ນັກສຶກສາ ຊາວໂຊມາເລຍ ຂອງມະຫາວິທະຍາໄລ ລັດ Ohio ຫຼື OSU ໄດ້ຂັບລົດ ຂອງລາວ ແລ່ນເຂົ້າໃສ່ຝູງຄົນທີ່ຍ່າງຢູ່ແຄມທາງ ໃນວັນຈັນວານນີ້ ແລະ ຕໍ່ຈາກນັ້ນ ກໍໄດ້ອອກມາຈາກລົດ ແລ້ວເລີ່ມຕົ້ນແທງຜູ້ຄົນ ຢ່າງບໍ່ເລືອກໜ້າ ເຮັດໃຫ້ 11 ຄົນ ໄດ້ຮັບບາດເຈັບ. ຜູ້ກ່ຽວໄດ້ຖືກຍິງຕາຍໂດຍເຈົ້າໜ້າທີ່ຕຳຫຼວດ.
ຜູ້ບັນຊາການຕຳຫຼວດທີ່ນະຄອນ Columbus ທ່ານນາງ Kim Jacobs ໄດ້ກ່າວວ່າ “ພວກເຮົາຕ້ອງພິຈາລະນາວ່າ ມັນເປັນ” ການໂຈມຕີກໍ່ການຮ້າຍ.
ມະຫາວິທະຍາໄລ ລັດ Ohio ໄດ້ລະບຸໂຕຄົນຮ້າຍ ຄື ທ້າວ Abdul Razak Ali Artan ຊຶ່ງເປັນນັກສຶກສາຂອງມະຫາວິທະຍາໄລ. ປະຊາຊົນໃນນະຄອນ Columbus ກ່າວຕໍ່ ວີໂອເອ ພະແນກພາສາ ໂຊມາເລຍ ວ່າ ຊາຍຄົນນັ້ນ ມີເຊື້ອສາຍໂຊມາເລຍ ແລະ ມີອາຍຸປະມານ 20 ປີ.
ນັກສຶກສາທີ່ຊື່ດຽວກັນນີ້ ໄດ້ມີການຂຽນປະຫວັດຂໍ້ມູນ ລົງໃນໜັງສືພິມນັກສຶກສາສະບັບເມື່ອເດືອນສິງຫາຜ່ານມາ ຊຶ່ງຜູ້ກ່ຽວໄດ້ສະແດງຄວາມເປັນຫ່ວງ ກ່ຽວກັບການຂາດແຄນ ຂອງຫ້ອງສວດມົນ ສຳລັບຊາວມຸສລິມ ຢູ່ໃນເຂດມະຫາວິທະຍາ.
ບັນດາເຈົ້າໜ້າທີ່ໂຮງໝໍ ໄດ້ກ່າວວ່າ ພວກຜູ້ເຄາະຮ້າຍທີ່ໄດ້ຮັບບາດເຈັບນັ້ນ ບໍ່ມີຜູ້ໃດ ມີອາການສາຫັດ ທີ່ເປັນອັນຕະລາຍເຖິງແກ່ຊີວິດ.
ປະທານມະຫາວິທະຍາໄລ OSU ທ່ານ Michael Drake ໄດ້ກ່າວວ່າ ໃນເບື້ອງຕົ້ນ ມີຂ່າວລືວ່າ ມີຜູ້ຕ້ອງສົງໄສ ຄົນທີສອງ. ເຖິງຢ່າງໃດກໍຕາມ ທ່ານ Drake ໄດ້ກ່າວວ່າ ເຈົ້າໜ້າທີ່ຕຳຫຼວດ ໄດ້ກວດຄົ້ນ ບໍລິເວນ ແລະ ເຊື່ອວ່າ ມີຜູ້ຮ້າຍພຽງຄົນດຽວເທົ່ານັ້ນ. ອົງການສັນຕິບານກາງ FBI ກໍໄດ້ເຂົ້າຮ່ວມໃນການສືບສວນສອບສວນນີ້.
ທ່ານ Drake ໄດ້ກ່າວອີກວ່າ ທ່ານຈະບໍ່ສັນນິຖານ ກ່ຽວກັບຈຸດປະສົງໃນການໂຈມຕີ. ທ່ານໄດ້ກ່າວວ່າ ມັນເປັນການໂຈມຕີທີ່ເຈາະຈົງ ເພາະວ່າ ຜູ້ຕ້ອງສົງ ໄສຂັບລົດ ຂອງ
ລາວ ຂຶ້ນຂອບທາງ ເພື່ອຕຳພວກຄົນຍ່າງ ຢູ່ເທິງທາງຍ່າງ. ທ່ານໄດ້ກ່າວຕື່ມວ່າ ຜູ້ຕ້ອງສົງໄສ ຕໍ່ຈາກນັ້ນ ໄດ້ອອກມາຈາກລົດ ແລະເລີ້ມເອົາພ້າຟັນຜູ້ຄົນ.
ຜູ້ບັນຊາການຕຳຫຼວດ ຂອງມະຫາວິທະຍາໄລ OSU ທ່ານ Craig Stone ໄດ້ກ່າວວ່າ ຕຳຫຼວດຂອງວິທະຍາໄລ ໄດ້ໄປຮອດຈຸດເກີດເຫດ ແລະ ໄດ້ຍິງສັງຫານຜູ້ຕ້ອງສົງໄສ ພາຍໃນບໍ່ເທົ່າໃດນາທີ ຫຼັງຈາກການໂຈມຕີໄດ້ເລີ້ມຂຶ້ນ. ບັນດາເຈົ້າໜ້າທີ່ ກ່າວວ່າ ຕຳຫຼວດ Alan Horujko ບັງເອີນ ຢູ່ໃນບໍລິເວນເກີດເຫດ ຍ້ອນວ່າ ນ້ຳມັນຮົ່ວ ແລະ ໄດ້ເຫັນເຫດການກຳລັງເກີດຂຶ້ນ.
ອ່ານຂ່າວນີ້ຕື່ມ ເປັນພາສາອັງກິດ
