ປະທານາທິບໍດີອັຟການິສຖານ ທ່ານ Ashraf Ghani ໃນຂະນະ
ນີ້ ພວມຢູ່ທີ່ນະຄອນຫລວງອິສລາມາບັດ ຊຶ່ງເປັນການເດີນທາງ
ໄປຢ້ຽມຢາມ ປາກິສຖານ ຢ່າງເປັນທາງການເທື່ອທຳອິດ ຕັ້ງແຕ່
ທ່ານໄດ້ດຳລົງຕຳແໜ່ງ.
ທ່ານ Ghani ຈະພົບປະກັບ ນາຍົກລັດຖະມົນຕີປາກິສຖານ
ທ່ານ Nawaz Sharif ແລະປະທານາທິບໍດີປາກິສຖານ ທ່ານ
Mammon Hussain ໃນລະຫວ່າງການຢ້ຽມຢາມຄັ້ງນີ້.
ຜູ້ສື່ຂ່າວວີໂອເອ ປະຈຳນະຄອນອິສລາມາບັດ ກ່າວວ່າ ຜູ້ນຳ
ອັຟການິສຖານ ຈະພົບປະກັບທ່ານ Sharif ໃນວັນເສົາມື້ອື່ນນີ້ ຫຼັງຈາກນັ້ນ ຜູ້ນຳທັງສອງ
ຈະຮ່ວມກັນຈັດກອງປະຊຸມຖະແຫຼງຂ່າວ.
ໂທລະພາບທາງການປາກິສຖານ ລາຍງານວ່າ ທ່ານ Ghani ຈະໄປຢ້ຽມຢາມກອງບັນຊາ
ການກອງທັບປາກິສຖານ ຢູ່ທີ່ນະຄອນ Rawalpindi ໃນວັນສຸກມື້ນີ້. ນອກນັ້ນ ຍັງມີການ
ລາຍງານໃຫ້ຊາບ ກ່ຽວກັບການປະຕິບັດການຕໍ່ຕ້ານພວກກໍ່ການຮ້າຍ ທີ່ພວມດຳເນີນຢູ່
ໃນເຂດຊົນເຜົ່າປາກິສຖານ ໃກ້ໆກັບຊາຍແດນອັຟການິສຖານ.
ທ່ານ Abdul Ali Mohammed ທີ່ປຶກສາທາງດ້ານກົດໝາຍ ຂອງທ່ານ Ghani ກ່າວວ່າ
ການສົນທະນາຫາລືກ່ຽວກັບ “ສັນຕິພາບແລະ ຄວາມໝັ້ນຄົງ” ຈະເປັນຫົວຂໍ້ຄອບງຳ ໃນ
ລະຫວ່າງການຢ້ຽມຢາມປະເທດເພື່ອນບ້ານ ຂອງປະທານາທິບໍດີອັຟການິສຖານ.
ທ່ານ Mohammed ກ່າວວ່າ ແນວຄິດ ທີ່ລັດຖະບານປາກິສຖານ ຫຼາຍໆສະໄໝຕໍ່ເນື່ອງກັນ ໄດ້ພະຍາຍາມເຮັດໃຫ້ອັຟການິສຖານ “ອ່ອນແອລົງ” ນັ້ນ ຊຶ່ງມັນໄດ້ເຮັດໃຫ້ຄວາມສຳພັນ ກັບປາກິສຖານກາຍເປັນເລື້ອງ ທີ່ຂົມຂື່ນ ມາດົນນານແລ້ວ.
