ບັນດາເຈົ້າໜ້າທີ່ອັຟການີສຖານກ່າວວ່າ ລະເບີດແຕກ
ໃນແຄມຖະໜົນລູກນຶ່ງໄດ້ເອົາຊີວິດພວກພົນລະເຮືອນ
15 ຄົນໃນພາກໃຕ້ຂອງປະເທດ. ທາງການອັຟການິສ
ຖານກ່າວໃນຕອນເຊົ້າວັນເສົາມື້ນີ້ວ່າ ການລະເບີດດັ່ງ
ກ່າວໄດ້ເກີດຂຶ້ນໃນວັນສຸກວານນີ້ໃນເມືອງ Khansheen ໃນແຂວງ Helmand.
ເວລານີ້ຍັງບໍ່ທັນມີຜູ້ໃດອ້າງເອົາຄວາມຮັບຜິດຊອບໃນການວາງລະເບີດຄັ້ງນີ້ເທື່ອ. ບັນດາເຈົ້າໜ້າທີ່ປະຈໍາແຂວງໄດ້ຖິ້ມໂທດການໂຈມຕີຄັ້ງນີ້ໃສ່ພວກຕາລີບັນ.
ໃນແຫ່ງອື່ນໆອີກ ລະເບີດແຮງສູງລູກນຶ່ງໄດ້ແຕກຖືກຂ້າງນອກຂອງກອງບັນຊາການຕໍາຫລວດແຫ່ງນຶ່ງໃນແຂວງກັນດາຮາໃນພາກໃຕ້ຂອງອັຟການິສຖານ ແຕ່ຍັງບໍ່ທັນໄດ້ຮັບຂ່າວກຽວກັບຄວາມເສຍຫາຍຜູ້ບາດເຈັບຫລືລົ້ມຕາຍເທື່ອ.
ແລະທີ່ແຂວງ Kunduz ໃນພາກເໜືອຂອງອັຟການິສຖານ ບັນດາເຈົ້າໜ້າທີ່ກ່າວວ່າ ຜູ້ວາງລະເບີດສະລະຊີບຄົນນຶ່ງທີ່ໃຊ້ລົດຕໍາຫລວດຄັນນຶ່ງໄດ້ເຮັດໃຫ້ທະຫານບາດເຈັບ 5 ຄົນແລະພວກພົນລະເຮືອນອີກຫລາຍຄົນ.
