ລັດຖະມຸນຕີປ້ອງກັນປະເທດສະຫະລັດ ທ່ານ Robert Gates ເດີນທາງໄປຮອດນະຄອນຫລວງຄາບູລ ຂອງອັຟການີສຖານໃນວັນຈັນມື້ນີ້. ບັນດາເຈົ້າໜ້າທີ່ສະຫະລັດກ່າວວ່າ ທ່ານຈະເພ່ງເລັງໃສ່ການກະກຽມ ສໍາລັບການມອບໂອນຄວາມຮັບຜິດຊອບດ້ານຄວາມປອດໄພໃຫ້ແກ່ກໍາລັງອັຟການີສຖານ ຊຶ່ງກໍານົດຈະເລີ້ມຂຶ້ນໃນເດືອນກໍລະກົດປີນີ້.
ທ່ານ Gates ຈະທໍາການຢ້ຽມຢາມຫລາຍໆເຂດ ບ່ອນທີ່ທາງການກ່າວວ່າ ພວກທະຫານອັຟການີສຖານກໍາລັງມີບົດບາດຫລາຍຂຶ້ນ ໃນການປະຕິບັດງານທາງທະຫານ
ແລະພວກໜ່ວຍຕໍາຫລວດປະຈໍາທ້ອງຖິ່ນທີ່ຈັດຕັ້ງຂຶ້ນມາ
ໃໝ່ນັ້ນ ກໍເລີ້ມຈະສົ່ງຜົນກະທົບແລ້ວ. ນອກນີ້ ທ່ານ
Gates ຍັງຈະໄດ້ພົບປະກັບປະທານາທິບໍດີອັຟການີສ
ຖານ ທ່ານ Hamid Karzai ແລະພວກຜູ້ບັນຊາການ
ຂັ້ນອາວຸໂສ ຂອງສະຫະລັດແລະກຸ່ມ NATO ເຊ່ນກັນ.
ການເດີນທາງຢ້ຽມຢາມອັຟການີສຖານຂອງທ່ານລັດຖະມຸນຕີປ້ອງກັນປະເທດສະຫະລັດ ມີຂຶ້ນໃນເວລາທີ່ສາຍພົວພັນລະຫວ່າງອັຟການີສຖານແລະສະຫະລັດ ມີຄວາມເຄັ່ງຕຶງຂຶ້ນ ຫລັງຈາກທີ່ເດັກນ້ອຍຜູ້ຊາຍອັຟການີສຖານ 9 ຄົນ ໄດ້ຖືກສັງຫານໂດຍບັງເອີນ ໃນລະ
ຫວ່າງການໂຈມຕີທາງອາກາດຂອງກຸ່ມເນໂຕ ທີ່ແຂວງ Kunar ໃນພາກຕາເວັນອອກ
ສຽງເໜືອຂອງອັຟການີສຖານ ໃນແລງວັນອັງຄານສັບປະດາແລ້ວນີ້.
