ເນື່ອງຈາກຕົນເອງອາໄສຢູ່ເຂດນອກເມືອງ ເນື່ອງຈາກຕ້ອງການຫາລາຍໄດ້ມາເພີ້ມໃຫ້ແກ່ຄອບຄົວ, ປະຊາຊົນຄອບຄົວນຶ່ງທີ່ອາໄສຢູ່ເຂດເມືອງສີໂຄດຕະບອງ ກໍາແພງນະຄອນຫຼວງວຽງຈັນ ຈຶ່ງມີແນວຄິດໃນການເຮັດການກະເສດແບບຄອບ ຄົວ ໂດຍໄດ້ປັບປ່ຽນ ການນໍາໃຊ້ທີ່ດິນບໍລິເວນເຮືອນຊານມາເຮັດການກະເສດ, ເຊິ່ງນາງບອກວ່າ “ລ້ຽງປາ ເຊິ່ງກໍພໍໄດ້ກິນ ແລະກໍແບ່ງຂາຍ, ລ້ຽງເປັດ ລ້ຽໄກ່ ກໍພໍໄດ້ເກັບໄຂ່ໄປຂາຍ, ລ້ຽງນົກກະທາ, ກົບ, ຂຽດ, ແລະຈິນາຍ.”
ນາງຍັງກ່າວຕື່ມອີກວ່າ “ມີການປູກເຫັດ ໂດຍນໍາໃຊ້ບ່ອນຫວ່າງ ໃນເດີ່ນບ້ານສ່ວນນຶ່ງນັ້ນເປັນຄອກປູກເຫັດ, ແລະກໍຍັງມີການປູກຜັກຕາມລະດູການ ພໍໄດ້ເກັບກິນ ໂດຍບໍ່ຕ້ອງໄດ້ອອກໄປຊື້ຕາມຕະຫຼາດ,” ເຊິ່ງມີບາງຕອນ ທີ່ນາງໄດ້ກ່າວໃຫ້ຟັງວ່າ:
“ອັນທີ່ເຮົາລ້ຽງຫັ້ນ ມີເປັດ, ໄກ່, ປາ, ນົກກະທາ, ຈິນາຍ, ມີເຫັດ...ເຮົາກໍຊື້ມາປູກ ພໍເກັບຂາຍໃຫ້ໄທບ້ານເດ...ກ່ອນໂຄວິດຫັ້ນນະ ເຮົາລ້ຽງຫຼາຍຫັ້ນນະ ລະມັນຫາກມີແມ່ຄ້າມາເອົາແຕ່ລະມື້, ຄືຊ່ວງໂຄວິດລະ ເຮົາບໍ່ໄດ້ລ້ຽງຫຼາຍເລີຍບໍ່ໄດ້ຕິດຕໍ່ໃຫ້ແມ່ຄ້າມາເອົາ ມີແຕ່ເຮົາຂາຍໃຫ້ໄທບ້ານນິ ເຮົາສົ່ງໃຫ້ເຂົາເອົາ.”
ເມື່ອເຂົ້າຊ່ວງໂຄວິດ, ສະຖານະການພາຍໃນປະເທດມີການປ່ຽນແປງໄປຫຼາຍຢ່າງ ແຕ່ຄອບຄົວຂອງນາງກໍ່ບໍ່ຄ່ອຍໄດ້ພົບກັບບັນຫາເລື້ອງການຢູ່ກິນ ເພາະເກືອບທຸກໆຢ່າງກໍມີຢູ່ໃນສວນຄົວໝົດແລ້ວ, ມີແຕ່ຊື້ບາງຢ່າງເລັກໆນ້ອຍທີ່ຈໍາເປັນເທົ່ານັ້ນ.
ປັດຈຸບັນ ເຖິງວ່າສະຖານະການຂອງໂຄວິດ-19 ເລີ້ມດີຂຶ້ນມາແດ່, ແຕ່ເຄື່ອງຂອງທຸກຢ່າງ ແມ່ນແພງຫຼາຍ, ຫົວອາຫານກໍແພງ ເພາະເປັນສິນຄ້ານໍາເຂົ້າຈາກປະເທດໃກ້ຄຽງ. ດັ່ງນັ້ນ, ພວກເຂົາເຈົ້າເລີຍຫຼຸດການເກືອຫົວອາຫານໃຫ້ສັດລ້ຽງລົງມາເຄິ່ງນຶ່ງ ໂດຍມາເກືອປົນກັບຂີ້ເບຍທີ່ຮັບຊື້ມາຈາກໂຮງງານ ເຊິ່ງມັນກໍ່ເປັນການດີຫຼາຍ ເພາະຫຼຸດລາຍຈ່າຍລົງມາໄດ້ຫຼາຍສົມຄວນ. ໂດຍນາງກ່າວວ່າ:
“ໂຄວິດລະ ອິຫຍັງຢູ່ບ້ານເຮົາມັນກໍແພງ ກໍຂຶ້ນໝົດ ພວກເຮົາບໍ່ໄຫວນໍາຫົວອາຫານ ທຶນກໍບໍ່ປານໃດຈັງຊີ້ນະ, ກະຄືເກົ່າຫັ້ນລະຫັ້ນລະ ເຮົາກໍລ້ຽງປົກກະຕິ ຂາຍກໍບໍ່ປານໃດ ເພາະເຮົາກໍລ້ຽງຫຼາຍກະບໍ່ໄດ້, ກະລ້ຽງພໍແຕ່ໄດ້ຂາຍ, ຄືຫົວອາຫານນິເຂົານໍາເຈົ້າເນາະ ມັນກະແພງແພງ ພໍແຕ່ອາໄສເອົາຂີ້ເບຍນັ້ນມາເກືອ ແລະກໍຂາຍຂີ້ເບຍຫັ້ນນໍາຈັງຊີ້ນະ ກໍພໍໄຄ.”
ນາງຍັງກ່າວມ້ວນທ້າຍອີກວ່າ ການເຮັດກະເສດແບບຄອບຄົວແມ່ນມີຜົນດີຫຼາຍຢ່າງ ເພາະນອກຈາກຈະຊ່ວຍໃຫ້ຄອບຄົວ ໄດ້ມີອາຫານການກິນແລ້ວ ຍັງສາ ມາດແບ່ງຂາຍເພື່ອເປັນລາຍໄດ້ເສີມ, ດິນນ້ອຍກໍເຮັດສວນຄົວໄດ້ຂໍພຽງແຕ່ເຮົາ ດຸໝັ້ນ ແລະຮູ້ຈັກໝູນໃຊ້ເທົ່ານັ້ນ.
