ກອງປະຊຸມໂລກກ່ຽວກັບອະນາຄົດຂອງອັຟການີສຖານໄດ້ເປີດຂຶ້ນແລ້ວ ທີ່ນະຄອນບອນ
ຂອງປະເທດເຢຍຣະມັນ.
ໃນວັນຈັນມື້ນີ້ ພວກຜູ້ແທນຈາກຫລາຍກວ່າ 80 ປະເທດ ໄດ້ເພັ່ງເລັງໃສ່ການວາງເສ້ນທາງເດີນ ສໍາລັບປະເທດທີ່ໄດ້ຖືກທໍາລາຍໂດຍສົງຄາມດັ່ງ ກ່າວ ລຸນຫລັງທີ່ກໍາລັງທະຫານນາໆຊາດ ຖອນອອກໄປໃນປີ 2014. ແຕ່ວ່າປາກີສຖານຊຶ່ງເປັນປະເທດທີ່ຖືວ່າມີຄວາມສໍາຄັນຕໍ່ຄວາມໝັ້ນຄົງໃນອານາຄົດຂອງອັຟການີສຖານ ໃນທຸກດ້ານນັ້ນ ໄດ້ຂວໍ້າບາດບໍ່ເຂົ້າຮ່ວມກອງປະຊຸມດັ່ງກ່າວ ເພື່ອປະທ້ວງການໂຈມຕີຂ້າມຊາຍແດນຂອງກຸ່ມເນໂຕ້ ເມື່ອທ້າຍເດືອນຜ່ານມານີ້ ທີ່ຍັງຜົນໃຫ້ທະຫານ ປາກີສຖານ 24 ຄົນ ເສຍຊີວິດນັ້ນ.
ການປະຊຸມກັນທີ່ຈັດຂຶ້ນໃນນະຄອນຫລວງເກົ່າຂອງເຢຍຣະມັນ ແມ່ນຄາດວ່າຈະຫາທາງແກ້ໄຂ 3 ບັນຫາຫລັກ ຊຶ່ງລວມມີ ການໂອນຄວາມຮັບຜິດຊອບດ້ານການຮັກສາຄວາມໝັ້ນຄົງ ຈາກກອງກໍາລັງທະຫານນາໆຊາດ ໄປໃຫ້ແກ່ທະຫານອັຟການີສຖານ, ສ້າງຄວາມປອງດອງຊາດກັບກຸ່ມຕາລີບັນ ແລະໂອກາດໄລຍະຍາວໃນການໄດ້ຮັບການຊ່ວຍເຫລືອຈາກສາກົນ.
ໃນມື້ກ່ອນໄຂກອງປະຊຸມນັ້ນ ປະທານາທິບໍດີອັຟການີສຖານ ທ່ານຮາມິດ ກາຊາຍ ໄດ້ຕໍານິລັດຖະບານກຸງອິສລະມາບັດ ທີ່ບໍ່ໄດ້ໃຫ້ການຊ່ວຍເຫລືອແກ່ອັຟການີສຖານ ໃນການສ້າງຄວາມຖືກຕ້ອງປອງດອງຊາດ. ໃນການໃຫ້ສໍາພາດຂ່າວຕໍ່ໜັງສືພິມລາຍສັບປະດາ Der Spiegel ຂອງເຢຍຣະ ມັນ ໃນວັນອາທິດວານນີ້ ທ່ານກາຊາຍເວົ້າວ່າ: “ຈົນຮອດດຽວນີ້ ປາກີສ ຖານກໍຍັງໄດ້ປະຕິເສດຊໍ້າແລ້ວຊໍ້າອີກ ທີ່ຈະຊ່ວຍໃນການເຈລະຈາກັບຄະນະນໍາພາຂອງຝ່າຍຕາລີບັນນັ້ນ.”
ນອກນັ້ນ ຜູ້ນໍາອັຟການີສຖານ ຍັງໄດ້ຂໍຮ້ອງໃຫ້ສືບຕໍ່ມີການຊ່ວຍເຫລືອ ທາງດ້ານການເງິນ ແລະທະຫານແກ່ປະເທດຂອງທ່ານ ຫລັງຈາກ ປີ 2014 ໄປ. ທ່ານກ່າວວ່າ ອັຟການີສຖານຈະເປັນປະເທດທີ່ຢູ່ແນວໜ້າ ຫລາຍກວ່າທີ່ເຄີຍມີມາກ່ອນ ໂດຍໄດ້ເຕືອນວ່າ “ຖ້າຫາກວ່າ ພວກເຮົາເສຍໄຊໃນການຕໍ່ສູ້ຄັ້ງນີ້ ພວກເຮົາກໍແມ່ນຈະຖືກຂົ່ມຂູ່ໃຫ້ຕົກໄປຢູ່ໃນສະພາບ ທີ່ຄ້າຍຄືກັບ ກ່ອນ ວັນທີ 11 ກັນຍາ 2011.”
ຢູ່ໃນບັນດາຜູ້ແທນທີ່ເຂົ້າຮ່ວມກອງປະຊຸມ ທີ່ກຸງບອນນັ້ນ ມີເລຂາທິການໃຫຍ່ສະຫະປະຊາຊາດ ທ່ານ ພັນ ກິມູນ ແລະທ່ານນາງ Hillary Clinton ລັດຖະມົນຕີຕ່າງປະເທດສະຫະລັດ.
