ຜູ້ບັນຊາການ (ຫົວໜ້າເສນາທິການຮ່ວມ) ຂອງກອງທັບ ສະຫະລັດ ພົນເຮືອເອກ MIKE MULLEN ກ່າວວ່າ ທ່ານມີແຜນການ ທີ່ຈະເຮັດໃຫ້ ລັດຖະບານ ອັຟການິສຖານ ໝັ້ນໃຈວ່າ ການປ່ຽນ ຜູ້ບັນຊາການ ກຳລັງສະຫະລັດ ໃນອັຟການິສຖານນັ້ນ ຈະບໍ່ປ່ຽນວິທີ ໃນການເຮັດສົງຄາມ ແຕ່ຢ່າງໃດ.
ພົນເຮືອເອກ MULLEN ເດີນທາງໄປ ອັຟການິສຖານ ເພື່ອພົບປະ ກັບບັນດາ ນາຍທະຫານ ແລະຜູ້ນຳພົນລະເຮືອນ ຫລັງຈາກ ນາຍພົນ STANLEY McCHRYSTAL ໄດ້ລາອອກ. ກ່ອນອອກເດີນທາງນັ້ນ ພົນເຮືອເອກ MULLEN ກ່າວວ່າ ບໍ່ມີຫຍັງປ່ຽນແປງເລີຍ ກ່ຽວກັບຍຸດທະສາດ ຫຼືການປະຕິບັດງານ ຂອງສະຫະລັດ.
ໂຄສົກຂອງ ປະທານາທິບໍດີ ອັຟການິສຖານ ທ່ານ WAHEED OMAR ເອີ້ນການລາອອກ ຂອງນາຍພົນ McCHRYSTAL ວ່າ ບໍ່ເປັນຈັ່ງໂຊກ. ແຕ່ແນວໃດກໍຕາມ ທ່ານໄດ້ກ່າວຊົມເຊີຍ ໃນການເລືອກ ຂອງປະທານາທິບໍດີ ບາຣັກ ໂອບາມາ ເອົາຜູ້ບັນຊາການ ກຳລັງສະຫະລັດ ໃນເຂດພາກກາງ ຂອງໂລກ ນາຍພົນ DAVID PATRAEUS ມາຮັບໜ້າທີ່ ແທນ ນາຍພົນ McCHRYSTAL.
ສ່ວນຢູ່ທີ່ສະຫະລັດ ສະມາຊິກກຸ່ມນຶ່ງ ຈາກທັງສອງ ພັກການເມືອງ ໃນຄະນະກຳມະການ ຄວາມສຳພັນ ຕ່າງປະເທດ ຂອງສະພາສູງ ສະຫະລັດ ຮຽກຮ້ອງໃຫ້ ເປີດຮັບຟັງ ຄຳໃຫ້ການເພີ້ມຕື່ມ ກ່ຽວກັບ ການປະຕິບັດງານ ຂອງສະຫະລັດ ຢູ່ໃນອັຟການິສຖານ. ໃນຈົດໝາຍ ສະບັບນຶ່ງ ມື້ວານນີ້ ສະມາຊິກ ສະພາສູງ ຂອງສະຫະລັດ 7 ທ່ານ ກ່າວວ່າ ຕົນຢາກໄດ້ຍິນ ຄຳຕອບຢ່າງຈະແຈ້ງ ກ່ຽວກັບເປົ້າໝາຍ ໃນການປະຕິບັດງານ ຢູ່ອັຟການິສຖານ ແລະຢາກໄດ້ຍິນ ແຜນການລາຍລະອຽດ ກ່ຽວກັບວ່າ ຈະບັນລຸ ເປົ້າໝາຍເຫຼົ່ານັ້ນ ໄດ້ແບບໃດ.
