ກຸ່ມກໍ່ການຮ້າຍ Taliban ໄດ້ປະຕິເສດວ່າບໍ່ມີຄວາມຈິງຕາມລາຍງານທີ່ວ່າມີການປະຊຸມລັບກັບ ບັນດາເຈົ້າໜ້າທີ່ລັດຖະບານອັຟການິສຖານ ເນັ້ນໜັກວ່າບໍ່ມີການປ່ຽນແປງໃນນະໂຍບາຍຂອງກຸ່ມໃນການຈັດໃຫ້ມີການເຈລະຈາ.
ໜັງສືພິມ The Guardian ລາຍງານຂ່າວພິເສດທີ່ໄດ້ເຜີຍແຜ່ໃນວັນອັງຄານວານນີ້ ທີ່ ອ້າງຄຳເວົ້າ ວ່າບັນດາເຈົ້າໜ້າທີ່ອັຟການິສຖານຜູ້ບໍ່ປະສົງອອກຊື່
ແລະແຫລ່ງຂ່າວພາຍໃນກຸ່ມ Taliban ຢືນຢັນວ່າຢ່າງໜ້ອຍໄດ້ມີການພົບປະກັນສອງຄັ້ງ ລະຫວ່າງຄູ່ສັດຕູທັງສອງຝ່າຍໃນເດືອນກັນຍາທີ່ຜ່ານມາ ແລະຕົ້ນເດືອນຕຸລານີ້. ລາຍງານນັ້ນກ່າວວ່າ ການປະຊຸມກັນໄດ້ເກີດຂຶ້ນຢູ່ນະຄອນ Doha ເມືອງເອກຂອງປະເທດ Qatar ບ່ອນທີ່ບັນດານັກເຈລະຈາການເມືອງ Taliban ຕັ້ງທີ່ໝັນຢູ່ທີ່ນັ້ນ.
ແຫລ່ງຂ່າວແຫ່ງນຶ່ງພາຍໃນລັດຖະບານອັຟການິສຖານ ໃນນະຄອນ Kabul ກໍຍັງໄດ້ຢືນຢັນເຖິງການປະຊຸມນີ້ເຊັ່ນກັນ ຕໍ່ ວີໂອເອ ໂດຍປາດສະຈາກການແບ່ງປັນລາຍລະອຽດໃດໆເພີ້ມເຕີມ.
ໂຄສົກປະທານາທິບໍດີອັຟການິສຖານ ທ່ານ Dawa Khan Nenapal ບໍ່ໄດ້ກ່າວໂດຍກົງກ່ຽວກັບການປະຊຸມຢູ່ນະຄອນ Doha ແຕ່ໄດ້ກ່າວຕໍ່ ວີໂອເອ ວ່າ ລັດຖະບານກຳລັງປະ ຕິບັດ “ທຸກສິ່ງຢ່າງທີ່ເປັນໄປໄດ້” ໃນການພົວພັນກັບບັນດາກຸ່ມທີ່ຕຽມພ້ອມກັບການສົນ ທະນາສັນຕິພາບ” ເພື່ອວ່າຈະສົ່ງເສີມສະຖຽນລະພາບຢູ່ໃນປະເທດ.
ຫົວໜ້າສືບລັບອັຟການິສຖານ ທ່ານ Mohammad Masoon Stanekzai ລາຍງານວ່າໄດ້ນຳພາການສົນທະນາກັບ ທ່ານ Mullah Abdull Manan Akhund ອ້າຍຂອງຜູ້ກໍ່ຕັ້ງກຸ່ມ Taliban ທີ່ີໄດ້ເສຍຊີວິດໄປນັ້ນ ແລະຜູ້ນຳທີ່ຍາວນານ ທ່ານ Mullah Omar.
ໂຄສົກພວກຫົວຮຸນແຮງທີ່ສຳຄັນ ທ່ານ Zabihullah Mauahid ກ່າວໃນຕອນແລງວັນອັງຄານວານນີ້ວ່າ “ພວກເຮົາປະຕິເສດຢ່າງແຂງຂັນເຖິງລາຍງານກ່ຽວກັບການປະຊຸມນີ້ ແລະການສົນທະນາໃດໆ. ບັນດາຜູ້ຕາງໜ້າ Islamic Emirate (the Taliban) ບໍ່ໄດ້ພົບກັບ ທ່ານ Stanekzai ຫລືບັນດາເຈົ້າໜ້າທີ່ໃດໆຂອງລະບອບ Kabul”
