ມີການລາຍງານຫຼ້າສຸດ ກ່ຽວກັບການປະທະກັນໃນວັນອັງຄານມື້ນີ້ ໃນເມືອງ Kunduz ຢູ່ທາງພາກເໜືອຂອງປະເທດ ອັຟການິສຖານ, ເຊິ່ງ ກຳລັງຮັກສາຄວາມປອດໄພ ທີ່ອ້ອມຕົວເມືອງໄດ້ເລີ່ມ ພະຍາຍາມທີ່ຈະຍາດເອົາການຄວບຄຸມ ຈາກພວກຕາລີບານ. ຖະແຫຼງ ການສະບັບໜຶ່ງຈາກກະຊວງປ້ອງກັນປະເທດຂອງ ອັຟການິສຖານ ໄດ້ກ່າວວ່າ ບັນດາ ທະຫານໄດ້ຍຶດເອົາຄືນກອງ ບັນຊາການໃຫຍ່ຕຳຫຼວດ ແລະ ຄຸກຂອງເມືອງ, ໃນຂະນະທີ່ ອົງການ NATO ໄດ້ກ່າວວ່າ ທະຫານສະຫະລັດ ໄດ້ທຳການໂຈມຕີທາງອາກາດ ໃນຂົງເຂດດັ່ງກ່າວດ້ວຍ.
ໂຄສົກອົງການ NATO ພັກເອກ Brian Tribus ໄດ້ກ່າວວ່າ ການໂຈມຕີດັ່ງກ່າວໄດ້ຖືກມີ ຂຶ້ນ “ເພື່ອກຳຈັດໄພຂົ່ມຂູ່ຕໍ່ພັນທະມິດ ແລະ ທະຫານ ອັຟການິສຖານ” ຢູ່ອ້ອມຮອບເມືອງ Kunduz.
ການໂຈມຕີຂອງພວກ ຕາລີບານ ໃນວັນຈັນວານນີ້ ແມ່ນເປັນຄັ້ງທຳອິດທີ່ພວກຕໍ່ຕ້ານລັດຖະບານ ໄດ້ຍຶດຫົວເມືອງສຳຄັນແຫ່ງນີ້ ນັບຕັ້ງແຕ່ພວກເຂົາໄດ້ຖືກຂັບໄລ່ອອກຈາກການກຳອຳນາດໃນປີ 2001, ຊຶ່ງໄດ້ພາໃຫ້ມີຄວາມຕົກໃຈ ແລະການກ່າວປະນາມຈາກບັນດາເຈົ້າໜ້າທີ່ ອັຟການິສຖານ ແລະ ສະຫະປະຊາຊາດ.
ໂຄສົກກະຊວງສະທາລະນະສຸກ ອັຟການິສຖານ ທ່ານ Wahidullah Mayar ໄດ້ສົ່ງຂໍ້ຄວາມຜ່ານສື່ສັງຄົມ Twitter ໃນວັນອັງຄານມື້ນີ້ວ່າ ໂຮງໝໍໃນເມືອງ Kunduz ໄດ້ຮັບເອົາ ສົບຄົນຕາຍ 16 ຄົນ ແລະຜູ້ ໄດ້ຮັບບາດເຈັບອີກ 172 ຄົນ ຕັ້ງແຕ່ການຕໍ່ສູ້ກັນໄດ້ເລີ່ມ ຂຶ້ນ.
ພ້ອມກັນນັ້ນໃນວັນອັງຄານມື້ນີ້, ໂຄສົກຂອງກຸ່ມ ຕາລີບານ ໃນອັຟການິສຖານ ໄດ້ອ້າງວ່າ ນັກຮົບຂອງພວກເຂົາໄດ້ຍຶດເອົາດິນແດນຕື່ມອີກ, ໂດຍສາມາດຕີເອົາເມືອງ Ishkamish ແລະ Yangi Qala ໃນແຂວງ Takhar ທີ່ຢູ່ຕິດກັນນັ້ນ.
