ໜັງສືພິມທີ່ມີຊື່ສຽງສະບັບນຶ່ງຂອງສະຫະລັດລາຍງານຂ່າວວ່າ ບັນດາເຈົ້າໜ້າທີ່ຂັ້ນສູງຂອງ ລັດຖະບານປະທານາທິບໍດີໂອບາມາ ກໍາລັງຄຶດຄືນຫາວິທີການໃໝ່ ກ່ຽວກັບວ່າຈະເຮັດແນວໃດດີ ຈຶ່ງຈະປາບການສໍ້ລາດບັງຫລວງໃນອັຟການິສຖານນັ້ນໄດ້.
ໝັງສືພິມ Washington Post ອ້າງຄໍາເວົ້າຂອງເຈົ້າໜ້າທີ່ຫລາຍຄົນທີ່ບໍ່ບອກຊື່ໃຫ້ຮູ້ທີ່ ເວົ້າວ່າ ການຊຸກຍູ້ໃຫ້ທໍາການປາບປາມການສໍ້ລາດບັງຫລວງໃນແບບສະບັບຂອງສະຫະລັດ ນັ້ນໄດ້ສ້າງຄວາມແຕກແຍກຂຶ້ນ ກັບປະທານາທິບໍດີອັຟການິສຖານ ທ່ານ Hamid Karzai.
ບັນດາເຈົ້າໜ້າທີ່ເຫລົ່ານີ້ ກ່າວຕໍ່ໜັງສືພິມ Washington Post ວ່າ ມີອັນທີ່ພວກເຂົາເຈົ້າ ເອີ້ນວ່າຄວາມເຫັນພ້ອມເປັນສຽງດຽວກັນຫລາຍຂຶ້ນເລື້ອຍໆວ່າກໍລະນີການສໍ້ລາດບັງ ຫລວງລາຍໃຫຍ່ໆ ທີ່ພົວພັນກັບພວກບຸກຄົນໃນວົງການລັດຖະບານຂອງປະທານາທິບໍດີ Karzai ນັ້ນ ຄວນຈະຖືກແກ້ໄຂໂດຍການປະນີປະນອມແບບໄວ້ໜ້າກັນ ໂດຍທາງລັບແທນທີ່ຈະແກ້ໄຂດ້ວຍການດໍາເນີນຄະດີກັນຢ່າງເປີດເຜີຍ.
ໜັງສືພິມ Washington Post ກ່າວວ່າພວກທີ່ປຶກສາດ້ານຄວາມປອດໄພແຫ່ງຊາດ ຈະ ພົບປະກັບປະທານາທິບໍດີໂອບາມາໃນສັບປະດານີ້ເພື່ອທໍາການໂອ້ລົມສົນທະນາກັນກ່ຽວກັບບັນຫາເຫລົ່ານີ້.
ກຸ່ມ NATO ໄດ້ເປີດເຜີຍຫລັກຊີ້ນໍາໃໝ ກ່ຽວກັບການອະນຸມັດສັນຍາຮັບເໝົາຂອງນາໆ ຊາດມູນຄ່າຫລາຍພັນລ້ານດອນລາໃນອັຟການິສຖານ ໃນຖານະເປັນພາກສ່ວນນຶ່ງ ຂອງຄວາມພະຍາຍາມໃນການປາບການສໍ້ລາດບັງຫລວງນັ້ນ.
ຫລັກຊີ້ນໍາໃໝ່ ທີ່ອອກໂດຍພົນເອກ David Petraeus ຜູ້ບັນຊາການສູງສຸດຂອງກໍາລັງ NATO ຢູໃນອັຟການິສຖານນັ້ນຍັງແກ້ໄຂບັນຫາຄວາມເປັນຫ່ວງຕ່າງໆເຊ່ນກັນ ທີ່ວ່າເງິນ ຮັບເໝົາຕ່າງໆເຫລົ່ານັ້ນ ສາມາດໄປຕົກຢູ່ໃນກໍາມືຂອງພວກກະບົດໄດ້.