ອົງການເນໂຕ້ກ່າວວ່າ ສົບຂອງທະຫານເຮືອອະເມຣິກັນຄົນນຶ່ງ ໃນຈຳນວນ 2 ຄົນ ທີ່ຫາຍສາບສູນໄປ ໃນພາກ ຕາເວັນອອກອັຟການິສຖານນັ້ນ ໄດ້ຖືກພົບເຫັນແລ້ວ.
ຖະແຫຼງຂ່າວສະບັບນຶ່ງ ທີ່ອອກໂດຍກຳລັງປະສົມ ພາຍໃຕ້ການນຳພາ ຂອງສະຫະລັດ ໃນວັນອັງຄານມື້ນີ້ ກ່າວວ່າ ສົບຂອງທະຫານເຮືອຄົນນີ້ ໄດ້ຖືກພົບເຫັນ ຫຼັງຈາກມີການ ຊອກຄົ້ນຫາ ຢ່າງຂຸ້ນຂ້ຽວ. ອົງການເນໂຕ້ກ່າວວ່າ ການປະຕິບັດງານຄົ້ນຫາ ຈະດຳເນີນຕໍ່ໄປ ຈົນກວ່າຈະພົບເຫັນ ທະຫານທີ່ຫາຍສາບ ສູນໄປອີກຄົນນຶ່ງ.
ທະຫານທັງສອງຄົນ ໄດ້ຫາຍສາບສູນໄປ ທີ່ແຂວງ LOGAR ໃນພາກຕາເວັນອອກ ຂອງ ອັຟການິສຖານ ໃນມື້ວັນສຸກແລ້ວ ຫຼັງຈາກພວກເຂົາເຈົ້າ ໄດ້ເຂົ້າໄປໃນເຂດທີ່ຮູ້ກັນ ດີວ່າ ເປັນທີ່ໝັ້ນອັນເຂັ້ມແຂງ ຂອງພວກກະບົດ.
ກ່ອນໜ້ານີ້ ກຸ່ມຕາລີບານກ່າວວ່າ ພວກຕົນໄດ້ສັງຫານ ທະຫານເຮືອຄົນນຶ່ງ ແລະຈັບໄດ້ອີກຄົນນຶ່ງ.
ຖະແຫຼງຂ່າວຂອງອົງການເນໂຕ້ ບໍ່ໄດ້ລະບຸວ່າ ທະຫານອະເມຣິກັນ ຄົນທີ່ຖືກຂ້າຕາຍນັ້ນແມ່ນໃຜ ແຕ່ໜັງສືພິມ DENVER POST ໃນລັດໂຄໂລຣາໂດແຈ້ງວ່າ ສະມາຊິກ ສະພາຂອງລັດຄົນນຶ່ງ ໄດ້ລະບຸວ່າ ຜູ້ກ່ຽວແມ່ນທ້າວ JUSTIN McNELEY ອາຍຸ 30 ປີ.
ສະມາຊິກສະພາຂອງລັດທ່ານນີ້ ກ່າວຕໍ່ໜັງສືພິມ DENVER POST ວ່າ ທ້າວ McNELEY ເປັນລູກຊາຍ ຂອງນ້ອງພັນລະຍາທ່ານ.
