ທະນາຍຄວາມພົນລະເຮືອນ ຂອງທະຫານອາເມຣິກັນ ທີ່ຖືກກ່າວຫາວ່າຍິງສັງຫານແບບບໍ່
ເລືອກໜ້າຢູ່ໃນອັຟການິສຖານກ່າວວ່າລູກຄວາມຂອງລາວເບິ່ງຊົງວ່າເກີດຄວາມຕຶງຄຽດຢ່າງ
ໜັກຫຼັງຈາກໄດ້ເຫັນໝູ່ເພື່ອນຂອງລາວຄົນນຶ່ງບາດເຈັບສາຫັດ.
ທະນາຍຄວາມ John Henry Browne ເວົ້າວ່າ ສິບເອກອາຍຸ 38 ປີຄົນນີ້ ໄດ້ເຫັນຂາ
ໝູ່ຂອງລາວຄົນນຶ່ງຖືກລະເບີດຂາດອອກນຶ່ງມື້ກ່ອນທີ່ຈະມີການສັງຫານໝູ່ພົນລະເຮືອນຊາວ
ອັຟການິສຖານ 16 ຄົນ ທີ່ແຂວງການດາຮາ.
ທ່ານ Browne ກ່າວຕື່ມວ່າ ລູກຄວາມຂອງລາວຍັງຮູ້ສຶກມີຄວາມບໍ່ພໍໃຈ ກ່ຽວກັບການຖືກ
ສົ່ງໄປປະຕິບັດງານສູ້ລົບ ເປັນເທື່ອທີ 4. ທະຫານຄົນນີ້ ເຄີຍໄປປະຕິບັດໜ້າທີ່ມາແລ້ວ 3
ເທື່ອໃນອີຣັກ ບ່ອນທີ່ລາວໄດ້ຮັບບາດເຈັບ ຢູ່ທີ່ຫົວ ແລະສູນເສຍຕີນຂອງລາວໄປສ່ວນນຶ່ງ.
ທະນາຍຄວາມເວົ້າວ່າມີການແຈ້ງໃຫ້ທະຫານຄົນນີ້ຊາບວ່າລາວຈະບໍ່ຖືກສົ່ງໄປປະຕິບັດງານ
ຢູ່ອັຟການິສຖານແຕ່ນັ້ນໄດ້ມີການປ່ຽນແປງ ທີ່ຈິງແລ້ວພາຍໃນເວລາຂ້າມຄືນ.
ທະຫານອາເມຣິກັນຊຶ່ງຍັງບໍ່ທັນມີການແຈ້ງຊື່ໃຫ້ຊາບຫຼືການຕັ້ງຂໍ້ຫາເທື່ອນັ້ນໄດ້ຖືກສົ່ງໂດຍ
ທາງເຮືອບິນຈາກອັຟການິສຖານ ໄປຍັງຄູເວດໃນມື້ວັນພຸດຜ່ານມາ. ພົນໂທ Curtis Sca-
parotti ຮອງຜູ້ບັນຊາການກຳລັງສະຫະລັດໃນອັຟການິສຖານກ່າວວ່າ ຜູ້ຕ້ອງສົງໄສໄດ້ຖືກ
ຍ້າຍເພື່ອເປັນການຄໍ້າປະກັນທັງການຄຸມຂັງທີ່ຖືກຕ້ອງເໝາະສົມກ່ອນການດຳເນີນຄະດີແລະ
ໃຫ້ມີໂອກາດໄດ້ຮັບການບໍລິການທາງດ້ານກົດໝາຍຕ່າງໆ.
ລັດຖະມົນຕີກະຊວງປ້ອງກັນປະເທດສະຫະລັດທ່ານ Leon Panetta ໄດ້ເດີນທາງໄປຢ້ຽມ
ຢາມອັຟການິສຖານໃນເດືອນນີ້ແລະການສັງຫານທີ່ມີການກ່າວຫາວ່າ ກະທຳໂດຍທະຫານ
ອາເມຣິກັນນັ້ນ ໄດ້ເປັນຈຸດເພັ່ງເລັງໃນການເຈລະຈາຫາລືກັບພວກເຈົ້າໜ້າທີ່ອັຟການິສຖານ.
ປະທານາທິບໍດີອັຟການິສຖານ ທ່ານຮາມິດ ກາໄຊ ຮຽກຮ້ອງໃຫ້ຖອນກຳລັງອົງການເນໂຕ້
ອອກຈາກໝູ່ບ້ານຕ່າງໆແລະກັບຄືນເຂົ້າໄປຢູ່ທີ່ຄ້າຍຂອງພວກເຂົາເຈົ້າລຸນຫຼັງທີ່ໄດ້ເກີດເຫດ
ຮ້າຍຄັ້ງນີ້.
ນອກນັ້ນທ່ານກາໄຊຍັງແຈ້ງໃຫ້ທ່ານ Panetta ຊາບວ່າຕ້ອງໄດ້ມີການດຳເນີນການທຸກສິ່ງ
ຢ່າງເພື່ອປ້ອງກັນບໍ່ໃຫ້ເຫດຮ້າຍ ເຊັ່ນການຍິງສັງຫານໃນຄັ້ງນີ້ເກີດຂຶ້ນຊໍ້າອີກໃນອະນາຄົດ.
ລັດຖະມົນຕີກະຊວງປ້ອງກັນປະເທດສະຫະລັດກ່າວວ່າ ທ່ານໄດ້ໃຫ້ຄຳໝັ້ນສັນຍາຕໍ່ປະທາ
ນາທິບໍດີອັຟການິສຖານວ່າມືປືນຄົນນີ້ຈະຖືກລົງໂທດຕາມກົດໝາຍ.
ໃນວັນສຸກມື້ນີ້ ເຈົ້າໜ້າທີ່ທະຫານສະຫະລັດກ່າວວ່າ ຜູ້ບັນຊາການສູງສຸດຂອງກຳລັງສະຫະ
ລັດໃນອັຟການິສຖານ ແມ່ນຢູ່ໃນເສັ້ນທາງຂອງການໂຈມຕີ ທີ່ບັງເອີນມີຂຶ້ນ ພ້ອມໆກັນກັບ
ການເດີນທາງໄປເຖິງອັຟການິສຖານ ຂອງທ່ານ Panetta. ພວກເຈົ້າໜ້າທີ່ໃນຂັ້ນຕົ້ນບໍ່ໄດ້
ໃຫ້ຄວາມສຳຄັນໃດໆກ່ຽວກັບເຫດຮ້າຍດັ່ງກ່າວນີ້.