ທ່ານ Robert Gates ລັດຖະມຸນຕີປ້ອງກັນປະເທດສະຫະລັດ ໄດ້ຂໍ ຂະມາໂທດ ກ່ຽວກັບການເສຍຊີວິດໂດຍບັງເອີນຂອງພວກເດັກນ້ອຍອັຟການີສຖານ 9 ຄົນຈາກການໂຈມຕີທາງອາກາດຂອງຝ່າຍພັນທະມິດໃນແຂວງ Kunar ໃນພາກຕາເວັນອອກຂອງປະເທດໃນສັບປະດາຜ່ານມາ ໂດຍເອີ້ນເຫດການດັ່ງກ່າວວ່າເປັນໂສກນາຕະກໍາແລະການຖອຍຫລັງກ້າວນຶ່ງສໍາລັບຄວາມສໍາພັນກັບປະຊາຊົນອັຟການີສຖານນັ້ນ.
ໃນລະຫວ່າງກອງປະຊຸມຖະແຫຼງຂ່າວຮ່ວມກັບປະທານາທິ ບໍດີ Hamid Karzai ແຫ່ງອັຟການີສຖານທີ່ກຸງຄາບູລໃນວັນຈັນວານນີ້ທ່ານ Gates ໄດ້ກ່າວເຊ່ນກັນວ່າ ສະຫະລັດຢູ່ແມ່ນຢູ່ໃນທ່າທີທີ່ດີກ່ຽວກັບ ການຈະເລີ້ມຖອນທະຫານຂອງຕົນອອກຈາກອັຟການີສຖານໃນເດືອນກໍລະກົດປີນີ້.
ທ່ານ Gates ໃຫ້ຂໍ້ສັງເກດວ່າ ສະຫະລັດຈະສືບຕໍ່ການມີໜ້າຢູ່ໃນອັຟການີສຖານຕື່ມອີກຫລາຍໆປີ ແຕ່ວ່າ ສະຫະລັດບໍ່ມີຄວາມສົນໃຈທີ່ຈະຕັ້ງຖານທັບຂອງຕົນຢູ່ໃນປະເທດດັ່ງກ່າວຢ່າງເປັນການຖາວອນ ແລະທ່ານກ່າວຕໍ່ໄປວ່າ ທ່ານ Karzai ໃນເວລາອີກບໍ່ດົນກໍຈະປະກາດໃຫ້ຮູ້ກ່ຽວກັບບັນດາຂົງເຂດທໍາອິດທີ່ພວກທະຫານອັຟການີສຖານຈະເຂົ້າກຳຄວາມຜິດຊອບໃນດ້ານຮັກສາຄວາມປອດໄພນັ້ນ.
ທ່ານ Karzai ກ່າວວ່າ ທ່ານໄດ້ຮັບເອົາຄໍາຂໍຂະມາໂທດຂອງທ່ານ Gates ແຕ່ກ່າວຊໍ້າ
ອີກເຖິງການຢືນຢັດຂອງທ່ານທີ່ຢາກເຫັນກໍາລັງຝ່າຍພັນທະມິດລະມັດລະວັງເພີ່ມຂຶ້ນເພື່ອ
ເຮັດໃຫ້ຈໍານວນຜູ້ບາດເຈັບລົ້ມຕາຍຂອງພວກພົນລະເຮືອນນັ້ນບໍ່ໃຫ້ມີຈັກຄົນເລີຍ.
ລັດຖະມຸນຕີປ້ອງກັນປະເທດສະຫະລັດເດີນທາງໄປຮອດອັຟການີສຖານໃນວັນຈັນວານນີ້ ເພື່ອທໍາການຢ້ຽມຢາມເປັນເວລາ 2 ມື້ໃນການຊັ່ງຊາຕີລາຄາເບິ່ງຄວາມຄືບໜ້າຂອງສົງຄາມໃນອັຟການີສຖານນັ້ນ.