ລິ້ງ ສຳຫລັບເຂົ້າຫາ

ມືປືນ ໃນເຄື່ອງແບບທະຫານ ໄດ້ສັງຫານຢ່າງນ້ອຍ 24 ຄົນ ໃນອີຣັກ


ມືປືນ ໃນເຄື່ອງແບບທະຫານ ໄດ້ສັງຫານຢ່າງນ້ອຍ 24 ຄົນ ໃນອີຣັກ
<!-- IMAGE -->

ອີຣັກ: ເຈົ້າໜ້າທີ່ອີຣັກ ກ່າວວ່າ ມືປືນ ທີ່ໃສ່ ເຄື່ອງແບບທະຫານ ໄດ້ບຸກເຂົ້າໄປ ໃນ 3 ຫລັງເຮືອນ ທີ່ບ້ານພວກນັບຖືສາສນາອິສລາມ ນິກາຍຊຸນນີ່ແຫ່ງນຶ່ງ ໃກ້ໆນະຄອນຫລວງ ແບັກແດັດແລະໄດ້ສັງຫານຢ່າງນ້ອຍ 24 ຄົນ. ຕຳຣວດກ່າວວ່າ ພວກເຄາະຮ້າຍ ທີ່ຮວມທັງ ແມ່ຍິງ 5 ຄົນ ໄດ້ຖືກໃສ່ກັບກັບມືໄວ້ ກ່ອນຈະ ຖືກຍິງທີ່ຫົວໃນຕອນເດິກ ຂອງຄືນວັນສຸກວານ ນີ້ ຢູ່ທີ່ບ້ານ ARAB JABOUR ທາງທິດ ໃຕ້ຂອງນະຄອນຫລວງ ແບັກແດັດ. ນອກນັ້ນ ຍັງມີການພົບເຫັນວ່າ ມີຢ່າງນ້ອຍ 7 ຄົນ ທີ່ ຖືກມັດມືໄວ້ ຍັງມີຊີວິດຢູ່ ຫຼັງຈາກ ໄດ້ມີການ ສັງຫານໝູ່ເກີດຂຶ້ນ. ເຈົ້າໜ້າທີ່ ກະຊວງພາຍໃນອີຣັກເວົ້າວ່າ ຈຳນວນຜູ້ເສັຽຊີວິດ ແມ່ນມີ 25 ຄົນ ຂະນະທີ່ ໂຄສົກຂອງກຳລັງຮັກສາຄວາມສະງົບ ໃນເຂດນະຄອນຫຼວງແບັກແດັດ ກ່າວວ່າ ມີ 24 ຄົນ ຖືກຂ້າຕາຍ. ເຈົ້າໜ້າທີ່ອີຣັກ ໄດ້ປິດລ້ອມບໍຣິເວນ ທີ່ເກີດເຫດແລະ ຈັບກຸມຢ່າງນ້ອຍ 25 ຄົນທີ່ພົວພັນ ໃນການສັງຫານຄັ້ງນີ້. ເຈົ້າໜ້າທີ່ເວົ້າວ່າ ຫຼາຍໆຄົນ ຂອງພວກທີ່ເສັຽຊີວິດ ເປັນສະມາຊິກຂອງ ຂະບວນການຕື່ນໂຕໃໝ່ ຊຶ່ງເປັນກຸ່ມທະຫານ ບ້ານຊຸນນີ່ ທີ່ໄດ້ຮັບການສນັບສນຸນ ຈາກຣັຖບານ ທີ່ຊ່ອຍສະຫະຣັດ ແລະທະຫານອີຣັກ ໃນການສູ້ຣົບ ກັບກຸ່ມກໍ່ການຮ້າຍ ອາລກາຍດາ ໃນປີ 2006 ແລະ 2007.

<!-- IMAGE -->

ອັຟການິສຖານ - ເຢັຽຣະມັນ: ກອງທັບ ເຢັຽຣະມັນກ່າວວ່າ ທະຫານຂອງຕົນ ໄດ້ສັງ ຫານທະຫານອັຟການິສຖານ 5 ຄົນ ດ້ວຍ ຄວາມຜິດພາດ ຢູ່ໃນພາກເໜືອຂອງອັຟກາ ນິສຖານ. ເຈົ້າໜ້າທີ່ເຢັຽຣະມັນ ກ່າວໃນວັນ ເສົາມື້ນີ້ວ່າ ເຫດຮ້າຍດັ່ງກ່າວເກີດຂຶ້ນຂະນະ ທີ່ພວກທະຫານເຫລົ່ານີ້ ພວມເດີນທາງໄປ ຍັງບໍຣິເວນ ທີ່ໄດ້ເກີດການປະທະກັນ ຢ່າງ ຮ້າຍແຮງ ກັບພວກກະບົດທາລີບານ ໃກ້ໆ ເມືອງ KUNDUZ ໃນຕອນເດິກຂອງຄືນວັນ ສຸກວານນີ້. ເຈົ້າໜ້າທີ່ເຢັຽຣະມັນ ເວົ້າວ່າ ໜ່ວຍລາຕເວນ ຂອງເຢັຽຣະມັນ ໄດ້ຣະດົມຍິງ ເຂົ້າໃສ່ ຣົດພົລເຮືອນ ທີ່ບໍ່ຕິດເຄື່ອງໝາຍ ທີ່ບໍ່ຍອມ ປະຕິບັດຕາມຄຳສັ່ງ ໃຫ້ຢຸດ ຫລັງຈາກ ໄດ້ມີການເຕືອນ. ຕໍ່ມາທະຫານເຢັຽຣະມັນ ຈຶ່ງພົບເຫັນວ່າ ເປັນທະຫານອັຟການິສຖານ ຢູ່ຂ້າງໃນຣົດ. ທະຫານເຢັຽຣະມັນ ໄດ້ຖືກສົ່ງໄປຍັງ ບ່ອນທີ່ເກີດການຍິງຕໍ່ສູ້ກັນ ກັບພວກກະບົດທາລີບານ ທີ່ໄດ້ສັງຫານ ທະຫານເຢັຽຣະມັນ 3 ຄົນ ແລະອີກຈຳນວນນຶ່ງ ໄດ້ຮັບບາດເຈັບ ໃນຕອນເຊົ້າ ຂອງມື້ວານນີ້. ສ່ວນຢູ່ໃນພາກໃຕ້ ອັຟການິສຖານນັ້ນ ອົງການ NATO ກ່າວວ່າ ທະຫານຂອງຕົນຄົນນຶ່ງ ໄດ້ເສັຽຊີວິດ ຍ້ອນຣະເບີດແຄມທາງ ໃນມື້ວານນີ້.

<!-- IMAGE -->

ອັຟການິສຖານ: ປະທານາທິບໍດີອັຟການິສ ຖານທ່ານ HAMID KARZAI ໄດ້ໂທຣະສັບ ມາຫາ ຣັຖມຸນຕຣີການຕ່າງປະເທດສະຫະຣັດ ທ່ານນາງ HILLARY CLINTON ໃນຄວາມ ພະຍາຍາມ ເພື່ອບໍ່ຢາກໃຫ້ ການໃຫ້ທັສນະ ຄວາມເຫັນຂອງທ່ານທີ່ກ່າວຫາປະຊາຄົມນາໆ ຊາດວ່າ ເປັນຜູ້ຢູ່ເບື້ອງຫຼັງການສໍ້ໂກງຄະແນນ ສຽງ ໃນການເລືອກຕັ້ງຢູ່ອັຟການິສຖານ ໃນປີ ກາຍນີ້ນັ້ນ ກາຍເປັນບັນຫາໂຕ້ແຍ້ງ. ໂຄສົກ ກະຊວງການຕ່າງປະເທດສະຫະຣັດທ່ານ P.J. CROWLEY ກ່າວວ່າ ປະທານາທິບໍດີ KARZAI ໄດ້ໃຫ້ການຢືນຢັນ ອີກຄັ້ງນຶ່ງ ເຖິງ ຄວາມໝາຍໝັ້ນ ຕັ້ງໃຈຂອງທ່ານ ກ່ຽວກັບການເປັນພາຄີ ລະຫວ່າງ ສະຫະຣັດ ແລະອັຟການິສຖານ ແລະໄດ້ສະແດງ ຄວາມກະຕັນຍູ ຕໍ່ການໃຫ້ຄວາມຊ່ອຍເຫລືອ ແລະ ການເສັຽສະລະ ຂອງປະຊາຄົມນາໆຊາດ. ກ່ອນນັ້ນ ເຈົ້າໜ້າທີ່ອະວຸໂສຄົນນຶ່ງ ຂອງກະຊວງ ການຕ່າງປະເທດ ສະຫະຣັດ ກ່າວຕໍ່ VOA ກ່ຽວກັບການສົນທະນາ ຫາຣືດັ່ງກ່າວວ່າ ເປັນໄປໃນທາງສ້າງສັນ ແລະເວົ້າວ່າ ທັງສອງຝ່າຍ ພ້ອມແລ້ວ ທີ່ຈະກ້າວໄປທາງໜ້າ. ເຈົ້າໜ້າທີ່ທ່ານນີ້ ເວົ້າວ່າ ທ່ານ KARZAI ໄດ້ສະແດງຄວາມຕື່ນຕົກໃຈ ທີ່ການໃຫ້ທັສນະ ຄວາມເຫັນຂອງທ່ານ ໄດ້ພາໃຫ້ເກີດ ຄວາມຮູ້ສຶກບໍ່ພໍໃຈ.

<!-- IMAGE -->

ໄທ: ພວກປະທ້ວງເສື້ອແດງຈຳນວນຫລາຍ ສິບພັນຄົນ ທີ່ຈົງຮັກພັກດີຕໍ່ອະດີດນາຍົກຣັຖ ມຸນຕຣີທັກສິນ ຊິນນະວັດ ທີ່ຖືກໂຄ່ນລົ້ມນັ້ນ ໄດ້ຈັດການໂຮມຊຸມນຸມປະທ້ວງ ຄັ້ງໃຫຍ່ອີກ ເທື່ອນຶ່ງ ຢູ່ບາງກອກ ໃນວັນເສົາມື້ນີ້ ໃນບໍຣິ ເວນຍ່ານການຄ້າຫລູຫລາຣາຄາແພງ. ຮ້ານ ໃຫຍ່ໆຫລາຍຮ້ານ ໄດ້ປິດກິຈການຂອງຕົນ ເພື່ອຮັບມືກັບການປະທ້ວງ ແລະການຂົ່ມຂູ່ ຂອງພວກເສື້ອແດງ ທີ່ວ່າ ພວກເຂົາເຈົ້າຈະ ສືບຕໍ່ ເດີນຂະບວນປະທ້ວງ ຕລອດຄືນ. ການ ໂຮມຊຸມນຸມ ໄດ້ດຳເນີນໄປ ດ້ວຍຄວາມສະງົບ. ຕຳຣວດກະປະມານວ່າ ຈຳນວນ ຂອງ ພວກປະທ້ວງແມ່ນມີກາຍ 55 ພັນຄົນ. ເມື່ອນຶ່ງອາທິດຜ່ານມາພວກປະທ້ວງ ເສື້ອແດງ ປະມານ 80 ພັນຄົນ ໄດ້ບັງຄັບໃຫ້ທະຫານຣັຖບານໄທ ຕ້ອງໄດ້ຖອນອອກໄປ ຈາກບ່ອນ ປະຈຳການ ຫຼາຍໆຈຸດ ໃນເຂດໃຈກາງຂອງບາງກອກ ເພື່ອຫລີກລ້ຽງ ບໍ່ໃຫ້ເກີດ ການປະ ເຊີນໜ້າ. ນັບແຕ່ໄດ້ມີ ການກໍ່ຣັຖປະຫານ ໂຄ່ນລົ້ມທ່ານທັກສິນ ໃນປີ 2006 ເປັນຕົ້ນມາ ປະເທດໄທ ກໍໄດ້ເກີດຄວາມວຸ້ນວາຍ ຍ້ອນການ ໂຮມຊຸມນຸມປະທ້ວງ ໃຫຍ່ໆຫລາຍໆຄັ້ງ ໂດຍພວກເສື້ອແດງ ແລະພວກເສື້ອເຫລືອງ ຊຶ່ງເປັນຄູ່ປໍຣະປັກ ທີ່ໃຫ້ການສນັບສນຸນ ຣັຖບານຊຸດປັດຈຸບັນ ຂອງໄທ.

<!-- IMAGE -->

ຈີນ: ສື່ມວນຊົນຂອງຈີນລາຍງານວ່າ ໃນວັນ ເສົາມື້ນີ້ ພວກກູ້ພັຍແລະມະນຸດກົບ ໄດ້ເຂົ້າໄປ ໃນບໍ່ຖ່ານຫີນ ບ່ອນທີ່ພວກຄົນງານ 153 ຄົນ ຍັງຕົກຄ້າງຢູ່ຂ້າງໃນ ມາໄດ້ເກືອບ ນຶ່ງອາທິດ ແລ້ວນັ້ນ. ອົງການຂ່າວຊິນຫວາຂອງທາງການ ຈີນແຈ້ງວ່າ ຄະນະກູ້ພັຍ 13 ຄົນ ຊຶ່ງຮວມທັງ ມະນຸດກົບ 6 ຄົນ ໄດ້ເຂົ້າໄປໃນບໍ່ຖ່ານຫີນ ທີ່ ຖືກນຳຖ້ວມ ຢູ່ທີ່ແຂວງ SHANXI ຂອງຈີນ ຫລັງຈາກໄດ້ຍິນສຽງເຄາະ ໃນຕອນບ່າຍຂອງ ວັນສຸກວານນີ້. ຄະນະກູ້ພັຍຈຸນຶ່ງໄດ້ຍິນສຽງໃນອັນທີ່ປາກົດວ່າ ເປັນສຽງຄົນເຄາະທໍ່ໂລຫະ ຂະນະທີ່ ພວກກູ້ພັຍ ອີກຈຸນຶ່ງເຊື່ອວ່າ ຕົນໄດ້ຍິນສຽງຮ້ອງດັງມາຈາກທາງໃນຂອງບໍ່. ແຕ່ ແນວໃດກໍຕາມ ມາຈົນຮອດຕອນບ່າຍ ວັນເສົາມື້ນີ້ ກໍຍັງບໍ່ໄດ້ຮັບຂ່າວຄາວໃໝ່ໃດໆເທື່ອ. ພວກຄົນງານ ໄດ້ຕົກຄ້າງຢູ່ຂ້າງ ໃນເວລານຳ ໄດ້ໄຫລເຂົ້າຖ້ວມ ປ່ອງຮູທາງລົງທີ່ບໍ່ຖ່ານ ຫີນ WANGJIALING ໃນມື້ວັນອາທິດແລ້ວ. ມີພວກຄົນງານ ບໍ່ຖ່ານຫີນ ຫລາຍກວ່າ 100 ຄົນ ສາມາດຫລົບໜີ ອອກມາທັນ.

<!-- IMAGE -->

ອີຣ່ານ: ປະທານາທິບໍດີອີຣ່ານ ທ່ານ MAH MOUD AHMADINEJAD ກ່າວວ່າ ການ ຂົ່ມຂູ່ ທີ່ຈະລົງໂທດ ຍ້ອນໂຄງການນິວເຄລັຽ ຂອງຕົນນັ້ນມີແຕ່ຈະເຮັດໃຫ້ອີຣ່ານ ມີການຕັດ ສິນໃຈ ທີ່ແນ່ວແນ່ຫລາຍຂຶ້ນ ທີ່ຈະສືບຕໍ່ໂຄງ ການນິວເຄລັຽຂອງຕົນ. ທ່ານ AHMADINE JAD ກ່າວໃນວັນເສົາມື້ນີ້ວ່າການກົດດັນຂອງ ນາໆຊາດຕໍ່ອີຣ່ານ ບໍ່ສາມາດທີ່ຈະສະກັດກັ້ນ ຄວາມກ້າວໜ້າຂອງສາທາຣະນະຣັດ ອິສລາມ ແລະແຮງດົນໃຈ ຂອງປະຊາຊົນອີຣ່ານໄດ້. ທ່ານໃຫ້ທັສນະດັ່ງກ່າວ ໃນລະຫວ່າງ ການກ່າວ ຄຳປາສັຍ ທາງໂທຣະພາບ ທີ່ເມືອງ SIRJAN ໃນພາກໃຕ້ຂອງ ປະເທດອີຣ່ານ. ປະທານາທິບໍດີສະຫະຣັດ ທ່ານ BARACK OBAMA ຮຽກຮ້ອງໃຫ້ ບັນດາສະມາຊິກ ໃນສະພາຄວາມໝັ້ນຄົງ ຂອງອົງການສະຫະປະຊາຊາດ ໃຫ້ການອະນຸມັດ ຕໍ່ການລົງໂທດຮອບທີ 4 ຕໍ່ອີຣ່ານ ຍ້ອນກິຈກັມນິວເຄລັຽ ຂອງປະເທດ ດັ່ງກ່າວ. ປະທານທິບໍດີ AHMADINEJAD ກ່າວໃນວັນເສົາມື້ນີ້ວ່າ ປະທານາທິບໍດີ OBAMA ໄດ້ປະສົບກັບ ຄວາມລົ້ມແຫຼວ ໃນການທີ່ຈະນຳມາ ຊຶ່ງການປ່ຽນແປງ ຢ່າງແທ້ຈິງ ຢູ່ໃນນະໂຍບາຍ ຂອງສະຫະຣັດ ຕໍ່ອີຣ່ານ ທັງໆທີ່ທ່ານ OBAMA ໄດ້ໃຫ້ຄຳໝັ້ນສັນຍາໄວ້ວ່າ ຈະເພີ້ມທະວີ ການພົວພັນກັບອີຣ່ານ.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG