ບັນດາເຈົ້າໜ້າທີ່ອັຟການິສຖານກ່າວວ່າ ຜູ້ວາງລະເບີດ
ສະລະຊີບຄົນນຶ່ງທີ່ຂີ່ລົດຈັກມາ ໄດ້ສັງຫານປະຊາຊົນ
ຢ່າງໜ້ອຍ 2 ຄົນໃນການໂຈມຕີທີ່ມີຂຶ້ນໃກ້ໆກັບລັດ
ຖະສະພາຂອງປະເທດໃນວັນພຸດມື້ນີ້.
ທ່ານ Zemarai Bashary ລັດຖະມຸນຕີກະຊວງພາຍໃນ
ຂອງອັຟການິສຖານກ່າວວ່າ ເຫດລະເບີດໃນນະຄອນ
ຫລວງຄາບູລ ເກີດຂຶ້ນຢູ່ໃກ້ໆກັບລົດຕູ້ນ້ອຍຄັນນຶ່ງ ທີ່
ບັນທຸກພວກກໍາລັງຮັກສາຄວາມປອດໄພອັຟການິສຖານ.
ກຸ່ມຕາລີບັນ ໄດ້ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ ຊຶ່ງນອກນັ້ນ ຍັງໄດ້ເຮັດໃຫ້ຜູ້ຄົນຢ່າງໜ້ອຍ 25 ຄົນໄດ້ຮັບບາດເຈັບ. ທາງການຂອງອັຟການິສຖານບໍ່ໄດ້ໃຫ້ການຖະແຫລງໃດໆໃນທັນທີກ່ຽວກັບວ່າພວກທີ່ໄດ້ຮັບບາດເຈັບລົ້ມຕາຍນີ້ແມ່ນຮວມທັງພວກພົນລະເຮືອນນໍາຫລືບໍ.
ປະທານາທິບໍດີ Hamid Karzai ແຫ່ງອັຟການິສຖານໄດ້ກ່າວປະນາມການໂຈມຕີດັ່ງກ່າວ ຊຶ່ງມີຂຶ້ນໃນຂະນະທີ່ຮອງປະທານາທິບໍດີ Joe Biden ແຫ່ງສະຫະລັດເສັດສິ້ນການຢ້ຽມ ຢາມອັຟການິສຖານນັ້ນ.
ທ່ານ Biden ທີ່ໄດ້ເດີນທາງໄປຢ້ຽມຢາມອັຟການິສຖານຊອກຫາມູນຄວາມຈິງໂດຍບໍ່ມີການປະກາດໃຫ້ຮູ້ລ່ວງໜ້າເພື່ອຊັ່ງຊາຕີລາຄາເບິ່ງຄວາມຄືບໜ້າໃນອັຟການິສຖານນັ້ນກ່າວວ່າ ທ່ານເຊື່ອວ່າ ທະຫານສະຫະລັດກັບກໍາລັງຮັກສາ ຄວາມປອດໄພໃນທ້ອງຖິ່ນພວມທັບມ້າງ ທຳລາຍການບຸກໂຈມຕີຂອງພວກກະ ບົດຕາລີບັນນັ້ນ.
