ມືລະເບີດລົດສະຫຼະຊີບ ຕາລີບານ ຄົນໜຶ່ງໄດ້ໂຈມຕີລົດທະຫານຕ່າງປະເທດຂະບວນໜຶ່ງໃນນະຄອນຫຼວງ ກາບູລ ໃນລະຫວ່າງເວລາຮີບດ່ວນໃນຕອນເຊົ້າມື້ນີ້.
ເຈົ້າໜ້າທີ່ຕຳຫຼວດ ອັຟການິສຖານ ຄົນໜຶ່ງໄດ້ກ່າວວ່າ ປະຊາຊົນ 3 ຄົນໄດ້ຮັບບາດເຈັບ, ແຕ່ບໍ່ໄດ້ກ່າວວ່າມີທະຫານຕ່າງປະເທດຄົນໃດໄດ້ຮັບບາດເຈັບໃນການໂຈມຕີຂອງວັນອາທິດມື້ນີ້. ລົດໂຮງໝໍຫຼາຍຄັນໄດ້ຖືກພົບເຫັນແລ່ນອອກໄປຈາກສະຖານທີ່ເກີດເຫດໃນພື້ນທີ່ໆມີຄົນໜາແໜ້ນໃນນະຄອນຫຼວງຂອງ
ອັຟການິສຖານນັ້ນ.
ສະຖານີໂທລະພາບໃນທ້ອງຖິ່ນ ໄດ້ອອກອາກາດພາບສົດຂອງລົດທະຫານທີ່ໄດ້ຖືກທຳລາຍ.
ໂຄສົກຂອງໜ່ວຍພາລະກິດສະໜັບສະໜູນການແກ້ໄຂບັນຫາ ນຳໜ້າໂດຍອົງການ NATO ໄດ້ຢືນຢັນວ່າຂະບວນທະຫານຂອງຕົນໄດ້ຖືກໂຈມຕີ.
ໂຄສົກຂອງພວກ ຕາລີບານ Zabihullah Mujahid ໄດ້ສົ່ງຈົດໝາຍທາງອິນເຕີເນັດ ລາຍງານຂໍ້ມູນກ່ຽວກັບການໂຈມຕີໃຫ້ວີໂອເອຊາບ. ເຂົາເວົ້າວ່າ ລົດລະເບີດສະລະດັ່ງກ່າວໄດ້ມີຂຶ້ນເພື່ອຕອບໂຕ້ການໂຈມຕີທາງອາກາດ ໂດຍທະຫານຕ່າງຊາດໃນແຫ່ງຕ່າງໆໃນ ອັຟການິສຖານ, ລວມທັງເມືອງ Kunduz, ເຊິ່ງເຮັດໃຫ້ປະຊາຊົນ ແລະ ທ່ານໝໍ ອັຟການິສຖານ ຫຼາຍຄົນເສຍຊີວິດ.
ລາວອ້າງວ່າມີປະຊາຊົນຢ່າງໜ້ອຍ 12 ຄົນເສຍຊີວິດໃນເຫດລະເບີດແຕກວັນອາທິດມື້ນີ້, ເຖິງຢ່າງໃດກໍຕາມ ກຸ່ມພວກຫົວຮຸນແຮງແມ່ນເປັນທີ່ຮູ້ຈັກກັນວ່າເວົ້າເກີນຄວາມຈິງສຳລັບ ຈຳນວນຄົນຜູ້ເສຍຊີວິດໃນການໂຈມຕີທີ່ຄ້າຍຄືກັນ. ເຈົ້າໜ້າທີ່ ອັຟການິສຖານ ແລະ NATO ບໍ່ໄດ້ລາຍງານຈຳນວນຜູ້ເສຍຊີວິດຈາກການໂຈມຕີດັ່ງກ່າວ.
ພວກຕໍ່ຕ້ານລັດຖະບານ ຕາລີບານ ໄດ້ໂຈມຕີເມືອງ Kunduz ຢ່າງຮຸນແຮງໃນທ້າຍເດືອນ ກັນຍາທີ່ຜ່ານມາ, ກະຕຸ້ນໃຫ້ມີການໂຈມຕີຕອບໂຕ້ຢ່າງໜັກ ໂດຍທະຫານຮັກສາຄວາມປອດໄພ ອັຟການິສຖານ ທີ່ໜູນຫຼັງໂດຍການໂຈມຕີທາງອາກາດ ສະຫະລັດ ທີ່ສາມາດເຮັດໃຫ້ຍຶດຄືນມາໄດ້ຫົວເມືອງສ່ວນຫຼາຍ.
