ບັນດາເຈົ້າໜ້າທີ່ສະຫະລັດກໍາລັງທໍາການສືບສວນສອບສວນຂໍ້ກ່າວຫາຕ່າງໆທີ່ວ່າ ພວກນາຍທະຫານກອງທັບອາກາດອັຟການິສຖານບາງຄົນ ໄດ້ໃຊ້ເຮືອບິນທາງການເພື່ອບັນທຸກຢາເສບຕິດແລະພວກອາວຸດ ຜິດກົດໝາຍໄປຍັງທົ່ວປະເທດນັ້ນ.
ໂຄສົກຂອງກຸ່ມເນໂຕ້ກ່າວວ່າ ການສືບສວນສອບສວນນີ້ຢູ່ໃນຂັ້ນຕົ້ນທີ່ສຸດ.
ໜັງສືພິມ The Wall Street Journal ຂອງສະຫະລັດກ່າວວ່າ ພວກເຈົ້າໜ້າທີ່ສືບສວນກໍາລັງຊອກຫາເຊ່ນກັນວ່າການລັກລອບຄ້າ ຂາຍຢາເສບຕິດແລະອາວຸດເຖື່ອນທີ່ກ່າວຫານີ້ ມີສ່ວນພົວພັນກັບການໂຈມຕີທີ່ມີຜູ້ຄົນເສຍຊີວິດໃນຫວ່າງປີແລ້ວນີ້ຫລືບໍ. ໃນການໂຈມຕີຄັ້ງນັ້ນນັກບິນທະຫານອັຟການິສຖານໄດ້ເປີດສາກຍິງປືນໃສ່ພວກທະຫານກຸ່ມເນໂຕ້ ເຮັດໃຫ້ທະຫານສະຫະລັດ 8 ຄົນ ແລະພະນັກງານສັນຍາຈ້າງອະເມຣິກັນຄົນນຶ່ງເສຍຊີວິດໄປນັ້ນ ຊຶ່ງນັບວ່າເປັນເຫດການບັ້ນນຶ່ງທີ່ເຮັດມີຜູ້ຄົນເສຍຊີວິດໄປຫລາຍທີ່ສຸດ ນັບແຕ່ສົງຄາມໄດ້ເລີ້ມຂຶ້ນໃນປີ 2001 ນັ້ນ.
ໜັງສືພິມ The Wall Street Journal ລາຍງານວ່າ ຜູ້ໂຈມຕີຄັ້ງນັ້ນ ແມ່ນພັນເອກກອງທັບອາກາດ ທີ່ຖືກກ່າວຫາວ່າ ມີສ່ວນພົວພັນ ໃນກິດຈະກໍາຜິດກົດໝາຍທີ່ວ່ານີ້ ຊຶ່ງພວກທີ່ໄດ້ຮັບເຄາະຮ້າຍສ່ວນຫລາຍແມ່ນພົວພັນໃນການສືບສວນສອບສວນຂັ້ນຕົ້ນນີ້ຢູ່.
ອັຟການິສຖານຜະລິດ 90 ເປີເຊັນຂອງປະລິມານຝິ່ນທັງໝົດໃນໂລກ ແລະສະຫະປະຊາຊາດກ່າວວ່າ 15 ເປີເຊັນຂອງຜົນຜະລິດຮວມພາຍໃນປະເທດທັງໝົດຂອງອັຟການິສຖານ ແມ່ນໄດ້ມາຈາກການຂາຍຢາເສບຕິດ.
ເບິ່ງວີດີໂອ ກ່ຽວກັບຢາເສບຕິດຢູ່ອັຟການິສຖານ