ໃນລະຫວ່າງການຢ້ຽມຢາມປະເທດເທີກີ ເພື່ອເຂົ້າຮ່ວມກອງປະຊຸມບັ້ນນຶ່ງ ເມື່ອໝໍ່ໆ
ມານີ້ ທ່ານຮາມິດ ກາຊາຍ ປະທານາທິບໍດີອັຟການີສຖານໄດ້ກ່າວເຕືອນວ່າ ຈະບໍ່ມີ
ຄວາມຫວັງສໍາລັບສັນຕິພາບໃນອັຟການີສຖານ ຖ້າຫາກບໍ່ມີການຊ່ວຍເຫລືອຈາກ
ພວກປະເທດເພື່ອນບ້ານ ໃນການສູ້ລົບກັບກຸ່ມກໍ່ການຮ້າຍ. ກອງປະຊຸມອີສຕັນບູນ
ທີ່ເທີກີແລະອັຟການີສຖານ ເປັນເຈົ້າພາບຮ່ວມກັນນັ້ນ ມີພວກນັກການທູດລະດັບສູງ
ຈາກຂົງເຂດ ແລະຈາກພາກຕາເວັນຕົກເຂົ້າຮ່ວມນໍາ. ເວລານີ້ ສະຫະລັດກໍາລັງປະຕິ
ບັດງານກັບພວກປະເທດພາຄີຂອງຕົນ ເພື່ອສ້າງສາໃນສິ່ງທີ່ເອີ້ນວ່າ “ເສັ້ນທາງສາຍ
ໄໝໃໝ່” ເພື່ອຮວມເອົາອັຟການີສຖານເຂົ້າເປັນສ່ວນນຶ່ງຂອງຊີວິດທາງເສດຖະກິດຂອງ
ຂົງເຂດນັ້ນ. ແຜນການດັ່ງກ່າວແມ່ນແນເປົ້າໝາຍໃສ່ການຊຸກຍູ້ການຄ້າໃນຂົງເຂດ
ໂດຍການເຊຶ່ອມໂຍງຖະໜົນຫົນທາງແລະທາງລົດໄຟຂອງຂົງເຂດເອເຊຍກາງ ໃນປາ
ກີສຖານ, ອັຟການີສຖານ ແລະອິນເດຍ ເຂົ້າກັນ.
ທ່ານ Michael O’Hanlon ຊຶ່ງເປັນເຈົ້າໜ້າທີ່ອາວຸໂສທີ່ສະຖາບັນ Brookings ໃນ
ນະຄອນຫລວງວໍຊິງຕັນ ທັງເປັນຜູ້ຊ່ຽວຊານດ້ານຄວາມໝັ້ນຄົງແຫ່ງຊາດ ແລະນະ
ໂຍບາຍດ້ານປ້ອງກັນປະເທດ ກ່າວວ່າ:
“ສະຫລູບແລ້ວ ກໍແມ່ນວ່າ ເຮົາບໍ່ສາມາດຈະເຮັດໃຫ້ອັຟການີສຖານເປັນ
ເສັ້ນທາງສາຍໄໝໄດ້ ເວັ້ນເສຍແຕ່ວ່າເຮົາສ້າງສະຖຽນລະພາບໃຫ້ປະເທດ
ນັ້ນ ແລະການເມືອງຂອງປະເທດນັ້ນໃຫ້ໄດ້ເສຍກ່ອນ. ດັ່ງນັ້ນ ວິໄສທັດສໍາ
ລັບອະນາຄົດທັງໝົດເຫລົ່ານີ້ ແມ່ນເທົ່າກັບເປັນການມອງຂ້າມພາລະກິດ
ສະເພາະໜ້າ ຊຶ່ງກໍແມ່ນການສືບຕໍ່ສ້າງອັຟການີສຖານໃຫ້ມີສະຖຽນລະພາບ.”
ທ່ານ O’Hanlon ກ່າວວ່າ ນະໂຍບາຍການຖອນທະຫານແມ່ນໄດ້ແຕ້ມແຜນການໄວ້ແລ້ວເປັນຢ່າງດີ ແຕ່ສ່ວນທີ່ລໍາບາກກວ່ານັ້ນກໍຄືການສ້າງຄວາມເຂັ້ມແຂງ ແກ່ລະບົບການເມືອງຂອງອັຟການີສຖານ ຊຶ່ງທ່ານກ່າວຕໍ່ໄປວ່າ:
“ນອກນັ້ນແລ້ວ ປີ 2014 ແມ່ນປີທີ່ ປະທານາທິບໍດີ ຮາມິດ ກາຊາຍ ຈະພົ້ນຈາກຕໍາແໜ່ງ. ພວກເຮົາຕ້ອງໄດ້ຊ່ວຍໃຫ້ຊາວອັຟການີສຖານ ມີວິທີທາງທີ່ມີຄວາມໝາຍ ເພື່ອເລືອກເອົາຜູ້ທີ່ເຫັນສົມຄວນ ມາສືບຕໍາແໜ່ງແທນທ່ານກາຊາຍນັ້ນ. ແຕ່ກໍໜ້າເສຍໃຈ ທີ່ລັດຖະທໍາມະນູນຂອງອັຟການີສຖານ ຊຶ່ງວ່າປະເທດຊາດຂອງຂ້າພະເຈົ້າມີຄວາມຮັບຜິດຊອບສ່ວນນຶ່ງໃນການຮ່າງຂຶ້ນມານັ້ນ ແມ່ນສ້າງຕັ້ງປະທານາທິບໍດີທີ່ເຂັ້ມແຂງຫລາຍ ແລະພັກການເມືອງທີ່ອ່ອນແອ ສະພາທີ່ອ່ອນແອ ມີສູນກາງທາງເລືອກທີ່ອ່ອນແອສໍາລັບອິດທະພົນທາງການເມືອງ ແລະນັ້ນຈຶ່ງເຮັດໃຫ້ເຂົາເຈົ້າ ມີການກຽມຕົວອ່ອນຫລາຍ ສໍາລັບການເລືອກຕັ້ງເອົາປະທານາທິບໍດີ ທີ່ຜູ້ທີ່ຢູ່ໃນຕໍາແໜ່ງ ບໍ່ສາມາດທີ່ຈະສະໝັກໄດ້ອີກນັ້ນ.”
ພວກນັກວິເຄາະບາງຄົນເຕືອນວ່າ ການເລືອກຕັ້ງປີ 2014 ນັ້ນຈະເປັນຄວາມຫາຍະນະ ຖ້າຫາກວ່າມີການສໍ້ໂກງການເລືອກຕັ້ງກັນອີກ ຄືກັນກັບ ເມື່ອຄັ້ງລ່າສຸດ ດັ່ງທີ່ມີການກ່າວຫາຢ່າງກວ້າງຂວາງນັ້ນ. ພວກນັກວິເຄາະເວົ້າຕື່ມວ່າ ມັນຈະຕ້ອງມີແຜນການທີ່ແນ່ນອນສໍາລັບການປະຕິຮູບທີ່ຈິງຈັງ ເພື່ອສ້າງລັດຖະບານອັຟການີສຖານໃຫ້ຢູ່ໃນເສັ້ນທາງທີ່ຍືນຍົງຖາວອນ. ທ່ານນາງ Caroline Wadhams ເປັນເຈົ້າໜ້າທີ່ປະຈໍາສູນກາງເພື່ອຄວາມກ້າວໜ້າອາເມຣິກັນ.
ທ່ານນາງ Wadhams ເວົ້າວ່າ “ລະບົບຍຸຕິທໍາຂອງອັຟການິສຖານແມ່ນ…ຄື ລັດຖະມົນຕີກະຊວງຍຸຕິທໍາ ແມ່ນຢູ່ໃນກໍາມື ຂອງປະທານາ ທິບໍດີ ກາຊາຍ ຫລືບໍ່ກໍເປັນລະບົບຍຸຕິທໍາທີ່ອ່ອນແອຢ່າງບໍ່ໜ້າເຊື່ອ. ດັ່ງນັ້ນ ມັນຈະຕ້ອງມີລະບົບກວດກາກັນແລະກັນຫລາຍຂຶ້ນ ເພື່ອຖ່ວງດຶງອໍານາດລະຫວ່າງກັນແລະກັນ ເພື່ອໃຫ້ມີຄວາມຮັບຜິດຊອບບາງປະການຢູ່ພາຍໃນລະບົບ ແລະເພື່ອໃຫ້ປະຊາຊົນມີທາງຮ້ອງທຸກແລະລະບາຍ ຄວາມບໍ່ພໍໃຈຂອງພວກເຂົາເຈົ້າໄດ້. ມີການປະຕິຮູບໃນລະດັບນ້ອຍທີ່ສຸດທີ່ຕ້ອງເກີດຂຶ້ນໃຫ້ໄດ້. ມັນຕ້ອງມີວິທີທາງກວດສອບແລະສ້າງຄວາມສົນດຸນກັນໂດຍຜ່ານການກະຈາຍອໍານາດຈາກຈຸດສູນກາງຂອງລັດ ເພື່ອອໍານວຍໃຫ້ມີປາກສຽງຫລາຍຂຶ້ນ ໃຫ້ມີການລວມເຂົ້າກັນຫລາຍຂຶ້ນ ແລະນໍາເອົາຄວາມຮັບຜິດຊອບເພິ່ມຂຶ້ນ ມາສູ່ລະບົບ.”
ໃນປັດຈຸບັນນີ້ ສະຫະລັດແລະປະຊາຄົມນາໆຊາດ ແມ່ນມີຄວາມຕັ້ງໃຈທີ່ຈະສະນອງໃຫ້ງົບປະມານໃຫ້ແກ່ຄວາມພະຍາຍາມຂອງອັຟການີສຖານ ເພື່ອສ້າງສາພວກໂຄງລ່າງພື້ນຖານຂອງຕົນ ແລະສະໜອງການບໍລິການຂັ້ນພື້ນຖານແກ່ປະຊາຊົນຂອງຕົນ ແຕ່ຖ້າຫາກຄວາມໝັ້ນຄົງຍັງສືບຕໍ່ຊຸດໂຊມລົງໄປ ຫລັງຈາກປີ 2014 ນັ້ນ ແຜນການດັ່ງກ່າວນີ້ກໍແມ່ນຈະພັງລົງ.
ມັນອາດຈະຍັງມີການກໍ່ຄວາມຮຸນແຮງຂຶ້ນຢູ່ອີກກໍໄດ້ ຫລັງຈາກປີ 2014 ນັ້ນ ແຕ່ພວກປະເທດໃນຂົງເຂດ ແລະໃນຝ່າຍຕາເວັນຕົກກໍກໍາລັງໃຫ້ການສະໜັບສະໜຸນແກ່ການດໍາເນີນງານສ້າງຄວາມປອງດອງຊາດທີ່ນໍາພາ ໂດຍອັຟການີສຖານ ທີ່ຈະຮັບປະກັນໃຫ້ອັຟການີສຖານເປັນປະເທດທີ່ມີສະຖຽນລະພາບ ແລະເປັນປະຊາທິປະໄຕນັ້ນ.
ເບິ່ງລາຍງານຂ່າວເລື້ອງນີ້ເປັນພາສາອັງກິດ
