ຕຳຫລວດ ໃນພາກຕາເວັນອອກສຽງໃຕ້ ຂອງອັຟການິສຖານ
ກ່າວວ່າ ເຮລິຄອບເຕີ້ຂອງອາເມຣິກາຫຼາຍລຳ ໄດ້ຖິ້ມລະເບີດ
ໃສ່ດ່ານຮັກສາຄວາມປອດໄພຢູ່ເຂດນອກເມືອງ ເມື່ອຕອນເຊົ້າ
ວັນຈັນມື້ນີ້ ແລະໄດ້ສັງຫານທະຫານອັຟການິສຖານ ຢ່າງນ້ອຍ
8 ຄົນ ແລະ ເຮັດໃຫ້ອີກຈຳນວນໜຶ່ງບາດເຈັບ ໃນອັນທີ່ປາກົດວ່າ
ເປັນເຫດການທີ່ເອີ້ນວ່າ “ການຫຼົງຍິງໃສ່ຝ່າຍດຽວກັນ.”
ເຫດການຮ້າຍແຮງເຖິງແກ່ຊີວິດ ດັ່ງກ່າວ ເກີດຂຶ້ນ ໃນເມືອງ
Baraki Barak ຂອງແຂວງ Logar ທີ່ຕັ້ງຢູ່ 50 ກິໂລແມັດທາງ
ພາກຕາເວັນອອກ ຂອງນະຄອນຫຼວງ Kabul.
ຜູ້ບັນຊາການຕຳຫລວດແຂວງ ທ່ານ Mohammad Daoud Ahmadi ກ່າວຕໍ່ສື່ຂ່າວ
ໃນທ້ອງຖິ່ນ ວ່າ ການໂຈມຕີທາງອາກາດ ໂດຍກຸ່ມແນວໂຮມນາໆຊາດ ໃນອັຟການິສຖານ
ນັ້ນ ແມ່ນເປັນການເຂົ້າໃຈຜິດ ໃນການໂຈມຕີ ດ່ານຮັກສາຄວາມປອດໄພຢູ່ເຂດນອກເມືອງ ຂອງກອງທັບແຫ່ງຊາດອັຟການິສຖານ ແລະກ່າວວ່າ ເປົ້າໝາຍທີ່ສົງໃສວ່າ ແມ່ນຕັ້ງຢູ່ປະມານ ກິໂລແມັດໜຶ່ງ ໃນບໍລິເວນດຽວກັນນັ້ນ.
ບັນດາເຈົ້າໜ້າທີ່ສະຫະລັດ ກ່າວວ່າ ພວກເຂົາເຈົ້າ ຮັບຮູ້ເຫດການດັ່ງກ່າວ ແລະ ເລີ້ມຕົ້ນການສືບສວນສອບສວນ ແຕ່ບໍ່ໄດ້ໃຫ້ຄຳເຫັນ ຫຍັງກ່ຽວກັບຄວາມເສຍຫາຍທີ່ເກີດຈາກລະເບີດນັ້ນ.
