ລິ້ງ ສຳຫລັບເຂົ້າຫາ

ການໂຈມຕີຂະບວນລົດເນໂຕ້ ໃນອາຟະການິດສະຖານ

  • ໄພສານ ວໍຣະຈັກ

ເຈົ້າໜ້າທີ່ສືບສວນ ຂອງ ອັບການິດສະຖານ ແລະຕ່າງປະເທດ ພວມກວດເບິ່ງ ບໍລິເວນ ທີ່ມີການໂຈມຕີ ສະລະຊີບ ໃນນະຄອນກາບູລ (18 ພຶດສະພາ 2010)

ເຈົ້າໜ້າທີ່ອາຟະການິດສະຖານ ກ່າວວ່າ ຜູ້ໂຈມຕີສະລະຊີບ ຄົນນຶ່ງ ໄດ້ໃຊ້ລົດ ທີ່ບັນຈຸລະເບີດ ແລ່ນເຂົ້າຕຳ ຂະບວນລົດ ຂອງອົງການເນໂຕ້ ທີ່ນະຄອນຫຼວງກາບູລ ໃນວັນອັງຄານມື້ນີ້ ເຮັດໃຫ້ມີຜູ້ເສຍຊີວິດ ຢ່າງນ້ອຍ 17 ຄົນ ຮວມທັງທະຫານ ຕ່າງປະເທດ ຈຳນວນນຶ່ງ.

ກອງກຳລັງ ໃຫ້ຄວາມຊ່ອຍເຫລືອນາໆຊາດ ໃນການຮັກສາ ຄວາມສະຫງົບ ຂອງອົງການເນໂຕ້ ກ່າວໃນຖະແຫຼງຂ່າວ ສະບັບນຶ່ງວ່າ ມີກຳລັງທະຫານນາໆຊາດ 6 ຄົນເສຍຊີວິດ ແລະອີກຫລາຍໆຄົນ ໄດ້ຮັບບາດເຈັບ ໃນການໂຈມຕີ ທີ່ນະຄອນຫຼວງກາບູລ. ໂຄສົກຄົນນຶ່ງ ຂອງກຳລັງນາໆຊາດ ໄດ້ປະນາມການ ໂຈມຕີຕໍ່ພົນລະເຮືອນ ແລະກຳລັງຮັກສາ ຄວາມສະຫງົບ ຂອງນາໆຊາດ ໃນຄັ້ງນີ້ ແລະວ່າ ມັນຈະບໍ່ສາມາດ ສະກັດກັ້ນ ການປະຕິບັດ ພາລະກິດ ຂອງກຳລັງ ນາໆຊາດໄດ້.

ກຸ່ມກະບົດ ທາລີບານ ໄດ້ອ້າງເອົາ ຄວາມຮັບຜິດຊອບ ໃນການໂຈມຕີ ສະລະຊີບທີ່ວ່ານີ້. ຫົວໜ້າສືບສວນ ຄະດີອາຍາ ຂອງ ອາຟະການິດສະຖານ ກ່າວວ່າ ເຫດຮ້າຍໃນມື້ນີ້ ເກີດຂຶ້ນ ໃກ້ໆບໍລິເວນ ໂຮງການລັດຖະບານ ອັບການິດສະຖານ.

ອົງການນາໂຕ້ ກ່າວວ່າ ຕົນກຳລັງ ດຳເນີນງານ ຮ່ວມກັບຕຳຫຼວດ ອາຟະການິດສະຖານ ເພື່ອຮັກສາ ຄວາມປອດໄພ ໃນບໍລິເວນ ທີ່ເກີດເຫດ ແລະທຳການສືບສວນ ກ່ຽວກັບ ເຫດຮ້າຍ ດັ່ງກ່າວ.

ເຫດລະເບີດ ໃນມື້ນີ້ ມີຂຶ້ນນຶ່ງມື້ ຫລັງຈາກ ຜູ້ບັນຊາການ ກຳລັງເນໂຕ້ ໃນຢູໂຣບ ພົນເຮືອເອກ JAMES STAVRIDIS ກ່າວວ່າ ອາດມີຄວາມຕ້ອງການ ຄູຝຶກນາໆຊາດ ຕື່ມອີກຫລາຍຮ້ອຍຄົນ ເພື່ອເສີມຂະຫຍາຍ ກຳລັງຮັກສາ ຄວາມສະຫງົບ ຂອງອາຟະການິດ ສະຖານ ພາຍໃນຕົ້ນປີໜ້າ.

XS
SM
MD
LG