ບັນດາຜູ້ມີສິດປ່ອນບັດ ໄດ້ພາກັນເຂົ້າແຖວ ຢູ່ຕາມໜ່ວຍປ່ອນບັດຕ່າງໆໃນທົ່ວປະເທດອັຟການິສຖານ ເພື່ອໃຊ້ສິດໃຊ້ສຽງ ຂອງພວກເຂົາເຈົ້າ ເຖິງແມ່ນໄດ້ມີການຂົ່ມຂູ່ຊ້ຳແລ້ວຊ້ຳອີກຈາກພວກຕາລີບານ ຮວມທັງການຂົ່ມຂູ່ຄັ້ງໃໝ່ໃນເຊົ້າວັນເສົາມື້ນີ້ ທີ່ວ່າ ພວກເຂົາອາດຈະໂຈມຕີໜ່ວຍປ່ອນບັດ.
ທີ່ນະຄອນຫຼວງກາບູລ ບັນດາຜູ້ມີສິດປ່ອນບັດ ແມ່ນມີນ້ຳສຽງ ແບບບໍ່ສະທ້ານຢ້ານກົວ.
ນາງຟາຣິບາ ຜູ້ມີສິດປ່ອນບັດໃນເຂດນະຄອນຫຼວງກາບູລ ກ່າວວ່າ “ພວກເຮົາບໍ່ຢ້ານການຂົ່ມຂູ່ດອກ ຍ້ອນພວກເຮົາຕ້ອງການຢາກສ້າງສາປະເທດຊາດຂອງພວກເຮົາ. ທຸກມື້ນີ້ ພວກເຮົາຖືກຂົ່ມຂູ່ຢູ່ເລື້ອຍໆ ແຕ່ພວກເຮົາກໍຍັງພາກັນມາທີ່ນີ້ ເພື່ອປ່ອນບັດ.”
ສ່ວນຢູ່ໃນເຂດອື່ນໆຂອງປະເທດນັ້ນ ເຈົ້າໜ້າທີ່ເບິ່ງຄືວ່າມີຄວາມເຊື່ອໝັ້ນ ກ່ຽວກັບມາດຕະການຄວາມປອດໄພທີ່ພວກເຂົາເຈົ້າຈັດຕັ້ງປະຕິບັດ.
ທ່ານໂມຮຳມັດ ຣາຊູລ ໂອມາ ຫົວໜ້າກຳມາທິການເລືອກຕັ້ງທີ່ເປັນອິດສະຫຼະ ຢູ່ເມືອງຄຸນດຸສ ກ່າວວ່າ “ມີການຈັດຕັ້ງມາດຕະການຄວາມປອດໄພຢູ່ທຸກບ່ອນ ພວກເຮົາໄດ້ມີການປະສານງານກັນເປັນຢ່າງດີກັບກຳລັງຮັກສາຄວາມສະຫງົບ” ເຖິງແມ່ນທາງການໄດ້ລາຍງານວ່າ ພວກຕາລີບານ ໄດ້ລັກຂະໂມຍເອົາອຸບປະກອນໃນການປ່ອນບັດໄປຈາກໜ່ວຍປ່ອນບັດຢ່າງໜ້ອຍນຶ່ງແຫ່ງຢູ່ໃນແຂວງດັ່ງກ່າວ ແລະພວກນັກຂ່າວທ້ອງຖິ່ນລາຍງານວ່າ ມີການຍິງຈະຫຼວດຈຳນວນນຶ່ງ ໂຈມຕີເຂດຕ່າງໆຢູ່ໃນແຂວງດັ່ງກ່າວກໍຕາມ.
ການປ່ອນບັດ ຊຶ່ງຕົ້ນຕໍມີກຳນົດຈະເລີ້ມໃນເວລາ 7 ໂມງເຊົ້າ ໄດ້ມີການຊັກຊ້າຢູ່ໃນບາງເຂດຂອງປະເທດ ບາງບ່ອນເປັນເວລາຫຼາຍຊົ່ວໂມງຊຶ່ງໄດ້ສ້າງຄວາມລຳຄານໃຫ້ແກ່ຜູ້ມີສິດປ່ອນບັດ ທີ່ພາກັນໄປເຂົ້າແຖວ ກ່ອນ 7 ໂມງເຊົ້າ.
ນາງຊາຮີລາ ຜູ້ມີສິດປ່ອນບັດຢູ່ນະຄອນຫຼວງກາບູລ ກ່າວວ່າ “ຂ້ອຍຟ້າວ ດັ່ງນັ້ນຂ້ອຍຈຶ່ງມາ 7 ໂມງເຊົ້າ ແຕ່ຈົນຮອດ 7 ໂມງເຄິ່ງແລ້ວ ພວກເຂົາເຈົ້າກໍຍັງບໍ່ທັນເລີ້ມການປ່ອນບັດ. ຂັ້ນຕອນດັ່ງກ່າວແມ່ນບໍ່ມີການຈັດຕັ້ງກັນເລີຍ.”
ຂັ້ນຕອນການປ່ອນບັດ ຢູ່ໃນອັຟການິສຖານ ໄດ້ມີການກ່າວຫາກັນຢ່າງກວ້າງຂວາງໂດຍພັກການເມືອງຕ່າງໆວ່າ ມີການສໍ້ໂກງຄະແນນ ແລະເຕັມໄປດ້ວຍ ຄວາມຮຸນແຮງ. ສອງມື້ກ່ອນການເລືອກຕັ້ງ ການໂຈມຕີຢູ່ເມືອງການດາຮາໄດ້ສັງຫານນາຍພົນອັບດູລ ຣາຊິກ ຜູ້ບັນຊາການຕຳຫຼວດທີ່ມີອິດທິພົນ ຊຶ່ງໄດ້ພາໃຫ້ມີການເລື່ອນເວລາໃນການປ່ອນບັດ ຢູ່ທີ່ແຂວງດັ່ງກ່າວນຶ່ງອາທິດ.
ນອກນັ້ນ ຍັງມີຜູ້ສະໝັກສິບກວ່າຄົນເສຍຊີວິດ ໃນການໂຈມຕີຫຼາຍໆຄັ້ງທົ່ວປະເທດ ພ້ອມໆກັບພວກສະໜັບສະໜຸນຜູ້ສະມັກອີກຫຼາຍສິບຄົນ ນັບແຕ່ໄດ້ມີການເລີ້ມຕົ້ນປະກາດຊື່ຜູ້ສະໝັກ ໃນທ້າຍເດືອນພຶດສະພາຜ່ານມາ.