ເລຂາທິການໃຫຍ່ຂອງອົງການສະຫະປະຊາຊາດ ທ່ານ Ban Ki-moon ໄດ້ຮຽກຮ້ອງໃຫ້
ອັຟການິສຖານ ຖືເອົາການປາບປາມການລັກລອບຄ້າຢາເສບຕິດ ເປັນບັນຫາອັນຮີບດ່ວນ
ແລະກ່າວວ່າ ປະຊາຄົມນາໆຊາດ ຕ້ອງໃຫ້ຄວາມຊ່ອຍເຫຼືອ ໃນການດຳເນີນຄວາມພະຍາ
ຍາມດັ່ງກ່າວ.
ໃນຄຳປາໄສເປີດກອງປະຊຸມບັນດາຜູ້ຕາງໜ້າຂັ້ນສູງຈາກທົ່ວໂລກ ເປັນເວລານຶ່ງມື້ ທີ່ກຸງ
ວຽນນາໃນວັນພະຫັດວານນີ້ ທ່ານ Ban ກ່າວວ່າ ການຜະລິດແລະລັກລອບຄ້າຢາເສບຕິດ
ໃຫ້ໂທດບ່ອນທຳລາຍ ການດຳເນີນຄວາມພະຍາຍາມ ໃນການໃຫ້ຄວາມຊ່ອຍເຫຼືອແກ່ອັຟ
ການິສຖານກາຍເປັນປະເທດທີ່ມີເສດຖະກິດດຳເນີນໄປຕາມປົກກະຕິໄດ້.
ທ່ານ Ban ເວົ້າວ່າ ການປູກຝິ່ນໃນອັຟການິສຖານໄດ້ເພີ່ມຂຶ້ນ 7% ແລະການຜະລິດຢາ
ຝິ່ນ 61% ໃນຮອບປີຜ່ານມາ. ລາຍໄດ້ການສົ່ງອອກຈາກການຂາຍຜະລິດຕະພັນຝິ່ນຂອງ
ອັຟການິສຖານອາດມີມູນຄ່າສູງເຖິງ 2 ພັນ 400 ລ້ານໂດລາ. ທ່ານເວົ້າວ່າ ພວກເຮົາຈະ
ບໍ່ສາມາດຄາດຫວັງໄດ້ວ່າຈະມີສະຖຽນລະພາບໄດ້ເວລາ 15% ຂອງຍອດຜະລິດຮວມແຫ່ງ
ຊາດຂອງອັຟການິສຖານມາຈາກການຄ້າຢາເສບຕິດ.
ລັດຖະມົນຕີກະຊວງຕໍ່ຕ້ານຢາເສບຕິດຂອງອັຟການິສຖານທ່ານ Zarar Ah-med Moq-
bel Osmani ກ່າວວ່າ ອັຟການິສຖານເຂົ້າໃຈດີເຖິງຄວາມວິຕົກກັງວົນຂອງນາໆຊາດແຕ່
ໃຫ້ຂໍ້ສັງເກດວ່າ ການປູກຝິ່ນສ່ວນໃຫຍ່ແມ່ນມີຂຶ້ນຢູ່ໃນບັນດາແຂວງທີ່ບໍ່ມີຄວາມປອດໄພ.
ລັດຖະມົນຕີການຕ່າງປະເທດຝຣັ່ງ ທ່ານ Alain Juppe ຊຶ່ງເປັນປະທານຮ່ວມຂອງກອງ
ປະຊຸມໃນຄັ້ງນີ້ພ້ອມກັບຄູ່ຕຳແໜ່ງຝ່າຍຣັດເຊຍຄືທ່ານ Sergei Lavrov ກ່າວວ່າ ເມື່ອ
ເວົ້າເຖິງເລື່ອງໄພຂົ່ມຂູ່ແລ້ວບໍ່ມີຫຍັງທີ່ຈະເປັນອັນຕະລາຍຮ້າຍແຮງໄປກວ່າການບໍ່ດຳເນີນ
ການຫຍັງເລີຍ.
