ນັກການທູດອະວຸໂສທ່ານນຶ່ງຂອງອັຟການິສຖານກ່າວວ່າ ທ່ານ
ຍັງສືບຕໍ່ມີຄວາມຫວັງໄປໃນແງ່ດີທີ່ວ່າ ການເຈລະຈາສັນຕິພາບ
ກັບພວກຕາລີບານ ຈະເລີ້ມຂຶ້ນໃນບໍ່ເທົ່າໃດມື້ຂ້າງໜ້ານີ້ ໂດຍບໍ່
ໄດ້ໃຫ້ຄວາມສຳຄັນໃດໆ ຕໍ່ການຄາດຄະເນຂອງເຈົ້າໜ້າທີ່ບາງ
ຄົນທີ່ວ່າ ອາດຈະມີການຊັກຊ້ານັ້ນ.
ເອກອັກຄະລັດຖະທູດ ອັຟການິສຖານ ປະຈຳປາກິສຖານ ທ່ານ
Hazrat Omer Zakhilwal ກ່າວຕໍ່ວີໂອເອໃນວັນສຸກວານນີ້ວ່າ
ມີຫລາຍສິ່ງຫຼາຍຢ່າງໄດ້ເກີດຂຶ້ນຢູ່ໃນຂັ້ນພື້ນຖານເພື່ອໃຫ້ການ
ເຈລະຈາເລີ້ມຂຶ້ນ. ທ່ານກ່າວວ່າ ແຜນການທີ່ຈະເລີ້ມການເຈລະ
ຈາໃນອາທິດທຳອິດຂອງເດືອນມີນາແມ່ນໄດ້ຊີ້ໃຫ້ເຫັນວ່າແຜນ
ການດັ່ງກ່າວຍັງຈະດຳເນີນຕໍ່ໄປ.
ແຕ່ເຈົ້າໜ້າທີ່ຮັກສາຄວາມສະຫງົບ ຂອງປາກິສຖານ ທີ່ຮູ້ເລື້ອງດີ ກ່ຽວກັບການດຳເນີນ
ຄວາມພະຍາຍາມຂອງອິສລາມາບັດ ກຳລັງຊັກຊວນໃຫ້ຫ້ອງການຜູ້ຕາງໜ້າທາງການ
ເມືອງຂອງກຸ່ມຕາລີບານທີ່ມີສຳນັກງານຢູ່ກາຕ້າສົ່ງຜູ້ໃດຜູ້ນຶ່ງໄປຮ່ວມ ໂດຍກ່າວວ່າ ມາ
ຮອດປັດຈຸບັນນີ້ຍັງບໍ່ທັນມີຄວາມຄືບໜ້າໃດໆເທື່ອ.
ເຈົ້າໜ້າທີ່ໆຂໍສະຫງວນຊື່ທ່ານນີ້ ກ່າວຕໍ່ວີໂອເອວ່າ ການເຈລະຈາຈະບໍ່ມີຂຶ້ນໃນອາທິດ
ນີ້ ຍ້ອນວ່າ ຍັງບໍ່ມີຜູ້ໃດຈາກຝ່າຍຕາລີບານໄດ້ຕົກລົງທີ່ຈະເດີນທາງໄປຍັງນະຄອນອິສ
ລາມາບັດ.
ໂຄສົກຄົນນຶ່ງຂອງກຸ່ມຕາລີບານກ່າວໃນອາທິດແລ້ວນີ້ວ່າ ທ່ານບໍ່ຮູ້ເລື້ອງຫຍັງເລີຍກ່ຽວ
ກັບແຜນການເຈລະຈາກັບລັດຖະບານອັຟການິສຖານ.
ເປັນທີ່ຄາດກັນວ່າ ການເຈລະຈາສີ່ຝ່າຍ ແມ່ນຈະພົວພັນກັບພວກນັກການທູດຂອງອັຟ
ການິສຖານ ປາກິສຖານ ຈີນ ແລະສະຫະລັດ ຕະຫຼອດທັງພວກຜູ້ຕາງໜ້າຂອງກຸ່ມຕາລີ
ບານນຳດ້ວຍ.
ໃນການໂອ້ລົມທາງວີດີໂອກັບປະທານາທິບໍດີອັຟການິສຖານທ່ານ Ashraf Ghani ໃນ
ມື້ວັນສຸກວານນີ້ ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ກ່າວຢ້ຳ ເຖິງການ
ໃຫ້ຄວາມສະໜັບສະໜຸນຂອງສະຫະລັດ ຕໍ່ຂັ້ນຕອນການສ້າງສັນຕິພາບທີ່ທ່ານກ່າວວ່າ
ຈະຫລຸດຜ່ອນຄວາມຮຸນແຮງລົງແລະຄ້ຳປະກັນໃຫ້ອັຟການິສຖານແລະຂົງເຂດດັ່ງກ່າວ
ມີສະຖຽນລະພາບທີ່ຍືນຍົງ.
