ນັກຂ່າວຝຣັ່ງ 2 ຄົນ ທີ່ຖືກພວກກະບົດທາລີບານລັກພາໂຕໄປໃນອັຟການິສຖານແລະ
ຖືກຄຸມຂັງເປັນເວລາ 1 ປີເຄິ່ງນັ້ນ ໄດ້ເດີນທາງກັບຄືນໄປເຖິງຝຣັ່ງແລ້ວລຸນຫຼັງທີ່ໄດ້ຖືກ
ປ່ອຍໃຫ້ເປັນອິດສະຫຼະ.
ນາຍ Stephane Taponier ແລະນາຍ Herve Ghesquiere ນັກຂ່າວຂອງໂທລະ
ພາບຊ່ອງ 3 ຂອງຝຣັ່ງໄດ້ເດີນທາງໄປຮອດສະໜາມບິນທະຫານແຫ່ງນຶ່ງໃກ້ໆກຸງປາຣີ
ໃນມື້ນີ້.
ນາຍພາສາຊາວອັຟການິສຖານ ນາຍ Reza Din ກໍໄດ້ຖືກປ່ອຍຄືກັນ.
ປະທານາທິບໍດີຝຣັ່ງ ທ່ານ Nicolas Sarkozy ໄດ້ກ່າວຍ້ອງຍໍປະທານາທິບໍດີອັຟກາ
ນິສຖານ ທ່ານ Hamid Karzai ໃນມື້ວັນພຸດວານນີ້ ສໍາລັບການຮັບມື ກັບສະຖານະ
ການດັ່ງກ່າວຂອງທ່ານ ແລະຂອບອົກຂອບໃຈບຸກຄົນອື່ນໆອີກ ທີ່ໄດ້ພົວພັນໃນການ ຈັດແຈງເພື່ອໃຫ້ມີການປ່ອຍພວກໂຕປະກັນເຫລົ່ານັ້ນ.
ພວກນັກຂ່າວຝຣັ່ງທັງ 2 ພ້ອມດ້ວຍນາຍພາສາ ແລະເພື່ອນຮ່ວມງານ ຊາວອັຟການິສ
ຖານອີກ 2 ຄົນ ໄດ້ຖືກລັກພາໂຕໄປໃນເດືອນທັນວາ ປີ 2009 ຂະນະທີ່ພວມເກັບກຳ
ຂ່າວກ່ຽວກັບການບູລະນະສ້າງສາອັຟການິສຖານຢູ່ທາງກໍ້າຕາເວັນອອກຂອງນະຄອນ
ຫຼວງກາບູລ. ພວກທາລີບານ ໄດ້ອ້າງເອົາຄວາມຮັບຜິດຊອບ ໃນການລັກພາໂຕພວກ
ເຂົາເຈົ້າ.
ຍັງບໍ່ມີຂ່າວຄາວໃດໆເທື່ອວ່າເປັນຫຍັງພວກທາລີບານຈຶ່ງໄດ້ຕັດສິນໃຈປ່ອຍເຂົາເຈົ້າຫຼັງ ຈາກໄດ້ຄຸມຂັງພວກກ່ຽວມາດົນເຖິງ 547 ມື້. ເຈົ້າໜ້າທີ່ຝຣັ່ງກ່າວວ່າລັດຖະບານຝຣັ່ງບໍ່
ໄດ້ຈ່າຍເງິນຄ່າໄຖ່ໃຫ້ແກ່ພວກຈັບໂຕປະກັນໃດໆທັງສິ້ນ.
