ກຸ່ມເນໂຕກ່າວໃນວັນຈັນມື້ນີ້ວ່າ ພວກກໍາລັງຂອງຕົນໄດ້ເລີ້ມຕົ້ນພາລະກິດໃນການເກັບກູ້ ຊາກຫັກພັງຂອງເຮືອບິນເຮລີຄອບເຕີຂອງກອງທັບສະຫະລັດລໍານຶ່ງທີ່ຕົກລົງ ແລະຊາກສົບຂອງພວກທະຫານທີ່ໄດ້ເສຍຊີວິດໄປໃນເຮືອບິນທີ່ຕົກລົງໃນແຂວງ Wardak ໃນພາກກາງຂອງອັຟການີສຖານນັ້ນແລ້ວ.
ກຸ່ມພັນທະມິດນາໆຊາດກ່າວວ່າ ພວກທະຫານຂອງຕົນໄດ້ເອົາມາດຕະການຮັກສາຄວາມປອດໄພແລ້ວ ໃນບ່ອນທີ່ເຮືອບິນເຮືອບິນເຮລີຄອບເຕີຂົນສົ່ງ 2 ໝາກປິ່ນ Chinook ຕົກລົງໃນວັນເສົາຜ່ານມານີ້ ເຮັດໃຫ້ພວກຢູ່ໃນເຮືອບິນ 38 ຄົນເສຍຊີວິດ ຮວມທັງພວກທະຫານສະຫະລັດ 30 ຄົນ ທະຫານໜ່ວຍກ້າຕາຍຂອງອັຟການີສຖານ 7 ຄົນ ແລະນາຍພາສາຄົນນຶ່ງນັ້ນ.
ບັນດາເຈົ້າໜ້າທີ່ສະຫະລັດກ່າວວ່າ ພວກທະຫານເຫລົ່ານັ້ນໄດ້ໄປຊ່ອຍເຫລືອໜ່ວຍລົບພິເສດ Rangers ຈຸນຶ່ງຂອງກອງທັບບົກສະຫະລັດ ທີ່ໄດ້ຖືກພວກກະບົດໂຈມຕີຢູ່ໃນເຂດຮ່ອມພູ Tagab Valley ທີ່ສອກຫລີກຫ່າງໄກນັ້ນ.
ກໍາລັງອັຟການີສຖານແລະສະຫະລັດໄດ້ທໍາການສູ້ລົບກັນກັບພວກກະບົດໃນເຂດດັ່ງກ່າວໃນວັນອາທິດວານນີ້ ໃນຂະນະທີ່ພວກເຂົາເຈົ້າພະຍາຍາມໄປເກັບກູ້ເອົາຊາກຫັກພັງຂອງເຮືອບິນຈາກບ່ອນເຮືອບິນຕົກນັ້ນ.
ເຮືອບິນຕົກຄັ້ງນີ້ນນັບວ່າເປັນການສູນເສຍຊີວິດຄັ້ງຮ້າຍແຮງທີ່ສຸດ ພ້ອມກັນບາດດຽວ ທີ່ກໍາລັງສະຫະລັດໄດ້ປະສົບມາ ນັບແຕ່ສົງຄາມອັຟ ການີສຖານໄດ້ເລີ້ມຂຶ້ນໃນທ້າຍປີ 2001 ນັ້ນ.
ກຸ່ມເນໂຕ້ກ່າວວ່າ ຕົນກໍາລັງທໍາການສືບສວນສອບສວນການກ່າວອ້າງຂອງກຸ່ມກະບົດຕາລີບັນ ທີ່ວ່າພວກເຂົາໄດ້ຍິງເຮືອບິນເຮລີຄອບເຕີລໍານີ້ຕົກນັ້ນ.
ພວກກໍາລັງຂອງລັດຖະບານອັຟການີສຖານໃນເຂດທ້ອງຖິ່ນກ່າວວ່າ ເຮືອບິນເຮລີຄອບເຕີລໍານີ້ຖືກລູກຈະຫລວດ ຫລັງຈາກການບຸກໂຈມຕີຂອງພວກກໍາລັງພາຍໃຕ້ການນໍາພາຂອງສະຫະລັດຕໍ່ບໍລິເວນແຫ່ງນຶ່ງຂອງກຸ່ມຕາລີບັນ. ພວກນັກຕໍ່ສູ້ຫົວຮຸນແຮງຂອງກຸ່ມຕາລີບັນ 8 ຄົນໄດ້ເສຍຊີວິດໄປເຊ່ນກັນໃນການສູ້ລົບກັນນັ້ນ.
