ເຈົ້າໜ້າທີ່ອັຟການິສຖານກ່າວວ່າ ໄດ້ມີການໂຈມຕີສະລະຊີບຕໍ່ວັດສາສະໜາອິສລາມແຫ່ງນຶ່ງ
ທີ່ເມືອງການດາຮາ ໃນພາກໃຕ້ອັຟການິສຖານເຮັດໃຫ້ມີຜູ້ເສຍຊີວິດ 4 ຄົນໃນລະຫວ່າງພິທີ
ໄວ້ອາໄລໃຫ້ແກ່ມື້ລາງນ້ອງຊາຍຕ່າງບິດາຂອງປະທານາທິບໍດີ Hamid Karzai.
ກະຊວງພາຍໃນອັຟການິສຖານກ່າວວ່າ ການໂຈມຕີໃນວັນພະຫັດມື້ນີ້ໄດ້ສັງຫານຫົວໜ້າສະ
ພາສາສະໜາແຂວງການດາຮາແລະບຸກຄົນອື່ນໆອີກ 3 ຄົນ ເຈົ້າໜ້າທີ່ທ້ອງຖິ່ນເວົ້າວ່ານອກ
ນັ້ນຍັງມີອີກ 13 ຄົນໄດ້ຮັບບາດເຈັບ.
ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ເທື່ອ ຊຶ່ງມີຂຶ້ນນຶ່ງມື້ຫຼັງຈາກ
ປະທານາທິບໍດີ Karzai ນຳພາພວກໄວ້ທຸກ ຫຼາຍພັນຄົນ ເຂົ້າຮ່ວມພິທີສົ່ງສະການໃຫ້ແກ່
ທ່ານ Ahmad Wali Karzai ຜູ້ເປັນນ້ອງຊາຍ ຊຶ່ງເປັນຫົວໜ້າສະພາປະຈຳແຂວງການດາ
ຮາແລະບຸກຄົນທີ່ມີອິດພິພົນຢູ່ໃນພາກໃຕ້ອັຟການິສຖານ.
ທ່ານໄດ້ຖືກຍິງຕາຍໃນວັນອັງຄານຜ່ານມາ ທີ່ເຮືອນຂອງທ່ານໃນເມືອງການດາຮາ ໂດຍອາ ລັກຂາຄົນນຶ່ງທີ່ທ່ານໄວ້ເນື້ອເຊື່ອໃຈ. ມືປືນທີ່ມີຊື່ວ່ານາຍ Sardar Mohammad ກໍໄດ້ຖືກ
ຂ້າຕາຍຫຼັງຈາກນັ້ນ ໂດຍອາລັກຂາຄົນອື່ນໆ.
ພວກກະບົດທາລີບານ ໄດ້ອ້າງເອົາຄວາມຮັບຜິດຊອບ ໃນການລອບສັງຫານທ່ານ Wali
Karzai ແຕ່ພວກເຈົ້າໜ້າທີ່ອັຟການິສຖານກ່າວວ່າ ຍັງບໍ່ທັນເປັນທີ່ຈະແຈ້ງເທື່ອວ່າການ
ສັງຫານທ່ານ Wali Karzai ພົວພັນກັບການກໍ່ກະບົດຫຼືວ່າເປັນເລື່ອງຂອງການຜິດຂ້ອງ
ຕ້ອງຖຽງພາຍໃນ.
