​ໃນ​ການໂຈມຕີດ້ວຍລະ​ເບີດ​ດັ່ງກ່າວ​ແລະ​ທ່ານ Masoom Staneksai ຊຶ່ງ​ເປັນ​ນຶ່ງ​ໃນ​ບັນດາ​ທີ່ປຶກສາ​ຄົນສໍາຄັນ​ຂອງ​ປະທານາທິບໍດີ Hamid Karzai ​ໄດ້​ຮັບ​ບາດ​ເຈັບ.

ໃນ​ວັນ​ພຸດ​ມື້​ນີ້ ພວກ​ຝູງ​ຄົນ​ທີ່​ໄວ້ອາ​ໄລ​ນໍາ​ທ່ານ Rabbani ນັ້ນ​ພາກັນ​ຖື​ຮູບ​ພາບ​ທ່ານ Rabbani ​ແລະຖື​ປ້າຍ​ຄໍາ​ຂວັນ​ຕ່າງໆ​ພາກັນ​ເຕົ້າໂຮມ​ກັນ​ຢູ່​ຖະໜົນ​ສາຍ​ນຶ່ງ​ນອກ​ບ້ານ​ພັກ​ຂອງ​ທ່ານ ​ເພື່ອ​ທໍາ​ການ​ປະ​ທ້ວງ​ຕໍ່​ການ​ສັງຫານ​ທ່ານ​ນັ້ນ.

ບັນດາ​ເຈົ້າ​ໜ້າ​ທີ່​ອົງການ​ເນ​ໂຕ້ໄດ້​ຖິ້ມ​ໂທດ​ໃສ່​ຜູ້​ວາງ​ລະ​ເບີດ​ສະລະ​ຊີບ 2 ຄົນ​ສໍາລັບ​ການ​ໂຈມ​ຕີ​ຄັ້ງ​ນີ້ ​ໂດຍ​ກ່າວ​ວ່າ ພວກ​ວາງ​ລະ​ເບີດ​ເຫລົ່າ​ນີ້​ແກ້ງ​ວ່າ​ມີ​ຄວາມ​ປາດ​ຖະໜາ​ທີ່ຢາກທໍາ​ການ​ໂອ້​ລົມເຈລະຈາສ້າງ​ຄວາມ​ປອງ​ດອງ​ກັນ. ໂຄສົກ​ກຸ່ມ​ຕາ​ລີ​ບັນ ​ອ້າງ​ເອົາ​ຄວາມ​ຮັບຜິດຊອບ​ການໂຈມ​ຕີ​ດັ່ງກ່າວ​ໂດຍ​ກ່າວ​ຕໍ່​ອົງການ​ຂ່າວ Reuters ວ່າ ພວກ​ເຂົາ​ເຈົ້າ​ໄດ້​ແຕ່ງ​ຕັ້ງ​ໃຫ້ນັກ​ຕໍ່ສູ້ 2 ຄົນ​ທີ່​ມີ​ຄວາມ​ສາມາດ​ແລະ​ຊໍານິ​ຊໍານານ​ທີ່ໄດ້​ຮັບ​ການ​ເຝິກ​ແອບ​ຢ່າງ​ດີ​ ທຳ​ການ​ຕິດ​ຕໍ່​ພົວພັນ​ກັບ​ທ່ານ Rabbani ນັ້ນ.

ທ່ານ Rabbani ​ເປັນ​ຊົນ​ເຜົ່າ Tajik ​ແລະ​ເປັນ​ຫົວໜ້າ​ສະພາ​ສັນຕິ ພາບ​ລະດັບ​ສູງ​ຂອງ​ອັຟກາ​ນິສຖານ ຊຶ່ງ​ເປັນ​ທີ​ມງານນຶ່ງ​ຂອງ​ລັດຖະບານ​ທີ່​ມີ​ວັດຖຸ​ປະສົງ​ເພື່ອ​ຊອກ​ຫາ​ທາງ​ແກ້​ໄຂ​ບັນຫາ​ດ້ານ​ການ​ເມືອງ​ ກັບ​ພວກກະບົດ​ນັ້ນ.

ທ່ານ Karzai ​ໄດ້​ປະນາມ​ການ​ລອບ​ສັງຫານ​ດັ່ງກ່າວ​ໃນ​ວັນ​ອັງຄານວານ​ນີ້​ໂດຍ​ກ່າວ​ວ່າ ອະດີດ​ປະທານາທິບໍດີ​ອັຟ ກາ​ນິສຖານ​ທ່ານ​ນີ້​ໄດ້​ສະລະ​ຊີວິດ​ຂອງ​ທ່ານ​ເພື່ອ​ອັຟກາ​ນິສຖານ​ແລະ​ເພື່ອ​ສັນຕິພາບ. ທ່ານKarzai ກ່າວ​ເຊ່ນ​ນີ້​ກ່ອນ​ການ​ພົບ​ປະ​ກັບ​ປະທານາທິບໍດີບາຣັກ​ໂອ​ບາ​ມາ​ແຫ່ງ​ສະຫະລັດ​ທີ່​ນະຄອນ​ນີວຢອກ ນອກ​ກອງ​ປະຊຸມ​ສະມັດຊາ​ໃຫຍ່ສະຫະ​ປະຊາ​ຊາດ​ປະ​ຈໍາປີແຕ່​ໄດ້​ຕັດການ​ຢ້ຽມຢາມ​ຂອງ​ທ່ານ​ໃຫ້ສັ້ນລົງຍ້ອນ​ການ​ໂຈມ​ຕີ​ຄັ້ງ​ນີ້.

XS
SM
MD
LG