ທະຫານ ອັຟການິສຖານ ໄດ້ຍຶດເອົາຄືນຫຼາຍພາກສ່ວນຂອງ ເມືອງ Kunduz ຈາກພວກນັກຮົບ ຕາລີບານ ໃນຕອນເຊົ້າຂອງວັນພະຫັດມື້ນີ້ ຫຼັງຈາກບັນດາເຈົ້າໜ້າທີ່ໄດ້ອະທິບາຍວ່າເປັນການຕໍ່ສູ້ທີ່ດຸເດືອດ.
ທ່ານ Abdul Rauf Ibrahimi ໂຄສົກສະພາຕ່ຳໄດ້ກ່າວຕໍ່ບັນດາຜູ່ສື່ຂ່າວໃນນະຄອນຫຼວງ Kabul ວ່າ ທະຫານລັດຖະບານ ໄດ້ທຳການບຸກຄືບໜ້າເຂົ້າໄປໃນເມືອງ Kunduz, ແຕ່ບໍໍ່ໄດ້ລະບຸວ່າພວກເຂົາເຈົ້າໄດ້ຄວບຄຸມເມືອງດັ່ງກ່າວແລ້ວຫຼືບໍ່.
ທ່ານ Ibrahimi ໄດ້ກ່າວວ່າ “ປະຈຸບັນນີ້ການຕໍ່ສູ້ກັນແມ່ນກຳ ລັງດຳເນີນຢູ່ໃນເມືອງ Kunduz ແລະ ມັນກໍຍາກທີ່ຈະເວົ້າໄດ້ວ່າ ພາກສ່ວນໃດແມ່ນຖືກຄວບຄຸມໂດຍລັດຖະບານຂອງພວກເຮົາ ແລະ ພາກສ່ວນໃດຍັງເປັນຂອງສັດຕູຢູ່.” ທ່ານໄດ້ກ່າວເພີ່ມເຕີມວ່າ “ການບຸກຄືບໜ້າ ແລະ ການຖອນກຳລັງແມ່ນສ່ວນໜຶ່ງຂອງການເຮັດສົງຄາມ.”
ໂຄສົກກະຊວງພາຍໃນທ່ານ Sediq Sediqqi ໄດ້ກ່າວຕໍ່ວີໂອເອວ່າ ທະຫານອັຟການິສຖານ ໄດ້ເປີດການໂຈມຕີໃນຄືນແລ້ວນີ້ ແລະ ວ່າມັນ “ປະສົບຄວາມສຳເລັດຫຼາຍ.”
ທ່ານໄດ້ກ່າວວ່າ “ໃນລະຫວ່າງການປະຕິບັດການ, ພວກ ຕາລີບານ ຫຼາຍຄົນໄດ້ຖືກຂ້າຕາຍໂດຍກຳລັງຮັກສາຄວາມປອດໄພ ອັຟການິສຖານ. ຕອນນີ້ພວກເຮົາກຳ ລັງສຸມໃສ່ການຊ່ວຍເຫຼືອປະຊາຊົນໃນເມືອງ Kunduz ແລະ ໃນເວລາດຽວກັນກໍຮັບປະກັນວ່າພວກ ຕາລີບານ ຈະບໍ່ສາມາດສ້າງບັນຫາຄວາມປອດໄພໃນບໍລິເວນນີ້ອີກ.”
ປະຊາຊົນໃນເມືອງ Kunduz ໄດ້ກ່າວຕໍ່ບັນດານັກຂ່າວໃນຕອນເຊົ້າຂອງວັນພະຫັດມື້ນີ້ວ່າ ກຳລັງຮັກສາຄວາມປອດໄພ ອັຟການິສຖານ ໄດ້ເຂົ້າຄວບຄຸມເມືອງດັ່ງກ່າວແລ້ວ.
ແຕ່ວ່າພວກ ຕາລີບານ, ເຊິ່ງໄດ້ເຂົ້າຍຶດເອົາເມືອງ Kunduz ໃນວັນຈັນທີ່ຜ່ານມາໄດ້ຢືນຢັນວ່າ ນັກຕໍ່ສູ້ຂອງພວກເຂົາແມ່ນຍັງຄວບຄຸມເມືອງຢູ່. ໂຄສົກ Zabihullah Mujahid ຂອງກຸ່ມ ຕາລີບານ ໄດ້ກ່າວວ່າ ກຳລັງຮັກສາຄວາມປອດໄພ ອັຟການິສຖານ ໄດ້ຍຶດຄືນເມືອງ Kunduz ໃນໄລຍະສັ້ນໆ ແຕ່ກໍອ້າງວ່າ ໄດ້ຖືກຕີຄືນ ແລະ ອີກເທື່ອໜຶ່ງເມືອງດັ່ງກ່າວໄດ້ຕົກຢູ່ພາຍໃຕ້ການຄວບຄຸມຂອງພວກ ຕາລີບານ.
