ພວກປະຊາຊົນອັຟການິສຖານຫລາຍຮ້ອຍຄົນໄດ້ປະທະກັນກັບພວກຕໍາຫຼວດແລະກໍາລັງຮັກສາຄວາມສະຫງົບ ເປັນມື້ທີສອງຂອງການປະທ້ວງທີ່ເຕັມໄປດ້ວຍຄວາມໂກດແຄ້ນ ທີ່ແນໃສ່ພວກທະຫານກຸ່ມເນໂຕ້ ທີ່ກໍາຈັດສໍາເນົາຄໍາພີ Quran ແບບບໍ່ຖືກຕ້ອງເໝາະສົມນັ້ນ.
ພວກປະທ້ວງຫລາຍຮ້ອຍຄົນພາກັນແກວ່ງກ້ອນຫິນໃສ່ຕໍາຫລວດແລະຮ້ອງໂຮວ່າ ຂໍໃຫ້ອາເມຣິກາຈົ່ງພິນາດ ໃນລະຫວ່າງການເດີນຂະບວນປະທ້ວງໃນວັນພຸດມື້ນີ້ຢູ່ນອກກຸງຄາບູລ ໃນຂະນະດຽວກັນກໍມີການເດີນຂະບວນປະທ້ວງຢູ່ໃນແຫ່ງນຶ່ງອີກໃນນະຄອນຫລວງກຸງຄາບູລນັ້ນ.
ປະຊາຊົນຢ່າງໜ້ອຍ 10 ຄົນເສຍຊີວິດເວລາພວກກໍາລັງຮັກສາຄວາມສະຫງົບຍິງປືນໃສ່ພວກປະທ້ວງໃນຄວາມພະຍາຍາມເພື່ອຂັບໄລ່ໃຫ້ພວກເຂົາເຈົ້າແຕກໜີໄປນັ້ນ.
ສະຖານທູດສະຫະລັດປະກາດໃຫ້ຮູ້ວ່າ ຕົນໄດ້ສັ່ງໃຫ້ພວກເຈົ້າໜ້າທີ່ສະຖານທູດບໍ່ໃຫ້ອອກໄປໃສແລະງົດການເດີນທາງອອກນອກທຸກຢ່າງ.
ມີລາຍງານວ່າ ມີການປະທ້ວງເກີດຂຶ້ນໃນແຫ່ງອື່ນໆໃນຫລາຍພາກສ່ວນຂອງປະເທດເຊ່ນກັນ ຮວມທັງເມືອງ Jalalabad ໃນພາກຕາເວັນອອກຂອງປະເທດ ບ່ອນທີ່ລາຍງານເວົ້າວ່າ ພວກຝູງຊົນພາກັນອັດຖະໜົນຫລວງໃຫຍ່ສາຍນຶ່ງໄວ້.
ຜູ້ບັນຊາການກໍາລັງທັບນາໆຊາດ ຄືນາຍພົນ John Allen ຂອງສະຫະລັດ ໃນວັນອັງຄານວານນີ້ ໄດ້ອອກຄໍາຂໍອະໄພໂທດສະບັບນຶ່ງ ແລະໄດ້ສັ່ງໃຫ້ທໍາການສືບສວນກ່ຽວກັບລາຍງາຍດັ່ງກ່າວທີ່ວ່າ ພວກກໍາລັງປະສົມໄດ້ກໍາຈັດປຶ້ມອ່ານກ່ຽວກັບສາສະໜາອິສລາມຮວມທັງປຶ້ມພະຄໍາພີ Quran ຈໍານວນຫລວງຫລາຍຖິ້ມ ຢ່າງບໍ່ຖືກຕ້ອງເໝາະສົມນັ້ນ.
ເຫດການຕ່າງໆກ່ຽວກັບຂໍ້ກ່າວຫາທີ່ວ່າມີການຢຽບຍໍ່າທາງສາສະໜານີ້ຍັງບໍ່ເປັນທີ່ຈະແຈ້ງເທື່ອ. ລາຍງານຂ່າວທີ່ຍັງບໍ່ທັນໄດ້ຮັບການຢືນຢັນກ່າວວ່າ ພວກທະຫານກຸ່ມເນໂຕ້ ທີ່ປະຈໍາການຢູ່ໃນຖານທັບອາກາດ Bagram ຢູ່ນອກກຸງຄາບູລ ໄດ້ພະຍາຍາມກໍາຈັດປຶ້ມຄໍາພີ Quran ຈໍານວນຫລວງຫລາຍຖິ້ມໂດຍການເອົາໄຟຈູດຖິ້ມ ແຕ່ພວກເຈົ້າໜ້າທີ່ອັຟການິສຖານ ໄດ້ຢຸດເຂົາເຈົ້າໄວ້.
