ປະທະນາທິບໍດີ ອັຟການີສຖານ ທ່ານ Hmid Karzai ໄດ້ສັ່ງໃຫ້ມີການສືບສວນສອບ
ສວນກ່ຽວກັບເລື້ອງການໂຈມຕີທາງອາກາດຂອງກໍາລັງປະສົມນາໆຊາດ ທີ່ທາງການ
ກ່າວວ່າໄດ້ສັງຫານສະມາຊິກທັງ 8 ຄົນຂອງຄອບຄົວນຶ່ງ ໃນພາກຕະເວັນອອກຂອງ
ແຂວງ Paktia ບ່ອນທີ່ກອງທະຫານ ອັຟການີສຖານແລະນາໆຊາດ ພະຍາຍາມຈະ
ກໍາຈັດກຸ່ມກະບົດ Taliban.
ໂຄສົກປະຈໍາແຂວງ ທ່ານ Rohullah Samoon ກ່າວກັບ VOA ໃນວັນອາທິດວານນີ້
ວ່າ ການໂຈມຕີທາງອາກາດໃນຄໍ່າຄືນວານນີ້ ໄດ້ສັງຫານຊາຍຜູ້ນຶ່ງພ້ອມກັບພັນລະຍາ
ແລະລູກໆຂອງລາວອີກ 6 ຄົນ ໃນເຂດເມືອງ Gerda Serai.
ໂຄສົກກ່າວວ່າ ຊາຍຄົນນັ້ນ ບໍ່ໄດ້ມີສ່ວນພົວພັນກ່ຽວຂ້ອງກັບກຸ່ມກະບົດໃດໆ ແລະບໍ່ໄດ້ມີການປະກອບກິດຈະກໍາຕໍ່ຕ້ານລັດຖະບານ ແຕ່ຢ່າງໃດ.
ໂຄສົກຂອງຝ່າຍກໍາລັງປະສົມກລືເນໂຕ້ ຮ້ອຍໂທຍິງ Liuren Riger ຢືນຢັນວ່າ ກຸ່ມ NATO ໄດ້ຍິງຕອບໂຕ້ຄືນໄປ ຫຼັງຈາກທີ່ ທະຫານຂອງຕົນໄດ້ຖືກໂຈມຕີຈາກກຸ່ມກະບົດ. ທ່ານນາງໄດ້ກ່າວວ່າ ການສູ້ລົບກັນທີ່ Paktia ໄດ້ມີຂຶ້ນ ນຶ່ງມື້ກ່ອນໜ້ານີ້ ຫລັງຈາກທີ່ກຸ່ມກະບົດທໍາການໂຈມຕີ ທະຫານຂອງກໍາລັງຊ່ວຍເຫລືອດ້ານຄວາມປອດໄພນາໆຊາດ ທີ່ນໍາໂດຍກຸ່ມ NATO ນັ້ນ ແລະກໍໄດ້ທໍາການໂຈມຕີແບບເດີມອີກ ໃນວັນອາທິດວານນີ້.
