ນາຍພົນ Faizullah Ghyrat ຜູ້ບັງຄັບການຕຳຫຼວດປະຈຳແຂວງ ກ່າວວ່າ ມືລະເບີດສະຫຼະຊີບ ໄດ້ປົດຂະນວນລະເບີດຕົນເອງໃນລົດທີ່ບັນຈຸລະເບີດຫຼາຍລູກ ໃກ້ກັບດ່ານນຶ່ງຢູ່ທາງພາກຕາເວັນອອກສຽງໃຕ້ ຂອງປະເທດ ອັຟການິສຖານ ໃນຕອນແລງຂອງວັນອາທິດວານນີ້, ເຮັດໃຫ້ມີຄົນເສຍຊີວິດຢ່າງໜ້ອຍ 25 ຄົນ, ລວມທັງແມ່ຍິງ ແລະ ເດັກນ້ອຍ.
ເຫດລະເບີດສະຫຼະຊີບໃນແຂວງ Khost ກໍໄດ້ເຮັດໃຫ້ປະຊາຊົນຫຼາຍສິບຄົນບາດເຈັບເຊັ່ນກັນ. ກ່າວກັນວ່າຜູ້ທີ່ໄດ້ຮັບເຄາະຮ້າຍສ່ວນຫຼາຍແມ່ນພົນລະເຮືອນໃນທ້ອງຖິ່ນ. ເຫດການຮຸນແຮງໄດ້ເກີດຂື້ນຢູ່ບໍ່ໄກຈາກຖານທັບຂອງທະຫານ ສະຫະລັດ ໃນແຂວງດັ່ງກ່າວໃນ ອັຟການິສຖານ, ເຊິ່ງເປັນຊາຍແດນຕິດກັບປະເທດ ປາກິສຖານ.
ຂໍ້ມູນກ່ຽວກັບການລະເບີດນີ້ຍັງບໍ່ຊັດເຈນໃນທັນທີ່ທັນໃດເທື່ອວ່າ ພວກຫົວຮຸນແຮງ ຕາລີບານ ແມ່ນຢູ່ເບື້ອງຫຼັງຂອງການໂຈມຕີນີ້ຫຼືບໍ່.ແຕ່ວ່າ ພວກເຂົາເຄີຍໄດອ້າງເອົາຄວາມຮັບຜິດຊອບໃນເຫດການລະເບີດທີ່ຄ້າຍຄືກັນນີ້ມາກ່ອນແລ້ວ.
ໂຄສົກກະຊວງການຕ່າງປະເທດ ປາກິສຖານ ທ່ານ Qazi Khailullah ໄດ້ກ່າວວ່າ ປະເທດຂອງເພິ່ນ ປະນາມ “ຢ່າງຮຸນແຮງ” ຕໍ່ເຫດການລະເບີດລົດ ສະຫຼະຊີບນັ້ນ, ແລະ ກ່າວເພີ່ມເຕີມວ່າ, “ພວກເຮົາຂໍສະແດງຄວາມເສົ້າສະຫຼົດໃຈຕໍ່ຄອບຄົວທີ່ໄດ້ຮັບຄວາມສູນເສຍໃນຄັ້ງນີ້.”
ເຫດການລະເບີດສະຫຼະຊີບໄດ້ເກີດຂຶ້ນພຽງບໍ່ທໍ່ໃດມື້ ຫຼັງຈາກ ຫົວໜ້າອາວຸໂສ ຂອງກຸ່ມ
ຕາລີບານ ໄດ້ພົບປະກັບຕົວແທນຂອງລັດຖະບານຂອງ ອັຟການິສຖານ ໃນປະເທດ
ປາກິສຖານ ທີ່ຢູ່ໃກ້ຄຽງ ເພື່ອປຶກສາຫາລືຫາທາງສິ້ນສຸດການເປັນປໍລະປັກກັນ. ການລິເລີ່ມ
ການເຈລະຈາ ຄັ້ງນີ້ເປັນຄັ້ງທຳອິດທີ່ພວກ ຕາລີບານ ແລະ ເຈົ້າໜ້າທີ່ຂອງ ລັດຖະບານ ໄດ້ມີການພົວພັນໂດຍກົງໃນຮອບ 13 ປີ.
