ມີການສົ່ງຄຳຍ້ອງຍໍສັນລະເສີນເປັນຈຳນວນຫຼວງຫຼາຍໄປ
ໃຫ້ດາລານັກຕະຫລົກ Robin Williams ທີ່ໄດ້ຖືກພົບເຫັນ
ເສຍຊີວິດ ຢູ່ທີ່ເຮືອນຂອງທ່ານ ໃກ້ກັບນະຄອນ San
Francisco ລັດ California ໃນອັນທີ່ປາກົດວ່າ ເປັນການ
ຂ້າໂຕຕາຍ ຮວມອາຍຸໄດ້ 63 ປີ.
ປະທານາທິບໍດີ Barack Obama ໄດ້ສັນລະເສີນທ່ານ
Williams ວ່າ ເປັນ ນັກສະແດງ“ທີ່ບໍ່ນຳແບບໃຜ” ທີ່ໄດ້ສຳ
ພັດທຸກໆພາກສ່ວນຂອງຈິດໃຈມະນຸດ.”
ນັກສະແດງ Steve Martin ຊຶ່ງເປັນດາຣາຮ່ວມສະແດງ ກັບທ່ານ
William ໃນເລື່ອງ“Waiting for Godot” ໄດ້ຂຽນຢູ່ໃນໜ້າ Twitter ວ່າ “ບໍ່ມີຫຍັງ ທີ່
ເຮັດໃຫ້ທ່ານຕື່ນຕົກໃຈໄປຫລາຍກວ່າການສູນເສຍທ່ານ Robin Williams ຜູ້ທີ່ເປັນ
ໜ້ານັບຖື ມີພອນສະຫວັນອັນຍິ່ງໃຫຍ່ ເປັນຄູ່ຮ່ວມສະແດງ ແລະມີຈິດ ວິນຍານອັນສູງສົ່ງ.”
ບັນດາເຈົ້າໜ້າທີ່ທ້ອງຖິ່ນ ກ່າວວ່າ ເຂົາເຈົ້າເຊື່ອວ່າ ການເສຍຊີວິດຂອງທ່ານ Willams
ເກີດຈາກສະພາບທີ່ຂາດອາກາດໃນການຫາຍໃຈ ແຕ່ວ່າ ສາເຫດຂອງການເສຍຊີວິດທີ່
ແທ້ຈິງນັ້ນ ຍັງຢູ່ພາຍໃຕ້ການສືບສວນ.
ຜູ້ຕາງໜ້ານັກໃຫ້ຄວາມບັນເທີງທ່ານນີ້ ໄດ້ອອກຖະແຫລງການໃນຕອນແລງວັນຈັນວານ
ນີ້ວ່າ ທ່ານ Williams ໄດ້ຕໍ່ສູ້ກັບໂຣກຊຶມເສົ້າຫວ່າງມໍ່ໆມານີ້. ທ່ານ Williams ໄດ້ເລີ້ມມີ
ບັນຫາກ່ຽວກັບການໃຊ້ຢາເສບຕິດແລະດື່ມເຫລົ້າ ໃນຕອນ ຕົ້ນຂອງການເລີ້ມອາຊີບ
ຂອງທ່ານ ແລະໄດ້ເຂົ້າໄປຮັກສາປິ່ນປົວຢູ່ສູນກາງບຳ ບັດ ບໍ່ພໍເທົ່າໃດອາທິດທີ່ຜ່ານ
ມານີ້ເພື່ອຊ່ວຍຮັກສາໃຫ້ທ່ານຫາຍດີຈາກການດື່ມເຫຼົ້າ.
ທ່ານ Williams ໄດ້ເປັນນັກເລົ່າເລື້ອງຕະຫລົກ ເວລາທ່ານໄດ້ເລີ້ມປາກົດຕົວທາງໂທລະ
ພາບເປັນເທື່ອທຳອິດ ໃນທ້າຍຊຸມປີ 1970 ໂດຍສະແດງເປັນຄົນທີ່ມາຈາກໂລກອື່ນ ຢູ່
ໃນເລື່ອງຕະຫລົກ “Mork and Mindy.” ທ່ານໄດ້ເລື່ອນຂື້ນໄປສະແດງຮູບເງົາ ແລະໄດ້
ປະສົບຜົນສຳເລັດໃນຫລາຍໆບົດບາດ ຮວມທັງ “Mrs. Doubtfire” “Good Morning
Vietnam,” “Dead Poet Society,” ແລະ “Good Will Hunting,” ທີ່ເຮັດໃຫ້ທ່ານໄດ້
ຮັບລາງວັນຕຸກ ກະຕາຄຳ Academy Award ໃນການເປັນນັກສະແດງສະໜັບສະໜຸນ
ທີ່ດີເລີດ ໃນປີ 1998.
