ລິ້ງ ສຳຫລັບເຂົ້າຫາ

ທູດ ສຫລ ປະຈໍາ ອັຟການິສຖານ ຈະລາອອກ (ວີດີໂອ)

  • ສິງ ບູຣົມມະວົງ

ທ່ານ Ryan Crocker ເອກອັກຄະລັດຖະທູດສະຫະລັດປະຈໍາອັຟກາ ນີສຖານ. ວັນທີ 23 ພຶດສະພາ 2012.






















ທ່ານ Ryan Crocker ​ເອກ​ອັກຄະ​ລັດຖະທູດ​ສະຫະລັດ ​ປະ​ຈໍາອັຟກາ​ນິສຖານ​ ປະກາດ​ໃຫ້​ຮູ້ວ່າ ທ່ານ​ຈະລາ​ອອກ​ຈາກ​ຕໍາ​ແໜ່​ງ ພາຍ​ໃນ​ອີກ​ສອງ​ສາມ​ເດືອນ​ຂ້າງ​ໜ້າ​ນີ້ ​ຍ້ອນ​ເຫດຜົນ​ທາງ​ດ້ານ​ສຸຂະ​ພາບ.

ທ່ານ​ນາງ Victoria Nuland ​ໂຄສົກ​ປະ​ຈໍາ​ກະຊວງ​ການ​ຕ່າງປະ​ເທດ​ສະຫະລັດ ​ກ່າວ​ຢູ່​ໃນ​ຖະ​ແຫຼ​ງການ​ສະບັບ​ນຶ່ງ ​ໃນ​ວັນ​ອັງຄານ​ວານ​ນີ້​ວ່າ ເອກ​ອັກຄະ​ລັດຖະທູດ Ryan Crocker ຈະລາ​ອອກ​ຈາກ​ຕໍາ​ແໜ່​ງ ຂອງ​ທ່ານ​ຫຼັ​ງຈາກ​ກອງ​ປະຊຸມ​ບໍລິຈາກ​ເງິນຊ່ອຍ​ເຫຼືອ​ຂອງນາໆ​ຊາດ​ແກ່ ອັຟກາ​ນິສຖານ ​ທີ່​ກຸງ​ໂຕ​ກຽວ​ແລະ​ກຸງ​ຄາ​ບູລ​ແລ້ວ.

ທ່ານ​ນາງ Nuland ກ່າວ​ຕື່ມ​ວ່າ ການ​ດໍາລົງ​ຕໍາ​ແໜ່​ງຂອງ​ທ່ານ Crocker ​ໄດ້​ບັນລຸ​ຄວາມ​ສໍາ​ເລັດ​ຢ່າງ​ໃຫຍ່​ຫຼວງ ຊຶ່ງ​ທ່ານ​ນາງ​ໄດ້ເລົ່າເຖິງ​ຈຸດ​ສໍາຄັນ​ຕ່າງໆ​ຂອງ​ການ​ເຈລະຈາ ​ທີ່​ໄດ້​ບັນລຸ​ຜົນ​ສໍາ​ເລັດຂອງຂໍ້​ຕົກລົງ​ເປັນ​ພາຄີ​ດ້ານ​ຍຸດ​ທະ​ສາດ​ກັບອັຟກາ​ນິສຖານ ​ແລະກອງ​ປະ ຊຸມ​ສຸດ​ຍອດ​ຂອງ​ກຸ່ມ​ເນ​ໂຕ້​ ທີ່​ນະຄອນ Chicago ທີ່​ຫາກໍ​ປິດ​ລົງເມື່ອ​ຫວ່າງ​ໄວໆ​ມາ​ນີ້ ຊຶ່ງ​ໄດ້​ເວົ້າ​ເລື້ອງ​ອັຟກາ​ນິສຖານ​ແລະ​ເລື້ອງ​ອື່ນໆ​ນັ້ນ. ຍັງ​ບໍ່​ເປັນ​ທີ່​ຈະ​ແຈ້ງ​ເທື່ອ​ໃນ​ເວລາ​ນີ້ວ່າ ຜູ້​ໃດ​ຈະ​ໄປຮັບ​ຕຳ​ແໜ່​ງ​ແທນ​ທ່ານ Crocker ​ແຕ່​ບັນດາ​ເຈົ້າ​ໜ້າ​ທີ່​ສະຫະລັດ​ກ່າວ​ວ່າ ມີ​ທ່າ​ທາງວ່າ​ຜູ້​ທີ່​ຈະ​ໄປແທນ​ນັ້ນ​ອາດ​ຈະ​ແມ່ນ​ທ່ານ James Cunningham ຊຶ່ງ​ເວລາ​ນີ້​ເປັນ​ຮອງ​ເອກ​ອັກຄະ​ລັດຖະທູດ​ປະ​ຈໍາ​ກຸງ​ຄາ​ບູລນັ້ນ.

ຄໍາ​ປະກາດ​ນີ້​ມີ​ຂຶ້ນ​ນຶ່ງ​ມື້​ຫຼັງ​ຈາກ​ປະທານາທິບໍດີບາຣັກ ​ໂອ​ບາ​ມາ ປິດ​ກອງ​ປະຊຸມ​ສຸດ​ຍອດເປັນ​ເວລາ​ສອງ​ມື້ຂອງ​ກຸ່ມ​ເນ​ໂຕ້ ຊຶ່ງ​ໃນ​ລະຫວ່າງ​ການ​ປະຊຸມ​ກັນ​ນັ້ນ ພວກ​ສະມາຊິກ​ຂອງ​ພັນທະ​ມິດ​ໄດ້ເປັນ​ນໍ້າ​ນຶ່ງໃຈ​ດຽວ​ກັນ​ສະໜັບສະໜຸນ​ແຜນການ​ເພື່ອ​ຍຸດຕິ​ສົງຄາມ​ລົງ​ໃນ​ອັຟກາ​ນິສຖານແລະ​ໃຫ້​ອັຟກາ​ນິສຖານ​ເປັນ​ຜູ້​ກຳກັບ​ດ້ານ​ຄວາມ​ປອດ​ໄພ​ຂອງ​ຕົນເອງ​ພາຍ​ໃນ​ປີ 2014 ນັ້ນ.

XS
SM
MD
LG