ນັກເຄື່ອນໄຫວເກົາຫຼີໃຕ້ຄົນນຶ່ງ ກ່າວວ່າ ລາວໄດ້ປ່ອຍໝາກ
ປູມເປົ້າຍັກ ຫຼື ບານລູນຫຼາຍໆລູກ ເພື່ອນຳເອົາຮູບເງົາ
Hollywood ເລື້ອງການສຳພາດ ຫຼື The Interview ຫຼາຍພັນ
ແຜ່ນເຂົ້າໄປໃນເກົາຫຼີເໜືອ.
ຮູບເງົາດັ່ງກ່າວ ຊຶ່ງເປັນນິຍາຍ ກ່ຽວກັບແຜນການສັງຫານຜູ້ນຳ
ເກົາຫຼີເໜືອ ທ່ານ Kim Jong Un ໂດຍອົງການສືບລັບ CIA
ສະຫະລັດ ແມ່ນໄດ້ຖືກລຳລຽງໂດຍໝາກປູມເປົ້າຍັກດັ່ງກ່າວ
ພ້ອມທັງ ໃບປິວຕໍ່ຕ້ານພຽງຢາງນຳດ້ວຍ.
ທ່ານ Lee Min-bok ຊາວເກົາຫຼີເໜືອ ທີ່ໄດ້ໂຕນໜີອອກຈາກ
ປະເທດ ແລະ ກາຍມາເປັນນັກເຄື່ອນໄຫວ ກ່າວວ່າ ລາວສົ່ງໝາກປູມເປົ້າຍັກເຫຼົ່ານີ້ ອອກໄປໃນສີ່ຈຸດດ້ວຍກັນ. ຄັ້ງຫຼ້າສຸດ ແມ່ນມີຂຶ້ນ ເມື່ອວັນເສົາຜ່ານມາ.
ທາງເກົາຫຼີເໜືອ ຄັດຄ້ານຢ່າງແຮງ ຕໍ່ການສົ່ງໝາກປູມເປົ້າຍັກ. ເມື່ອເດືອນຕຸລາປີກາຍນີ້
ເກົາຫຼີເໜືອ ໄດ້ຍິງປືນໃສ່ ພວກໝາກປູມເປົ້າຍັກ ຈຳນວນນຶ່ງ ຈຶ່ງກໍ່ໃຫ້ເກີດມີການຍິງຕອບ
ໂຕ້ກັນເປັນເວລາສັ້ນໆ ກັບກອງກຳລັງເກົາຫຼີໃຕ້.
ລັດຖະບານເກົາຫຼີໃຕ້ ໄດ້ຂໍຮ້ອງໃຫ້ ບັນດານັກເຄື່ອນໄຫວ ຍົກເລີກການສົ່ງໝາກປູມເປົ້າຍັກ ເຫຼົ່ານັ້ນ ແຕ່ກ່າວວ່າ ການສົ່ງໝາກປູມເປົ້າຍັກ ແມ່ນເປັນການກະທຳ ເພື່ອສະແດງອອກ ເຖິງສິດເສລີພາບໃນການປາກເວົ້າ.
ຊາວເກົາຫຼີໃຕ້ບາງສ່ວນ ທີ່ອາໄສຢູ່ໃກ້ກັບຊາຍແດນເກົາຫຼີເໜືອ ໄດ້ຈົມວ່າ ກ່ຽວກັບພວກ
ນັກເຄື່ອນໄຫວ ແມ່ນເຮັດໃຫ້ຊີວິດການເປັນຢູ່ ຂອງພົນລະເມືອງໃນທ້ອງຖິ່ນ ມີຄວາມສ່ຽງ
ໂດຍເຮັດໃຫ້ພວກເຂົາເຈົ້າ ອາດກາຍເປັນເປົ້າໝາຍໃນການໂຈມຕີ.
ເກົາຫຼີເໜືອ ແມ່ນໂກດແຄ້ນເປັນພິເສດ ຕໍ່ການພະຍາຍາມໃດໆ ທີ່ຈະ ສົ່ງຮູບເງົາເລື້ອງ The Interview ໄປກັບໝາກປູມເປົ້າຍັກນັ້ນ ຊຶ່ງເກົາຫຼີເໜືອໄດ້ປະກາດວ່າ ຮູບເງົານີ້
“ເປັນການກະທຳ ຂອງການກໍ່ການຮ້າຍ.”
ບັດດາເຈົ້າໜ້າທີ່ສະຫະລັດ ກ່າວວ່າ ເກົາຫຼີເໜືອ ເປັນຜູ້ຮັບຜິດຊອບ ໃນການໂຈມຕີ ທາງ
ອິນເຕີເນັດ ຕໍ່ບໍລິສັດ Sony Pictures ທີ່ໄດ້ເປັນຜູ້ຜະລິດຮູບເງົາຕະລົກດັ່ງກ່າວ.
