ເຈົ້າໜ້າທີ່ອັຟການີສຖານກ່າວວ່າ ການໂຈມຕີເມືອງຫລວງກາບູລ ແລະອີກສາມແຂວງ
ເປັນເວລາເກືອບ 18 ຊົ່ວໂມງ ໂດຍພວກກຸ່ມຕາລິບານນັ້ນ ໄດ້ສິ້ນສຸດລົງໃນຕອນເຊົ້າວັນ
ຈັນມື້ນີ້ຫລັງຈາກກໍາລັງຮັກສາຄວາມປອດໄພທີ່ໜຸນຫລັງໂດຍຍົນເຮລິຄອບເຕີຂອງເນໂຕ້
ໄດ້ຍິງຖະຫລົ່ມຕຶກແຫ່ງນຶ່ງຢູ່ໃນກາບູລ ບ່ອນພວກຫົວຮຸນແຮງລີ້ຊ່ອນຢູ່ນັ້ນ.
ທ່ານ Besmillah Mohammad ລັດຖະມົນຕີກະຊວງພາຍໃນ ບອກບັນດາຜູ້ສື່ຂ່າວວັນ
ຈັນມື້ນີ້ວ່າ ພວກຫົວຮຸນແຮງ ຖືກຂ້າຕາຍ 36 ຄົນ ໃນລະ ຫວ່າງການໂຈມຕີ ທີ່ເລິ່ມຕົ້ນ
ມາເມື່ອວັນອາທິດວານນີ້ ທີ່ເມືອງຫລວງ ແລະອີກສາມຫົວເມືອງ. ທ່ານກ່າວອີກວ່າ
ກໍາລັງຮັກສາຄວາມປອດໄພ ເສຍຊີວິດແປດຄົນ ແລະພົນລະເຮືອນອີກສາມຄົນ.
ການປະກາດທີ່ວ່າ ການສູ້ລົບໄດ້ສິ້ນສຸດລົງ ແລະພວກຫົວຮຸນແຮງຖືກຂ້າຕາຍນັ້ນ ມີຂຶ້ນ
ຫລາຍໆຊົ່ວໂມງ ຫລັງຈາກພວກຊາວເມືອງກາບູລ ຕື່ນຂຶ້ນມາ ພົບກັບສຽງຍິງຕໍ່ສູ້ກັນ
ຢ່າງດຸເດືອດ ແລະສຽງລະເບີດແຕກ ເປັນມື້ທີ່ສອງ ໃນເຊົ້າມື້ນີ້.
ການໂຈມຕີຂອງພວກຫົວຮຸນແຮງໄດ້ແນເປົ້າໝາຍໃສ່ຕຶກສະພາແຫ່ງຊາດ ກອງບັນຊາ
ການເນໂຕ້ ແລະຄຸ້ມສະຖານທູດສະຫະລັດ ເຢຍຣະມັນແລະ ອັງກິດ. ລະເບີດສະຫລະ
ຊີບຫລາຍຄັ້ງໄດ້ແຕກຂຶ້ນຢູ່ໃນເມືອງຫລວງ ທີ່ຕິດຕາມມາດ້ວຍການລະດົມຍິງປືນແລະ
ຈະຫລວດ. ຄວັນກຸ້ມຂຶ້ນສູ່ທ້ອງຟ້າ ເວລາກໍາລັງທະຫານຮີບຮ້ອງແລ່ນລົງສູ່ຖະໜົນຫົນ
ທາງພ້ອມອາວຸດ. ຊາວບ້ານຊາວເມືອງພາກັນຫລົບລີ້ຢູ່ໃນເຮືອນ ແລະໄດ້ຍິນສຽງຫວໍ
ສຸກເສີນດັງກ້ອງ ຢູ່ທົ່ວເມືອງຫລວງ.
ນອກນີ້ແລ້ວພວກຫົວຮຸນແຮງຍັງໄດ້ໂຕມຕີສາມແຂວງທາງພາກຕາເວັນອອກ ອັນເປັນ
ພາກສ່ວນຂອງອັນທີ່ພວກເຂົາເອິ້ນວ່າ ການບຸກຍາມລະດູ ບານໃໝ່
ພວກກຸ່ມຕາລິບານ ໄດ້ອ້າງເອົາຄວາມຮັບຜິດຊອບຕໍ່ການໂຈມຕີເຫລົ່ານີ້.