ບັນດາເຈົ້າໜ້າທີ່ໃນພາກເໜືອອັຟການິສຖານກ່າວວ່າ ຜູ້ວາງລະເບີດສະລະຊີບທີ່ຂີ່ລົດຈັກ
ມາ ໄດ້ສັງຫານປະຊາຊົນຢ່າງໜ້ອຍ 13 ຄົນຮວມທັງທະຫານສະຫະລັດ 3 ຄົນ ແລະ
ຫຼາຍກວ່າ 25 ຄົນໄດ້ຮັບບາດເຈັບ.
ບັນດາເຈົ້າໜ້ທີ່ທ້ອງຖິ່ນກ່າວວ່າ ຜູ້ໂຈມຕີໄດ່ລະເບີດຕົນເອງ ໃນວັນພຸດວານນີ້ ໃນເມືອງ
Maimanah ເມືອງຫຼວງຂອງແຂວງ Faryab ໃນຂະນະທີ່ພວກທະຫານກໍາລັງຖ່າຍ
ພາບການສໍາພາດປະຊາຊົນຢູ່ ສວນສາທາລະນະແຫ່ງນຶ່ງ.
ກຸ່ມຕາລີບັນ ໄດ້ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້.
ມາຮອດປັດຈຸບັນໃນປີນີ້ ມີທະຫານນາໆຊາດຈໍານວນເກືອບ 100 ຄົນໄດ້ເສຍຊີວິດໃນ
ອັຟການິສຖານ. ຄວາມຮຸນແຮງຍັງດໍາເນີນສືບຕໍ່ໄປ ຂະນະທີ່ພວກກໍາລັງປະສົມໄດ້ເລີ້ມ
ຕົ້ນຖອນອອກຈາກອັຟການິສຖານ ແລະໂອນອໍານາດຄວາມຮັບຜິດຊອບດ້ານຄວາມ
ປອດໄພໃຫ້ແກ່ຝ່າຍທະຫານອັຟການິສຖານນັ້ນ.
ໃນວັນພຸດວານນີ້ເຊ່ນກັນ ປະທານາທິບໍດີ Hamid Karzai ແຫ່ງອັຟການິສຖານໄດ້
ພົບປະກັບນາຍພົນ James Mattis ຫົວໜ້າກອງບັນຊາການກອງທັບສະຫະລັດສໍາ
ລັບພາກຕາເວັນອອກກາງ ເພື່ອທໍາການໂອ້ລົມສົນທະນາກັນໃນຫຼາຍເລື້ອງ ຮວມທັງ
ເລື້ອງສະຖານະການໃນອັຟການິສຖານ ແລະຄວາມຕ້ອງການການສະໜັບສະໜຸນ
ຂອງນາໆຊາດສືບຕໍ່ໄປສໍາລັບກອງທັບແຫ່ງຊາດອັຟການິສຖານນັ້ນ.