ລິ້ງ ສຳຫລັບເຂົ້າຫາ

Job Loss in Laos Is Increasing Due to Global Financial Crisis



ທ່ານ ນາງ ອ່ອນ​ຈັນ ທຳ​ມະ​ວົງ ລັດຖະມົນ​ຕີ​ ວ່າການ ກະຊວງ​ແຮງ​ງານ ແລະ ​ສະຫວັດດີ​ການ​ສັງຄົມ​ຂອງ​ລາວ ​ໄດ້​ຖະ​ແຫລ​ງຍອມຮັບ​ວ່າ ບັນຫາ​ວິ​ ກິ​ດ​ການທາງ​ເສດ​ຖະກິດ​ການ​ເງິນ​ໂລກ ​ໄດ້​ສົ່ງ​ຜົນ​ກະ​ທົບ​ເຮັດ​ໃຫ້​ປະຊາຊົນ​ລາວຕ້ອງ​ກາຍ​ເປັນ​ຄົນ​ຫວ່າງ​ງານ​ເພີ້ມຫລາຍ​ຂຶ້ນນັບ​ມື້ ​ໂດຍ​ຈາກ​ການ​ສຳ​ຫລວດ​ໃນ​ຂັ້ນ​ເບື້ອງຕົ້ນກໍ​ພົບ​ວ່າ ​ໃນ​ປະຈຸ​ບັນນີ້ ມີ​ປະຊາຊົນຄົນ​ລາວ​ທີ່​ຕົກ​ງານ​ຢ່າງ​ເຕັມ​ຮູບ​ແບບ​ແລ້ວ ຈຳນວນ​ຫລາຍ​ກວ່າ 48,800 ຄົນ ​ເນື່ອງ​ຈາກ​ຖືກ​ນາຍ​ຈ້າງ​ໃນ​ປະ​ເທດລາວ​ເລີກຈ້າງ ​ເພາະໄດ້​ຮັບຜົນ​ກະ​ທົບ​ຈາກ​ບັນ​ຫາ​ວິ​ກິດ​ການ​ທາງ​ເສດ​ຖະກິດ​ການ​ເງິນ​ໂລກ ທີ່​ເປັນ​ຢູ່​ໃນ​ປະ​ຈຸ​ບັນນີ້. ຍິ່ງ​ໄປ​ກວ່າ​ນັ້ນ ທ່ານ​ ນາງ ອ່ອນ​ຈັນ ຍັງ​ໄດ້​ລະ​ບຸ​ດ້ວຍ​ວ່າ ​ແຮງ​ງານ​ລາວ​ຈະ​ຕ້ອງຕົກ​ງານ​ເພີ້ມຫລາຍ​ຂຶ້ນກວ່າ 16,000 ​ໃນໝໍ່ໆນີ້ອີກ​ດ້ວຍ ​ໂດຍຫລາຍ​ກວ່າ 2,000 ຄົນ​ນັ້ນ ​ຈະເປັນແຮງ​ງານ​ທີ່​ຖືກນາຍ​ຈ້າງ​ໃນ​ລາວ​ເລີກຈ້າງ ​ສ່ວນ​ທີ່​ເຫ​ລື​ອ​ອີກ​ຫລາຍ​ກວ່າ 14,000 ຄົນ​ນັ້ນ ຈະ​ຕ້ອງ​ຖືກເລີກຈ້າງ ​ໂດຍ​ນາຍ​ຈ້າງໃນປະ​ເທດ​ໄທ. ​

ແຕ່​ຢ່າງ​ໃດ​ກໍ​ຕາມ ທ່ານ ນາງ ອ່ອນ​ຈັນ ກໍ​ໄດ້​ຢືນຢັນ​ວ່າ ບັນຫາການ ຫ​ວ່າ​ງງານ​ຢູ່ໃນ​ປະ​ເທດ​ລາວ ຈະບໍ່ຮຸ່ນ​ແຮງ ​ເພາະ​ຈາກ​ການ​ສຳ​ຫລວດ​ໃນ​ໄລຍະ​ກ່ອນໜ້ານີ້ ​ຍັງພົບ​ດ້ວຍ​ວ່າ ພາກ​ການ​ຜະຫລິດ​ຕ່າງໆ ຢູ່​ໃນ​ປະ​ເທດລາວນັ້ນ ຍັງ​ຄົງ​ມີ​ຄວາມ​ຕ້ອງການ​ທີ່​ຈະ​ຈ້າງ​ແຮງ​ງານ​ລາວ ​ເພີ້ມຂຶ້ນລວມກັນ ຫລາຍ​ກວ່າ 60,000 ຄົນ ​ໂດຍ​ແບ່ງ​ເປັນ 14,000 ກວ່າ​ຄົນ ສຳລັບ​ການ​ວ່າ​ຈ້າງໂດຍ​ບັນດາໜ່ວຍ​ທຸລະ​ກິດ​ຕ່າງໆ​ໃນ​ທົ່ວ​ປະ​ເທດ​ລາວ ສ່ວນ​ພາກ​ອຸດສາ​ຫະກໍາ​ປ່າ​ໄມ້ ກໍ​ຕ້ອງການ​ຈ້າງ​ແຮງ​ງານ​ອີກ​ຫລາຍກວ່າ 5,000 ຄົນ, ອຸ​ດສະ​ຫາ​ກຳ​ເສື້ອຜ້າ​ສຳ​ເລັດ​ຮູບກໍ​ຕ້ອງການ​ແຮງ​ງານ​ເພີ້ມຂຶ້ນອີກຫລາຍ​ກວ່າ 14,000 ຄົນ ​ແລະ ອຸດສະ​ຫະ ກຳຂຸດ​ຄົ້ນບໍ່​ແຮ່ນັ້ນ ກໍ​ຍັງ​ຄົງ​ມີ​ຄວາມ​ຕ້ອງການແຮງ​ງານ ເພີ້ມຂຶ້ນອີກ​ຫລາຍ​ກວ່າ 15,000 ຄົນ ​ແລະ ​ໃນ​ຂະນະ​ດຽວກັນ ບັນດາ​ນາຍ​ຈ້າງ​ໃນ​ໄທ, ​ເກົາຫລີ​ໄຕ້, ມະ​ເລ​ເຊຍ, ​ແລະ ຍີ່ປຸ່ນ ກໍ​ຍັງ​ເຄີຍ​ສະ​ແດງ​ຄວາມ​ຕ້ອງ​ການ​ທີ່ຈະວ່າ​ຈ້າງ​ແຮ​ງງານ​ລາວ​ເພີ້ມຕື່ມ​ຂຶ້ນອີກ ລວມກັນຫລາຍ​ກວ່າ 25,000 ຄົນ ອີກ​ດ້ວຍ.


​ແຕ່​ຢ່າງ​ໃດ​ກໍ​ຕາມ ​ເນື່ອງ​ຈາກ​ວ່າ​ເປັນ​ຕົວ​ເລກ​ຂອງ​ຄວາມ​ຕ້ອງ ການ​ຈ້າງ​ແຮງ​ງານ​ລາວ ກ່ອນ​ບັນຫາ​ວິ​ກິດ​ການ​ທາງ​ເສດຖກິດ​ການ​ເງິນ​ໂລກ ຈະ​ມີ​ລະດັບ​ຄວາມ​ຮຸນ​ແຮງຫລາຍ​ຂຶ້ນ ຄື​ຢູ່​ໃນ​ປະຈຸ​ບັນນີ້ ຈຶ່ງ​ເຮັດ​ໃຫ້​ເຊື່ອ​ວ່າ ຈະ​ບໍ່ມີ​ການ​ຈ້າງ​ແຮງ​ງານ​ລາວເພີ້ມຂຶ້ນ ຈິງ ​ເພາະ​ເມື່ອ​ບໍ່​ນານ​ມານີ້ ບໍລິສັດ AUS Mining Resources, ຫລື ບໍລິສັດ Oxiana ໃນ​ອາ​ດີດ​ນັ້ນ ກໍ​ໄດ້​ປະກາດ​ວ່າ ຈະ​ເລີກ​ຈ້າງ​ແຮງ​ງານ​ລາວ​ຢູ່​ບໍ່​ແຮ່​ເຊ​ໂປ​ນ ຈຳນວນ​ຫລາຍ​ກວ່າພັນ​ຄົນ ​ເນື່ອງ​ຈາກ​ຄວາມ​ຕ້ອງການ ​ແລະ ລາຄາ​ແຮ່​ທອງ​ແດງ​ໃນ​ຕະຫລາດ​ໂລກ​ຕົກ​ຕໍ່າລົງ​ຢ່າງໜັກນັ້ນເອງ.

ນອກ​ຈາກ​ນີ້ ລັດຖະບານ​ໄທ ກໍ​ຍັງ​ໄດ້​ປະກາດ​ມາດ​ຕະການທີ່​ຈະບໍ່ຈົດ​ທະບຽນ ​ເພື່ອ​ຈ້າງ​ແຮງ​ງານ​ຕ່າງ​ດ້າວ ຈາກ ລາວ, ພະມ້າ, ​ແລະ ກຳປູ​ເຈຍ ​ເພີ້ມ​ຕື່ມຂຶ້ນອີກແລ້ວ​ໃນ​ປີນີ້ ​ໂດຍ​ມີ​ເປົ້າໝາຍ ທີ່ຈະ​ກັນ​ຕຳ​ແໜ່ງງານ ​ໄວ້​ສຳລັບ​ຮອງ​ຮັບ​ແຮງ​ງາ​ນ​ໄທ ທີ່​ຄາດໝາຍວ່າ ຈະ​ຖືກ​ເລີກຈ້າງ​ນັບ​ເປັນ​ລ້ານ​ຄົນ​ໃນ​ປີ 2009 ນີ້. ​ເພາະສະນັ້ນ ຈຶ່ງ​ຍ່ອມຈະສົ່ງຜົນສະທ້ອນເຖິງ​ແຮງ​ງານ​ລາວ​ທີ່​ຈະເດີນທາງເຂົ້າ​ໄປ​ຊອກ​ວຽກ​ເຮັດ​ງານ​ທຳ​ຢູ່​ໃນ​ປະ​ເທດ​ໄທ​ໃນ​ໄລຍະຕໍ່​ໄປ​ນີ້ ຢ່າງ​ຫລີກ​ລ້ຽ​ງ ບໍ່​ໄດ້.​

ສ່ວນ​ແຮງ​ງານ​ລາວ​ທີ່​ໄດ້​ມີ​ການແຈ້ງຈົດ​ທະບຽນທຳ​ງານ​ຢ່າງ​ຖືກຕ້ອງ​ໄວ້​ແລ້ວ​ໃນ​ປະ​ເທດ​ໄທ​ນັ້ນ ກໍ​ຍັງ​ຈະ​ບໍ່​ໄດ້​ຮັບ​ຜົນ​ກະທົບ​ຈາກ​ມາດ​ຕະການ​ດັ່ງກ່າວ​ນີ້ ຫາກ​ແຕ່​ທາງ​ການ​ໄທ​ຈະ​ເລັ່ງດຳ​ເນີນ​ການ​ຮ່ວມ​ກັນ ກັບ​ທາງ​ການ​ລາວ​ເພື່ອ​ທຳ​ການ​ພິສູດສັນຊາດ​ແຮງ​ງານ​ລາວຢູ່​ໃນ​ປະ​ເທດ​ໄທ​ໃຫ້​ໄດ້​ຢ່າງ​ຄົບ​ຖ້ວນ ພາຍ​ໃນ​ປີນີ້ ​ເພື່ອ​ເປັນ​ການ​ສະກັດ​ກັ້ນ ບໍ່​ໃຫ້​ແຮງ​ງານລາວ​ເຫລົ່າ​ນີ້ ຕ້ອງ​ຕົກ​ໄປເປັນ​ເຫຍື່ອ​ຂອງ​ຂະ​ບວນການຄ້າ​ມະນຸດ​ຂ້າມ​ຊາດ ​ແລະ ບໍ່​ໃຫ້​ມີ​ການ​ລັກ​ລອບ​ທຳ​ງານໃນ​ໄທໂດຍ​ຜິດ​ກົດໝາຍອີກ​ຕໍ່​ໄປ ດັ່ງ​ທີ່​ ທ່ານ ກະ​ສິດ ພິຣົມ ລັດຖະມົນຕີ​ວ່າການ​ກະຊວງການ ຕ່າງປະ​ເທດ​ຂອງ​ໄທໄດ້​ຖະ​ແຫລ​ງ ຢືນຢັນ​ວ່າ:

ເລື້ອງຂອງແຮງ​ງານ​ລາວໃນ​ໄທ ທີ່​ມີ​ປະ​ມານ 50,000 ກວ່າ​ຄົ້ນນັ້ນ. ​ນະ​ວັນນີ້ກໍ​ຂຶ້ນທະບຽນໄປ​ແລ້ວ 30,000 ກວ່າ​ຄົນ ແລ້ວກໍ​ເຫລືອ​ອີກໝື່ນກວ່າ​ຄົນ​ທີ່ຈະ​ລ້ວມກັນ ໃນ​ການ​ທີ່​ຈະພິສູດ​ວ່າເປັນ​ຊາວ​ລາວ ແລ້ວ​ກໍຂຶ້ນກັບ​ທະບຽນ ​ແລະ ກໍ​ໃຫ້​ມີ​ການ​ຈັດ​ແຣງ​ງານ​ລາວ ທຳ​ງານ​ໃນ​ປະ​ເທດ​ໄທຢ່າງ​ມີ​ລະບົບ ​ໄມ້​ໃຫ້​ເປັນ​ສ່ວນ​ນຶ່ງ​ໃນ​ການ​ຄ້າ​ມະນຸດ ຫລື ​ໃຫ້​ມີ​ການ​ຂຸດ​ຣີດ ຫລື ວ່າ​ຈ້າງໃນທາງໄມ້​ຢຸດຕິ​ທຳ ໄປ​ທຳ​ງານ​ໃນ​ອາຊີບ​ທີ່​ໄມ້​ເໝາະສົມ.


XS
SM
MD
LG