ຜູ້ນຳຄົນໃໝ່ຂອງກຸ່ມກະບົດຕາລິບັນ ໃນອັຟການິສຖານ ໄດ້ປະຕິ
ເສດຕໍ່ການເຈລະຈາສັນ ຕິພາບກັບລັດຖະບານ ນອກຈາກວ່າ
ລັດຖະບານຍອມຍົກເລີກຂໍ້ຕົກລົງດ້ານຄວາມປອດໄພກັບທັງ
ສະຫະລັດແລະອົງການເນໂຕ ແລະຖອນກອງກຳລັງຂອງຕ່າງ
ປະເທດທັງໝົດ ອອກຈາກປະເທດ.
ໃນຖະແຫຼງການ ເນື່ອງໃນຂີດໝາຍເທດສະການຂອງສາສະໜາ
ອິສລາມທີ່ເອິ້ນວ່າ Eid-ul-Adha. ທ່ານ Mullah Akthar
Mansoor ໄດ້ທຳການຮຽກຮ້ອງອີກຄັ້ງນຶ່ງຂອງກຸ່ມດັ່ງກ່າວທີ່ຢາກ
ໃຫ້ຖອນກອງກຳລັງຂອງຕ່າງປະເທດທັງໝົດ ອອກຈາກປະເທດນັ້ນ.
ທ່ານໄດ້ກ່າວວ່າ: “ຖ້າຫາກວ່າລັດຖະບານກາບູລ ຕ້ອງການທີ່ຈະຍຸດຕິສົງຄາມ ແລະສ້າງສັນຕິກັບຢູ່ໃນປະເທດ ນັ້ນແມ່ນເປັນໄປໄດ້ ດ້ວຍການຍຸຕິການຍຶດຄອງ ແລະຍົກເລີກຂໍ້ຕົກ ລົງທາງທະຫານແລະທາງດ້ານຄວາມປອດໄພກັບພວກບຸກລຸກ ດັ່ງກ່າວ.”
ການປະຕິບັດງານສູ້ລົບຂອງອົງການເນໂຕ ໄດ້ສິ້ນສຸດລົງໃນທ້າຍປີກາຍນີ້ ແຕ່ວ່າກາບູລ
ໄດ້ລົງນາມໃນຂໍ້ຕົກລົງອີກອັນນຶ່ງຕ່າງຫາກກັບສະຫະລັດແລະກອງກຳລັງປະສົມຮ່ວມ
ຂອງຕ່າງປະເທດ ເພື່ອໃຫ້ສືບຕໍ່ ດຳເນີນງານໃນການຝຶກແອບ ແລະໃຫ້ການແນະນຳປຶກສາທາງດ້ານທະຫານ ໃນອັຟການິສຖານ ຊຶ່ງມີທະຫານປະມານ 14 ພັນຄົນ ຊຶ່ງສ່ວນໃຫຍ່ແມ່ນອາເມຣິກັນ.
ທ່ານ Mansoor ໄດ້ເຕືອນວ່າ “ການກົດດັນຂອງຕ່າງປະເທດ” ຈະບໍ່ສາມາດຊ່ອຍແກ້ໄຂ
ຫຍັງໄດ້ໃນບັນຫາຂັດແຍ້ງຢູ່ໃນອັຟການິສຖານ “ແຕ່ມັນກັບຈະສ້າງບັນຫາຢ່າງອື່ນຂຶ້ນ.” ທ່ານບໍ່ໄດ້ລະບຸວ່າເປັນປະເທດໃດ ແຕ່ວ່າ ປະເທດເພື່ອນບ້ານ Pakistan ບ່ອນທີ່ສະມາຊິກຂອງກຸ່ມກໍ່ການຮ້າຍຕາລິບັນ ໄດ້ລີ້ຊ້ອນຢູ່ນັ້ນ ໃນບໍ່ເທົ່າໃດເດືອນໝໍ່ໆມານີ້ ໄດ້ກົດດັນເພີ້ມ
ຂຶ້ນ ຕໍ່ພວກກະບົດ ເຂົ້າພົວພັນໃນການເຈລະຈາສັນຕິພາບກັບ ລັດຖະບານທ້ອນໂຮມຊາດຂອງປະທານາທິບໍດີ Ashraf Ghani ໃນນະຄອນຫຼວງກາບູລ.
ໃນເດືອນກໍລະກົດຜ່ານມານີ້ ຜູ້ຕາງໜ້າຂອງກຸ່ມຕາລິບັນ ໄດ້ພົບປະກັນແບບເຊິ່ງໜ້າກັນ
ເປັນຄັ້ງທຳອິດ ກັບຜູ້ແທນຂອງລັດຖະບານອັຟການິສຖານ ໃນຮອບ 14 ປີ ໂດຍພາໃຫ້ມີ
ຄວາມຫວັງ ຕໍ່ການສ້າງຄວາມປອງດອງຊາດໃນອັຟການິສຖານ. ເຖິງຢ່າງນັ້ນກໍຕາມຕິດ
ຕາມມາ ຫຼັງຈາກການເຈລະຈາກັນໃນນະຄອນ Islamabad ແລ້ວນັ້ນ ກໍໄດ້ມີການເປີດເຜີຍວ່າ ຜູ້ນຳສູງສຸດຂອງກຸ່ມຕາລິບັນ Mullah Omar ໄດ້ເສຍຊີວິດເມື່ຶອ 2 ປີກ່ອນໜ້ານີ້ ໄດ້ໂຈະ
ການເຈລະຈາໂດຍບໍ່ມີກຳນົດ.