ທ່ານ ສົມພົງ ມົງຄົນວິໄລ ລັດຖະມົນຕີປະຈຳສຳນັກງານນາຍົກລັດຖະມົນຕີລາວ ຜູ້ຮັບຜິດຊອບອົງການທ່ອງທ່ຽວແຫ່ງຊາດ ໄດ້ຖະແຫລງຍອມຮັບວ່າ ຈຳນວນນັກທ່ອງທ່ຽວຊາວຕ່າງປະເທດທີ່ເດີນທາງເຂົ້າລາວໃນຕະຫລອດປີນີ້ ຈະບໍ່ເປັນໄປຕາມແຜນການແລະເປົ້າ ໝາຍທີ່ໄດ້ວາງເອົາໄວ້ໂດຍຕາມແຜນການທີ່ວາງເອົາໄວ້ແລ້ວນັ້ນແມ່ນໄດ້ຕັ້ງເປົ້າໝາຍທີ່ຈະຮອງຮັບນັກທ່ອງທ່ຽວຊາວຕ່າງຊາດໃຫ້ໄດ້ຈຳນວນບໍ່ໜ້ອຍ ກວ່າ 1,800,000 ຄົນ ເຊິ່ງກໍຈະເຮັດໃຫ້ພາກທຸລະກິດບໍລິການ ແລະ ການທ່ອງທ່ຽວຂອງລາວມີລາຍຮັບບໍ່ໜ້ອຍກວ່າ 250 ລ້ານໂດລ້າ ສະຫະລັດ ຫລື ເພີ້ມຂຶ້ນຈາກປີ 2007 ຄຶດເປັນສັດສ່ວນເຖິງ 30%. ແຕ່ຢ່າງໃດກໍຕາມໃນໄລຍະ 10 ເດືອນທີ່ຜ່ານມາຂອງປີ 2008 ນີ້ ກໍປາກົດວ່າມີນັກທ່ອງທ່ຽວ ຊາວຕ່າງປະເທດ ເດີນທາງເຂົ້າລາວ ພຽງ 1,370,000 ກວ່າຄົນ ຫລື ເພີ້ມຂຶ້ນຈາກໃນໄລຍະດຽວ ກັນຂອງປີທີ່ແລ້ວ ຄຶດເປັນສັດສ່ວນພຽງແຕ່ 3% ເທົ່ານັ້ນ. ດ້ວຍເຫດນີ້ ຈຶ່ງເປັນໄປໄດ້ຍາກທີ່ຈະມີນັກທ່ອງທ່ຽວຊາວຕ່າງຊາດເດີນທາງເຂົ້າລາວ ໄດ້ຕາມເປົ້າໝາຍແຜນການທີ່ວາງເອົາໄວ້ດັ່ງກ່າວ. ທັງນີ້ ທ່ານ ສົມພົງ ໄດ້ໃຫ້ການອະທິບາຍວ່າ ສາເຫດສຳຄັນທີ່ເຮັດໃຫ້ການທ່ອງທ່ຽວຂອງລາວ ບໍ່ເປັນໄປຕາມເປົ້າໝາຍທີ່ວາງເອົາໄວ້ນັ້ນກໍຍ້ອນວ່າ ໄດ້ຮັບຜົນກະທົບຢ່າງໜັກ ຈາກບັນຫາວິກິດການທາງເສດຖະກິດການເງິນໂລກ ທີ່ສົມທົບດ້ວຍບັນຫາທາງການເມືອງໃນປະເທດໄທ ເຊິ່ງກໍໄດ້ເປັນຜົນຕໍ່ເນື່ອງ ເຮັດໃຫ້ມີນັກທ່ອງທ່ຽວເດີນທາງຈາກໄທເຂົ້າລາວ ຫລຸດໜ້ອຍຖອຍລົງຢ່າງຫລີກ ລ້ຽງບໍ່ໄດ້.
ແຕ່ຢ່າງໃດກໍຕາມ ສຳລັບໃນໄລຍະຍາວແລ້ວ ທາງການລາວກໍເຊື່ອ ໝັ້ນວ່າ ພາກທຸລະກິດ ບໍລິການ ແລະ ການທ່ອງທ່ຽວ ຂອງລາວ ຈະຍັງຄົງມີ ການຂະຫຍາຍ ຕົວເພີ້ມຂຶ້ນຢ່າງຕໍ່ເນື່ອງກັບທັງຍັງຈະເປັນພາກສ່ວນ ສຳຄັນຕໍ່ການພັດທະນາປະເທດໃຫ້ຫລຸດພົ້ນຈາກສະພາບດ້ອຍພັດທະນາ ແລະ ປະຊາຊົນລາວຫລຸດພົ້ນຈາກບັນຫາຄວາມທຸກຈົນ ຢ່າງສິ້ນເຊີງໄດ້ຢ່າງແທ້ຈິງ ພາຍໃນປີ 2020 ຕາມທີ່ພັກປະຊາຊົນປະຕິວັດລາວ ແລະ ລັດຖະບານລາວໄດ້ວາງເອົາໄວ້, ແລະ ກໍເພື່ອເປັນການຮັບປະກັນວ່າ ຈະສາມາດບັນລຸເປົ້າ ໝາຍ ດັ່ງກ່າວໄດ້ຢ່າງແທ້ຈິງນັ້ນ ອົງການທ່ອງທ່ຽວແຫ່ງຊາດລາວ ກໍໄດ້ຈັດກອງປະຊຸມວິຊາການທ່ອງ ທ່ຽວທົ່ວປະເທດ ເມື່ອບໍ່ນານມານີ້ຢູ່ນະ ຄອນຫລວງວຽງຈັນ ໂດຍມີຫົວໜ້າພະແນກທ່ອງທ່ຽວ ຈາກແຂວງຕ່າງໆ ແລະ ບັນດາຜູ້ແທນຈາກກະຊວງຖະບວງກົມ ບໍລິສັດສະມາ ຄົມທຸລະກິດການທ່ອງທ່ຽວ ໂຮງແຮມ ແລະ ເຮືອນພັກ ຈາກທົ່ວປະເທດເຂົ້າຮ່ວມຢ່າງພ້ອມໜ້າ. ໂດຍທ່ານ ສົມພົງ ໃນຖານະປະທານກອງປະຊຸມຄັ້ງນີ້ ໄດ້ກ່າວເນັ້ນຢ້ຳຕໍ່ບັນດາຜູ້ເຂົ້າຮ່ວມໃນກອງປະຊຸມວ່າ:
ຂ້າພະເຈົ້າຫວັງຢ່າງຍິ່ງວ່າທ່ານແຂກທີ່ມີກຽດ ທ່ານຜູ້ແທນຈະຄົ້ນຄວ້າ ປະກອບຄວາມຄິດຄວາມເຫັນໃນກອງປະຊຸມຄັ້ງນີ້ ເພື່ອເຮັດໃຫ້ກອງປະຊຸມທ້ອງທ່ຽວທົ່ວປະເທດຄັ້ງທີ່ 4 ມີຜົນສຳເລັດຢ່າງງົດງາມ, ແນ່ໃສ່ພັດທະນາຂະແໜງທ່ອງ ທ່ຽວ ໃຫ້ກາຍເປັນອຸສະຫາກຳການທ່ອງທ່ຽວທີ່ທັນສະໄໝ ຍືນຍົງ ສ້າງປະເທດລາວເປັນອຸດສະຫາກຳຂຽວ ເຮັດໃຫ້ ການທ່ອງທ່ຽວ ສາມາດນຳຜົນປະໂຫຍດສູງສຸດ ເຊິ່ງໃນການປະກອບສ່ວນເຂົ້າໃນການພັດທະນາເສດຖະກິດສັງຄົມ ແລະ ກໍເພື່ອລົບລ້າງຄວາມທຸກຍາກໃຫ້ໝົດໄປໃນ ປີ 2020 ຕາມແຜນນະໂຍບາຍຂອງລັດຖະບານທີ່ໄດ້ກຳນົດໄວ້.
ສຳລັບໃນ ປີ 2007 ທີ່ຜ່ານມາມີນັກທ່ອງທ່ຽວຊາວຕ່າງຊາດເດີນທາງເຂົ້າລາວຈຳນວນທັງໝົດ 1,600,000 ກວ່າຄົນ ໂດຍເພີ້ມຂຶ້ນຈາກ ປີ 2006 ຄຶດເປັນສັດສ່ວນເຖິງ 34% ແລະ ກໍສ້າງລາຍຮັບໃຫ້ກັບພາກທຸລະກິດບໍລິການ ແລະ ການທ່ອງທ່ຽວໃນລາວໄດ້ຫລາຍກວ່າ 233 ລ້ານໂດລ້າສະຫະລັດ. ໂດຍໃນປະຈຸບັນນີ້ ຢູ່ໃນທົ່ວປະເທດລາວ ມີບໍລິສັດທີ່ດຳເນີນທຸລະກິດ ດ້ານການທ່ອງທ່ຽວທັງໝົດ 134 ຫົວຫນ່ວຍ ມີໂຮງແຮມ ແລະ ເຮືອນພັກ 1,381ແຫ່ງ ໂດຍມີຈຳນວນຫ້ອງພັກລວມກັນທັງໝົດ 22,233 ຫ້ອງ ແລະ ເປົ້າໝາຍສຳລັບ ປີ 2020 ນັ້ນ ທາງການລາວ ກໍຈະພັດທະນາ ພາກທຸລະກິດບໍລິການ ເພື່ອຮອງຮັບນັກ ທ່ອງທ່ຽວໃຫ້ໄດ້ ບໍ່ໜ້ອຍກວ່າ 3,100,000 ຄົນ.
ຊົງຣິດ ໂພນເງິນ ລາຍງານຈາກບາງກອກ ເມື່ອວັນທີ 13 ທັນວາ 2008.
