ການເຈລະຈາລະຫວ່າງ ເກົາຫຼີເໜືອແລະຍີ່ປຸ່ນ ໄດ້ເລີ້ມຕົ້ນບໍ່ຄ່ອຍ
ລາບລື່ນປານໃດໃນວັນອັງຄານມື້ນີ້ ໂດຍທີ່ທັງສອງຝ່າຍ ໄດ້ຖົກ
ກັນກ່ຽວກັບການຍິງທົດລອງລູກສອນໄຟໄລ ຍະໃກ້ຂອງພຽງຢາງ
ຫວ່າງມໍ່ໆມານີ້.
ການເຈລະຈາດັ່ງກ່າວ ຊຶ່ງຈັດຂຶ້ນທີ່ສະຖານທູດຂອງເກົາຫຼີເໜືອ
ໃນປັກກິ່ງ ແມ່ນຈະເພັ່ງເລັງໃສ່ການລັກພາຕົວຊາວຍີ່ປຸ່ນ ໂດຍ
ພຽງຢາງ ໃນຊຸມປີ 1970 ແລະ 1980 ນັ້ນ.
ມີຄວາມເປັນຫ່ວງກ່ຽວກັບວ່າ ການເຈລະຈາດັ່ງກ່າວຈະໄຂຂຶ້ນຫຼືບໍ່
ຫລັງຈາກເກົາຫລີເໜືອ ໄດ້ທົດລອງຍິງລູກສອນໄຟໄລຍະໃກ້
scud 2 ລູກ ໃນວັນອາທິດແລ້ວນີ້.
ໃນຕອນເລີ້ມຕົ້ນຂອງການເຈລະຈາ ຫົວໜ້າຄະນະເຈລະຈາຂອງຍີ່ປຸ່ນ ທ່ານ Junichi Ihara ໄດ້ກ່າວວ່າ ໂຕກຽວ “ປະທ້ວງຢ່າງແຂງຂັນ” ຕໍ່ການຍິງທົດລອງທີ່ວ່ານີ້ ຊຶ່ງທ່ານໄດ້ກ່າວວ່າ ເປັນການລະເມີດຕໍ່ມະຕິຂອງອົງການສະຫະປະຊາຊາດ.
ສ່ວນຫົວໜ້າຄະນະເຈລະຈາຂອງເກົາຫຼີເໜືອ ທ່ານ Song II Ho ໄດ້ກ່າວປົກປ້ອງການທົດລອງຍິງ ດັ່ງກ່າວວ່າ ເປັນໄປໃນທາງສັນຕິແລະຖືກຕ້ອງຊອບທຳຕາມກົດໝາຍ ໂດຍກ່າວວ່າ ພຽງຢາງບໍ່ໄດ້ຮັບຮູ້ການລົງໂທດ ຂອງອົງການສະຫະປະຊາຊາດ ທີ່ເປັນບັນຫາ ນັ້ນ.
ບໍ່ໄດ້ມີການແຈ້ງໃຫ້ຊາບວ່າ ການເຈລະຈາໄດ້ມີຄວາມກ້າວໜ້າຫລືບໍ່ ກ່ຽວກັບການລັກພາຕົວຊາວຍີ່ປຸ່ນ.
ເກົາຫຼີເໜືອ ໄດ້ຕົກລົງໃນເດືອນພຶດສະພາຜ່ານມານີ້ວ່າ ຈະເປີດຄືນ ການສືບສວນ ສອບສວນການລັກພາຕົວດັ່ງກ່າວ ເພື່ອແລກປ່ຽນ ກັບການຜ່ອນຜັນການລົງໂທດບາງຢ່າງຈາກ
ຍີ່ປຸ່ນ ທີ່ມີມາເປັນເວລາດົນນານແລ້ວນັ້ນ.
