ອົງການເນໂຕ້ກ່າວວ່າ ຕົນໄດ້ສັງຫານຜູ້ນຳອະວຸໂສຄົນນຶ່ງ ຂອງເຄືອຂ່າຍກຸ່ມກໍ່ການຮ້າຍ
Haqqani ຢູ່ໃນອັຟການິສຖານ ທີ່ສົງໄສວ່າ ເປັນຜູ້ໃຫ້ຄວາມຊ່ອຍເຫຼືອແກ່ພວກຫົວຮຸນ
ແຮງທີ່ບຸກໂຈມຕີໂຮງແຮມຢູ່ນະຄອນຫຼວງກາບູລໃນຕອນແລງຂອງວັນອັງຄານຜ່ານມານີ້.
ໃນຖະແຫຼງຂ່າວສະບັບນຶ່ງ ທີ່ນຳອອກເຜີຍແຜ່ໃນວັນພະຫັດມື້ນີ້ອົງການເນໂຕ້ກ່າວວ່າ ຕົນ
ໄດ້ສັງຫານນາຍ Ismail Jan ແລະພວກນັກລົບຂອງກຸ່ມ Haqqani ອີກຫຼາຍໆຄົນ ໃນ
ການໂຈມຕີທີ່ແຂວງ Paktiya ຢູ່ໃກ້ຊາຍແດນປາກິສຖານນັ້ນ. ຖະແຫຼງຂ່າວເວົ້າວ່າ ນາຍ
Jan ເປັນຮອງຜູ້ບັນຊາການຂອງເຄືອຂ່າຍກໍ່ການຮ້າຍ Haqqani ໃນອັຟການິສຖານແລະ
ເປັນຜູ້ນຳພາພວກນັກລົບຂອງກຸ່ມດັ່ງກ່າວ ທໍາການໂຈມຕີກຳລັງຮັກສາຄວາມສະຫງົບຂອງ
ອັຟການິສຖານ ແລະກຳລັງປະສົມນັບແຕ່ທ້າຍປີກາຍນີ້ເປັນຕົ້ນມາ.
ການບຸກໂຈມຕີແລະເຂົ້າຢຶດໂຮງແຮມ Inter-Continental ແບບທີ່ມີການປະສານງານກັນ
ຢ່າງດີເປັນເວລາ 5 ຊົ່ວໂມງຢູ່ທີ່ນະຄອນຫຼວງກາບູລ ໂດຍພວກຫົວຮຸນແຮງທີ່ປະກອບອາ
ວຸດເຕັມອັດຕານັ້ນ ໄດ້ສິ້ນສຸດລົງ ໃນຕອນເຊົ້າຂອງວັນພຸດວານນີ້ ຫຼັງຈາກພວກບຸກໂຈມຕີ
ທັງ 9 ຄົນ ລະເບີດຕົນເອງຕາຍ ຫຼືບໍ່ກໍໄດ້ຖືກສັງຫານໂດຍກຳລັງຂອງອັຟການິສຖານແລະ
ເນໂຕ້. ການໂຈມຕີໄດ້ເຮັດໃຫ້ 11 ຄົນເສຍຊີວິດຮວມທັງພວກຄົນງານໂຮງແຮມຊາວອັຟ
ການິສຖານ ເຈົ້າໜ້າທີ່ຕຳຫຼວດ ແລະແຂກຄົນນຶ່ງທີ່ເປັນຊາວສະເປນ.
ນອກນັ້ນຍັງມີອີກ 8 ຄົນໄດ້ຮັບບາດເຈັບ. ອົງການເນໂຕ້ໄດ້ຖິ້ມໂທດການບຸກໂຈມຕີໃນຄັ້ງ
ນີ້ໃສ່ເຄືອຂ່າຍ Haqqani ທີ່ເນໂຕ້ກ່າວວ່າໄດ້ດຳເນີນງານຮ່ວມກັນກັບກຸ່ມຫົວຮຸນແຮງທາ
ລີບານແລະກຸ່ມທາລີບານກໍໄດ້ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້.
