ການປ່ອຍຕົວແມ່ຍິງຄຣິສຕຽນຄົນນຶ່ງຢູ່ປາກິສຖານ ທີ່ຖືກພົບເຫັນວ່າ ບໍ່ມີຄວາມຜິດ ໂດຍສານສູງສຸດ ໃນຂໍ້ຫາໝິ່ນປະໝາດສາສະໜາ ເມື່ອຕົ້ນອາທິດນີ້ ໄດ້ມີການຊັກຊ້າ.
ນາງເອເຊຍ ບີບີ ໄດ້ຖືກພົບເຫັນວ່າ ບໍ່ມີຄວາມຜິດໃນວັນພຸດຜ່ານມາ ຊຶ່ງໄດ້ພາໃຫ້ມີການປະທ້ວງໃນທົ່ວປະເທດ. ການປະທ້ວງຢູ່ທົ່ວປະເທດ ກຳນົດຈະມີຂຶ້ນອີກ ຫລັງຈາກພິທີສວດມົນພາວະນາ ໃນວັນສຸກມື້ນີ້.
ພວກທະຫານໄດ້ເຕືອນວ່າ ຄວາມອົດທົນກ່ຽວກັບການປະທ້ວງ ໃກ້ຈະໝົດລົງແລ້ວ.
ໂຄສົກຂອງກອງທັບ ທ່ານອາຊິຟ ກາຟົວ ກ່າວວ່າ “ພວກເຮົາຈະບໍ່ຍອມຮັບເອົາ ການໃຫ້ຄວາມເຫັນໃດໆກ່ຽວກັບພວກເຮົາ ແຕ່ການເອົາມາດຕະການສາມາດມີຂຶ້ນ ອີງຕາມກົດໝາຍແລະລັດຖະທຳມະນູນ. ຢ່າບັງຄັບໃຫ້ພວກເຮົາ ເອົາບາດກ້າວດັ່ງກ່າວ.”
ນາງບີບີ ທີ່ເຮັດວຽກຫາລ້ຽງຊີບປະຈຳວັນ ໄດ້ຖືກຈັບ ຫລັງຈາກຜິດກັນກັບພວກແມ່ຍິງ ທີ່ນາງໄປເກັບໝາກແບຣີນຳນັ້ນ.
ອີງຕາມຄຳເວົ້າຂອງນາງຢູ່ສານແລ້ວ ນາງບີບີໄດ້ຖຽງກັນຢ່າງແຮງກັບພວກແມ່ ຍິງ ຫຼັງຈາກພວກແມ່ຍິງ ໄດ້ປະຕິເສດ ບໍ່ຍອມດື່ມນ້ຳທີ່ນາງໄປຕັກມາໃຫ້ເຂົາເຈົ້າ ຍ້ອນນາງນັບຖືສາສະໜາຄຣິສຕຽນ.
