ລິ້ງ ສຳຫລັບເຂົ້າຫາ

ນາຍ​ພົນ Petraeus ອຳລາ ທະຫານສະຫະລັດ ທີ່ອັຟການິສຖານ

  • ສິງ ບູຣົມມະວົງ

ນາຍພົນ David-Petraeus ຜູ້ບັນຊາການກອງທັບສະຫະລັດແລະກຸ່ມ ເນໂຕ້ທີ່ອັຟການີສຖານ ຄໍານັບທະຫານ ວັນທີ 4 ກໍລະກົດ 2011

ນາຍ​ພົນ David Petraeus ຜູ້​ບັນຊາ​ການກອງທັບ​ສະຫະລັດ​ແລະ​ກໍາລັງ​ເນ​ໂຕ້​ໃນ​ອັຟກາ​ນີສຖານ​ທີ່​ຈະ​ພົ້ນ​ຈາກ​ຕໍາ​ແໜ່​ງ​ໄປ ​ໄດ້​ສະ​ແດງ​ຄວາມ​ເຄົາລົບ​ຕໍ່​ພວກ​ທະຫານ​ໃນ​ວັນ​ທີ 4 ກໍລະ​ກົດ ວັນ​ເອກະລາດ​ສະຫະລັດ ບັ້ນ​ສຸດ​ທ້າຍ​ຂອງ​ທ່ານ​ໃນ​ຊຸດ​ເຄື່ອງ​ແບບ​ທະຫານ ກ່ອນ
ທ່ານ​ຈະ​ກາຍ​ເປັນ​ຜູ້​ອໍາ​ນວຍການຄົນ​ໃໝ່​ຂອງ​ອົງການ​ສືບ​ລັບ CIA ຂອງ​ສະຫະລັດ​ນັ້ນ. ​ໃນ​ລະຫວ່າງ​ທໍາ​ພິທີຈົດ
ທະບຽນພວກທະຫານທີ່ ຢາກເຂົ້າຮັບໃຊ້ໃນກອງທັບຕື່ມອີກ ​ທີ່​ເມືອງກັນດາ​ຮາ​ໃນ​ວັນ​ຈັນ​ມື້ວານ​ນີ້ ນາຍ​ພົນ Petraeus ກ່າວ​ຕໍ່​ພວກ​ທະຫານ​ກ່ຽວ​ກັບ​ວັນ​ກໍ່​ຕັ້ງ​ອາ​ເມຣິກາ​ຄົບຮອບ 235 ປີ ນັ້ນ​ວ່າ ພຶດຕິ​ກໍາ​ຂອງ​ພວກ​ເຂົາ​ເຈົ້າ​ໄດ້​ເປັນ​ການສະ​ແດງ​ເຖິງຄວາມ​ຮັກ​ຊາດ​ທີ່​ມີ​ຄວາມ​ໝາຍ​ຫລາຍ​ທີ່​ສຸດ​ທີ່​ເປັນ​ໄປ​ໄດ້​ຂອງ​ເຂົາ​ເຈົ້າ. ​ເຖິງ​ຢ່າງ​ໃດ​ກໍ​ດີ ທ່ານ​ໄດ້​ກ່າວ​ເຕືອນ​ວ່າ ຍັງ​ມີ​ວຽກ​ຂວາງ​ໜ້າ​ຢູ່​ຢ່າງ​ຫລວງຫລາຍ​ທີ່​ຈະ​ຕ້ອງ​ໄດ້ເຮັດ​ໃນ​ອັຟກາ​ນີສຖານ​ນັ້ນ.

ນາຍພົນ Petraeus ຊຶ່ງ​ໄດ້​ຮັບ​ການ​ແຕ່ງ​ຕັ້ງ​ໃຫ້​ເປັນ​ຫົວໜ້າ​ຄົນ​ຕໍ່​ໄປ​ຂອງອົງກາ​ນສືບ​ລັບ CIA ຫວ່າງ​ໄວໆ​ຜ່ານ​ມາ​ນີ້ ຈະ​ຖືກ​ສັບ​ປ່ຽນ​ໂດຍ​ນາຍ​ພົນ​ໂທ John Allen ທະຫານ​ມາຣິນ ​ໃນ​ພິທີ​ທີ່​ກໍານົດ​ຈະ​ມີ​ຂຶ້ນ​ໃນວັນ​ທີ 18 ກໍລະກົດ​ນີ້.

ໃນ​ຄວາມ​ວຸ້ນວາຍ​ໃນ​ອັຟກາ​ນີສຖານ​ໃນ​ວັນ​ຈັນ​ວານ​ນີ້ ກຸ່ມ​ເນ​ໂຕ້​ກ່າວ​ວ່າ ທະຫານ 2 ຄົນ​ໄດ້​ເສຍ​ຊີວິດ ຄົນ​ນຶ່ງ​ຖືກ​ລະ​ເບີດ​ທີ່​ແຕກ​ຂຶ້ນ​ໃນ​ພາກ​ຕາ​ເວັນ​ອອກ ​ແລະ​ອີກ​ຄົນ​ນຶ່ງ​ເສຍ​ຊີວິດ​ໃນ​ການ​ໂຈມ​ຕີ​ຂອງ​ພວກ​ກະບົດ​ໃນ​ພາກ​ໃຕ້. ພວກ​ທະຫານ​ໄດ້​ພົບ​ເຫັນ​ສົບ​ຂອງ​ທະຫານ​ອັງກິດ​ຄົນ​ນຶ່ງ​ທີ່​ໄດ້​ຫາຍ​ສາບ​ສູນ​ໄປ​ໃນ​ຕອນ​ເຊົ້າ​ໃນ​ແຂວງ Helmand ​ໃນ​ພາກ​ໃຕ້​ຂອງ​ອັຟ
ກາ​ນີສຖານ​ນັ້ນ. ກະຊວງ​ປ້ອງ​ກັນ​ປະ​ເທດ​ອັງກິດ ກ່າວ​ວ່າ ທະຫານ​ຄົນ​ນີ້​ຖືກ​ຍິງ​ຕາຍຫລັງ​ຈາກ​ມີ​ການ​ຊອກ​ຫາ​ຜູ້ກ່ຽວມາກ​ວ້າງຂວາງ​ນັ້ນ.

ໂຄສົກ​ກຸ່ມ​ຕາ​ລີ​ບັນ ​ໄດ້​ກ່າວ​ອ້າງ​ເອົາ​ຄວາມ​ຮັບຜິດຊອບ​ໃນ​ການ​ຈັບ​ກຸມ​ແລະ​ການ​ເສຍ​ຊີວິດ​ຂອງ​ທະຫານ​ຄົນ​ນີ້.

ຂ່າວ​ການ​ລັກ​ຈັບ​ໂຕ​ທະຫານ​ຄົນ​ນີ້​ມີ​ຂຶ້ນ​ໃນ​ຂະນະ​ທີ່​ນາຍົກລັດຖະມົນຕີ David Cameron ທໍາ​ການ​ເຄື່ອນ​ໄຫວ​ຢ້ຽມຢາມ​ອັຟກາ​ນີສຖານ​ຢູ່​ນັ້ນ.

ທ່ານ Cameron ​ເດີນທາງ​ໄປ​ຮອດ​ຄ້າຍ Bastion ​ໃນ​ແຂວງ Helmand ​ໃນ​ພາກ​ໃຕ້​ຂອງ​ອັຟກາ​ນີສຖານ ​ແຕ່​ຕໍ່​ມາ​ໄດ້​ລົບ​ລ້າງ​ແຜນການ​ໄປ​ຢ້ຽມຢາມ​ຖານ​ທັບ​ແຫ່ງ​ນຶ່ງ​ໃນ​ແຂວງ Lashkar Gah ເພື່ອ​ວ່າ​ທາງ​ກອງທັບ​ຈະ​ສາມາດ​ໃຊ້​ພວກ​ເຮືອບິນ​ເຮ​ລີ​ຄອບ​ເຕີ​ເຫລ່ົາ​ນັ້ນ​ໄປ​ຊອກ​ຫາ​ໂຕ​ທະຫານ​ຄົນ​ນັ້ນ.

XS
SM
MD
LG