<!-- IMAGE -->
ຂ່າວກອງປະຊຸມສຸດຍອດວ່າດ້ວຍນີວເຄລັຍ: ກອງປະຊຸມສຸດຍອດວ່າດ້ວຍນີວເຄລັຍເປັນເວລາສອງມື້ທ່ີກຸງວໍຊິງຕັນຈະເສັດສິ້ນລົງໃນວັນອັງຄານມື້ນີ້ ໂດຍເພ່ງເລັງໃສ່ການປ້ອງກັນບໍ່ໃຫ້ພວກວັດຖຸນີວເຄລັຍໄປຕົກຢູ່ໃນກຳມືຂອງພວກກໍ່ການຮ້າຍ. 47 ຊາດທ່ີມາຮ່ວມກອງປະຊຸມສຸດຍອດພາຍໃຕ້ການເປັນເຈົ້າພາບຂອງປະທານາທິບໍດີບາຣັກໂອບາມາ ແຫ່ງສະຫະຣັດ ວາງແຜນທ່ີຈະອອກຖະແຫລງການຮ່ວມສະບັບນຶ່ງທ່ີໃຫ້ຄຳໝັ້ນສັນຍາໃນການຮັກສາວັດຖຸນີວເຄລັຍຂອງຕົນໃຫ້ໄດ້ພາຍໃນ 4 ປີຂ້າງໜ້ານີ້. ບັນດານັກຊ່ຽວຊານກ່າວວ່າ ປັດຈຸບັນໂລກມີວັດຖຸນີວເຄລັຍໃນລະດັບສູງພໍທ່ີຈະສາມາດຜລິດອາວຸດນີວເຄລັຍໄດ້ຢ່າງນ້ອຍ 120 ພັນ ແລະໄດ້ສະແດງຄວາມເປັນຫ່ວງກ່ຽວກັບວ່າພວກວັດຖຸນີວເຄລັຍເຫລົ່ານີ້ບາງສ່ວນສາມາດ
ຕົກຢູ່ໃນກຳມືພວກກໍການຮ້າຍໄດ້. ກ່ອນກອງປະຊຸມສຸດຍອດໄຂຂຶ້ນໃນວັນຈັນວານນີ້ ທ່ານໂອບາມາໄດ້ພົບປະກັບທ່ານຫູຈິນເຖົາ ປະທານປະເທດຈີນ ແລະໄດ້ເຫັນດີນຳກັນທ່ີ
ຈະເພີ່ມທຳຄວາມກົດດັນໃສ່ອິຣ່ານຫລາຍຂຶ້ນ ເພື່ອໃຫ້ອິຣ່ານຢຸດເຊົາໂຄງການນີວເຄລັຍຂອງຕົນນັ້ນ. ແຕ່ໃດໆມາຈີນບໍ່ມີຄວາມເຕັມໃຈປານໃດທ່ີຈະທຳການລົງໂທດຕື່ມອີກຕໍ່ຣັດຖະບານກຸງເຕຮິຣ່ານ ນັ້ນ.
ອິຣ່ານ ເກົາຫລີເໜືອແລະຊີເຣັຍ ທ່ີໄດ້ຖືກຕຳໜິຕິຕຽນຢ່າງຫລວງຫລາຍຈາກຝ່າຍຕາເວັນຕົກ ຍ້ອນມີຄວາມສົງໄສກ່ຽວກັບໂຄງການນີວຂອງເຂົາເຈົ້ານັ້ນ ບໍ່ໄດ້ຖືກເຊື້ອເຊີນມາຮ່ວມໃນກອງປະຊຸມສຸດຍອດຄັ້ງນີ້.
ທີ່ Kyrgyzstan:ຣັດຖະບານທ່ີປະກາດຕົນເອງເປັນຣັດຖະບານຊົ່ວຄາວຂອງ Kyrgyzstan
<!-- IMAGE -->
ໄດ້ອອກຄຳຂາດຕໍ່ປະທານາທິບໍດີ Kurmanbek Bakiyev ທ່ີໄດ້ຖືກປົດອອກຈາກຕຳແໜ່ງໄປນັ້ນໃຫ້ທ່ານເຂົ້າມອບໂຕທ່ີນະຄອນຫລວງ Bishkek ໃນຕອນບ່າຍມື້ນີ້ ບໍ່ດັ່ງນັ້ນຈະປະເຊີນກັບການຖືກຈັບກຸມໂດຍກຳລັງພິເສດ. ຣັດຖະມຸນຕີຄວາມປອດໄພແຫ່ງຊາດຂອງຣັດຖະບານໃໝ່ ກ່າວໃນວັນອັງຄານມື້ນີ້ວ່າ ສິດທິພິເສດທ່ີທ່ານBakiyev ມີໃນຖານະເປັນປະທານາທິບໍດີນັ້ນໄດ້ຖືກຕັດຖິ້ມໄປແລ້ວ ແລະໄດ້ມີການໄຂການດຳເນີນຄະດີອາຊຍາຕໍ່ທ່ານແລ້ວ. ທ່ານ Bakiyev ໄດ້ຫລົບໜີຈາກນະຄອນຫລວງໄປໃນສັບປະດາແລ້ວນີ້ ຫລັງຈາກມີການປະທະກັນຫລາຍບັ້ນລະຫວ່າງພວກຕຳຫລວດແລະພວກປະທ້ວງ ຊຶ່ງໄດ້ເຮັດໃຫ້ປະຊາຊົນເສຍຊີວິດໄປປະມານ 80 ຄົນແລະບາດເຈັບຕື່ມອີກຫລາຍຮ້ອຍຄົນນັ້ນ. ນັບແຕ່ນັ້ນມາ ທ່ານ Bakiyev ໄດ້ພະຍາຍາມຫາການສະໜັບສະໜຸນຈາກປະຊາຊົນໃນພາກໃຕ້ຂອງ Kyrgyzstan ແລະໄດ້ກ່າວຕໍ່ພວກສະໜັບສະໜຸນທ່ານຫລາຍພັນຄົນໃນວັນອັງຄານມື້ນີ້ທ່ີຈັດຕຸຣັດແຫ່ງນຶ່ງໃນເມືອງ Jalalabad ວ່າ ທ່ານບໍ່ຮັບຮູ້ການເຄື່ອນໄຫວຕ່າງໆຂອງຣັດຖະບານຊົ່ວຄາວນີ້ ແລະເວົ້າວ່າ ອຳນາດຂອງທ່ານມາຈາກປະຊາຊົນບໍ່ແມ່ນມາຈາກທ່ານເອງ. ເຖິງຢ່າງໃດກໍດີ ທ່ານກ່າວວ່າ ທ່ານມີຄວາມເຕັມໃຈທ່ີຈະທຳການເຈຣະຈາກັບພວກປົກຄອງໃໝ່.
ຂ່າວຄືບໜ້າຂອງການປະທ້ວງທີ່ໄທ: ຣັດຖະມຸນຕີການຕ່າງປະເທດໄທ ກ່າວປະນາມທ່ານທັກສິນ ຊິນນະວັດອະດີດນາຍົກຣັດຖະມຸນຕີທ່ີໄດ້ຖືກໂຄ່ນລົ້ມໄປນັ້ນ ໂດຍກ່າວຫາຜູ້ກ່ຽວວ່າເປັນຜູ້ຍຸຍົງກໍ່ໃຫ້ເກີດການປະທ້ວງຕາມຖະໜົນຫົນທາງສາຍຕ່າງໆໃນບາງກອກທ່ີພາໃຫ້ມີຜູ້ຄົນເສຍຊີວິດໄປນັ້ນແລະເປັນຜູ້ກໍ່ການຮ້າຍທ່ີໜ້າເລືອດ. ໃນການກ່າວຖ້ອຍຖະແຫລງໃນວັນຈັນວານນີ້ ນອກກອງປະຊຸມສຸດຍອດວ່າດ້ວຍນີວເຄລັຍຂອງໂລກທ່ີກຸງວໍຊິງຕັນ ທ່ານກະສິດພິຣົມ ສົມທຽບທ່ານທັກສິນໃສ່ກັບພວກຜະເດັດການເຊັ່ນ: Hitler, Mussolini ແລະ Stalin. ບັນດາເຈົ້າໜ້າທ່ີໄທທ່ີກອງປະຊຸມ ຮຽກຮ້ອງໃຫ້ປະຊາຄົມໂລກຮຽກຮ້ອງໃຫ້ພວກປະທ້ວງຕໍ່ຕ້ານຣັດຖະບານທຳການເຈຣະຈາກັບຣັດຖະບານເພື່ອຫລີກລ້ຽງການແຊກແຊງຂອງທະຫານນັ້ນ.
ໃນວັນຈັນວານນີ້ເຊັ່ນກັນ ຫົວໜ້າກອງທັບໄທທ່ີມີອິດທິພົນໄດ້ຮຽກຮ້ອງໃຫ້ຍຸບສະພາແລະໃຫ້ຈັດການເລືອກຕັ້ງຂຶ້ນກ່ອນກຳນົດ ຊຶ່ງຈະເປັນຊ່ອງທາງທ່ີດີທ່ີສຸດເພື່ອເຮັດໃຫ້ການປະທ້ວງຕໍ່ຕ້ານຣັດຖະບານຍຸດຕິລົງ.
ນາຍພົນອະນຸພົງ ເຜົ່າຈິນດາ ກ່າວວ່າ ທ່ານບໍ່ຢາກໃຊ້ກຳລັງຕໍ່ຕ້ານກັບພວກປະທ້ວງເສື້ອແດງຕໍ່ຕ້ານ
ຣັດຖະບານທ່ີກຳລັງຮຽກຮ້ອງໃຫ້ນາຍົກຣັດຖະມຸນຕີອະພິສິດເວດຊາຊີວະລາອອກຈາກຕຳແໜ່ງນັ້ນ.
ນາຍພົນອະນຸພົງກ່າວຕື່ມວ່າ ການຍຸບສະພາປາກົດວ່າ ເປັນບາດກ້າວທ່ີມີເຫດມີຜົນທ່ີຈະຄວນເຮັດ.
ສະຫະຣັດແລະຈີນ: ປະທານາທິບໍດີບາຣັກໂອບາມາແຫ່ງສະຫະຣັດກ່າວຕໍ່ທ່ານຫູຈິນເຖົາປະທານ
ປະເທດຈີນໃນວັນຈັນວານນີ້ທ່ີກຸງວໍຊິງຕັນໃຫ້ປັບອັດຕາແລກ
ປ່ຽນເງິນຕາຂອງຕົນໃສ່ກັບອັດຕາແລກປ່ຽນຕາມກົນໄກຕະຫລາດເສຣີຫລາຍຂຶ້ນ. ກ່ອນໄຂກອງປະຊຸມສຸດຍອດວ່າດ້ວຍນີວເຄລັຍຢ່າງເປັນທາງການ ທ່ານຫູ ກ່າວວ່າ ຈີນຈະດຳເນີນການຢ່າງໜັກແໜ້ນຕາມແນວທາງຂອງຕົນເອງເພື່ອປະຕິຮູບເງິນຢວນຂອງຕົນນັ້ນ. ກ່ອນໜ້າການໄຂກອງປະຊຸມສຸດຍອດວ່າດ້ວຍນີວເຄລັຍຢ່າງເປັນທາງການ ທ່ານຫູ ກ່າວຕໍ່ປະທານາທິບໍດີບາຣັກໂອບາມາວ່າ ການເພ່ີມຄ່າເງິນຢວນຂຶ້ນຈະບໍ່ແກ້ໄຂບັນຫາຄົນຫວ່າງງານໃນສະຫະຣັດແລະຈະບໍ່ລົດຄວາມບໍ່ກ້ຳເກິ່ງທາງດ້ານການຄ້າ ລະຫວ່າງກຸງວໍຊິງຕັນແລະກຸງປັກກິງນັ້ນລົງແຕ່ຢ່າງໃດ.
ສະຫະຣັດເຄີຍກ່າວມາວ່າ ການຄວບຄຸມຄ່າເງິນຕາຂອງຈີນທ່ີໃຫ້ຢູ່
ໃນອັດຕາຕ່ຳຜິດທັມມະດານັ້ນ ເຮັດໃຫ້ຜລິດຕະພັນຂອງຈີນມີລາຄາ
ຖືກກວ່າລາຄາໃນຕະຫລາດໂລກ. ທ່ານໂອບາມາ ກ່າວວ່າ ຕະຫລາດຂອງໂລກຄວນຈະເປັນຜູ້ກຳນົດວ່າເງິນຢວນຈະມີລາຄາເທົ່າໃດນັ້ນ.
ຄວາມເຄັ່ງຕຶງລະຫວ່າງສອງເກົາຫລີ: ບັນດາເຈົ້າໜ້າທ່ີກຸງໂຊນ ກ່າວວ່າ ເກົາຫລີເໜືອໄດ້ປິດພວກຕຶກອາຄານທ່ີເກົາຫລີໃຕ້ເປັນເຈົ້າຂອງຈຳນວນນຶ່ງລົງ ທ່ີສະຖານທ່ີຕາກອາກາດແຫ່ງນຶ່ງຢູ່ເທິງພູຂອງເກົາຫລີເໜືອໃນວັນອັງຄານມື້ນີ້ ຊຶ່ງເປັນເວລາ 2ປີຫລັງຈາກຣັດຖະ ບານກຸງໂຊນໄດ້ຢຸດການທ່ອງທ່ຽວໄວ້ຊົ່ວຄາວທ່ີສະຖານທ່ີທ່ອງທ່ຽວລົງທຶນຮ່ວມກັນລະຫວ່າງສອງປະເທດ. ກະຊວງທ້ອນໂຮມເກົາຫລີໃຕ້ກ່າວວ່າ ເກົາຫລີເໜືອໄດ້ຕິດປ້າຍອັດໄວ້ທ່ີສູນກາງພົບປະ ລະຫວ່າງຄອບຄົວ ທ່ີສະຖານີດັບເພີງ ສູນກາງວັດທະນະທັມ ພ້ອມທັງສະຖານທ່ີພັກຟື້ນນ້ຳພຸ ແລະຮ້ານຄ້າທ່ີຍົກເວັ້ນ
ພາສີນັ້ນ. ນອກນັ້ນກຸງພຽງຢັ້ງຍັງສັ່ງໃຫ້ຊາວເກົາຫລີໃຕ້ເຊື້ອສາຍຈີນ 4 ຄົນທ່ີເຮັດວຽກໃນສະຖານທ່ີຕາກອາກາດດັ່ງກ່າວໃຫ້ອອກຈາກປະເທດໄປພາຍໃນ 48 ຊົ່ວໂມງເຊັ່ນກັນ. ກຸງພຽງຢັ້ງໄດ້ປະກາດໃນສັບປະດາຜ່ານມາວ່າ ຕົນຈະຖອນໂຕອອກຈາກສະຖານທ່ີຕາກອາກາດເທິງພູ Mount Kumgang ທ່ີບໍ່ໄດ້ເປີດບໍລິການມາຕັ້ງແຕ່ກຸງໂຊນ ຢຸດການທ່ອງທ່ຽວຂອງຕົນລົງໃນປີ 2008 ນັ້ນ. ກຸງໂຊນຢຸດການນຳນັກທ່ອງທ່ຽວໄປທ່ຽວໃນເຂດດັ່ງກ່າວ ຫລັງຈາກທະຫານເກົາຫລີເໜືອຄົນນຶ່ງຍິງນັກທ່ອງທ່ຽວຊາວເກົາຫລີໃຕ້ຄົນນຶ່ງຕາຍທ່ີໄດ້ຫລົງເຂົ້າໄປໃນເຂດຫາດຊາຍແຄມທະເລທ່ີຫວງຫ້າມແຫ່ງ
ນຶ່ງນັ້ນ.
