ຂ່າວສະພາຮັບຜ່ານຮ່າງກົດໝາຍວ່າດ້ວຍການປະຕິຮູບລະບົບຮັກສາສຸຂະພາບຂອງສະຫະຣັດ:
ສະພາຕ່ຳສະຫະຣັດໄດ້ຮັບຜ່ານຮ່າງກົດໝາຍວ່າດ້ວຍການປະຕິຮູບລະ ບົບສຸຂະພາບຂອງສະຫະຣັດ ດ້ວຍຄະແນນສຽງລື່ນກັນຢ່າງວຸດວິດ ໂດຍໄດ້ມອບໄຊຊະນະໃຫ້ປະທານາທິບໍດີບາຣັກໂອບາມາ ໃນການຕໍ່ສູ້ເພື່ອບຸລິມະສິດອັນດັບສູງສຸດ ຂອງນະໂຍບາຍພາຍໃນປະເທດຂອງທ່ານ.
ສະພາຕ່ຳທ່ີຄອບງຳໂດຍພັກເດໂມກຣັດ ໄດ້ຮັບຜ່ານຮ່າງຍັດຕິທ່ີສະພາ ສູງໄດ້ຮັບຮອງເອົາແລ້ວນັ້ນໃນຄືນວັນອາທິດວານນີ້ ດ້ວຍຄະແນນສຽງ ເຫັນດີ 219 ຕໍ່ 212 ສຽງຄັດຄ້ານ. ພວກສະມາຊິກພັກRepublican ທ່ີມີສຽງຂ້າງນ້ອຍໃນສະພາ ໄດ້ພາກັນຄັດຄ້ານຕໍ່ຮ່າງຍັດຕິດັ່ງກ່າວ ຢ່າງເປັນເອກະສັນ ແລະສະມາຊິກພັກເດໂມກຣັດ 34 ທ່ານ ໄດ້ລົງ ມະຕິຄັດຄ້ານ ຮ່ວມກັບພວກສະມາຊິກພັກ Republican. ສະພາຕ່ຳ ຕ້ອງການສຽງສະໜັບສະໜຸນ 216 ສຽງ ເພື່ອຮັບຜ່ານຮ່າງກົດໝາຍສະບັບນີ້. ປະທານາທິບໍດີໂອບາມາໄດ້ກ່າວຊົມເຊີຍ ການຮັບຜ່ານຮ່າງຍັດຕິດັ່ງ ກ່າວ ຊຶ່ງໄດ້ມີຂຶ້ນຫລັງຈາກການຕໍ່ສູ້ກັນທາງການເມືອງກັນມາເປັນເວລານຶ່ງປີ ເຕັມກັບພວກສະມາຊິກພັກ Republican ນັ້ນ.
ການເອົາມາດຕາການທີ່ວ່ານີ້ ເປັນການປະຕິຮູບຄັ້ງໃຫຍ່ທ່ີສຸດຂອງລະບບົຮັກສາສຸຂະພາບຂອງສະຫະຣັດ ໃນຮອບ 4 ທົດສວັດຜ່ານມາ. ຮ່າງກົດໝາຍດັ່ງກ່າວ ແມ່ນມີວັດຖຸປະສົງເພື່ອໃຫ້ຄົນອະເມຣິກັນຈຳ ນວນ 32 ລ້ານຄົນທ່ີບໍ່ມີປະກັນໄພສຸຂະພາບ ໄດ້ເຂົ້າຮ່ວມຢູ່ໃນລະບົບ ດັ່ງກ່າວ ແລະເຮັດໃຫ້ສະຫະຣັດຫຍັບເຂົ້າໃກ້ຂຶ້ນ ກັບການເປັນປະເທດທ່ີໃຫ້ການບໍລິການດ້ານຮັກສາສຸຂະພາບແກ່ພົນລະເມືອງໝົດທຸກຄົນ.
ພວກທ່ີຕຳໜິຕິຕຽນເຕືອນວ່າ ຊາວອາເມຣິກັນຈະໄດ້ຮັບຄວາມເສັຍ ຫາຍ ຍ້ອນຮ່າງຍັດຕິສະບັບນີ້ທີ່ຈະເຮັດໃຫ້ມີການເກັບພາສີລາຍໄດ້ສູງຂຶ້ນ ຄ່າປະກັນໄພສຸຂະພາບແພງຂຶ້ນ ແລະເຮັດໃຫ້ຣັຖບານເຂົ້າແຊກແຊງໃນການຕັດສິນໃຈຕ່າງໆທາງດ້ານການແພດຫລາຍຂຶ້ນ.
ອີສຣາແອນແລະປາເລສໄຕນ໌: ທ່ານ Benjamin Netanyahu ນາຍົກຣັຖມຸນຕີອີສຣາແອນຈະພົບປະ
ກັບທ່ານນາງຮີນລາລີ ຄລິນຕັນ ຣັຖມຸນຕີການຕ່າງປະເທດສະຫະຣັດ ນຶ່ງມື້ຫລັງຈາກທ່ານໃຫ້ຄຳໝັ້ນສັນຍາວ່າ ທ່ານຈະບໍ່ຈຳກັດການກໍ່ສ້າງບ້ານເຮືອນຢູ່ໃນເຂດກ້ຳຕາເວັນອອກຂອງນະຄອນ Jerusalem ທ່ີເປັນບັນຫາໂຕ້ແຍ່ງກັນນັ້ນ. ການພົບປະຂອງທ່ານເນທັນຢາຮູກັບທ່ານນາງຄລິນຕັນໃນວັນຈັນມື້ນີ້ ແມ່ນມີຂຶ້ນທ່າມກາງສາຍພົວພັນທ່ີເຄັ່ງຕຶງຂຶ້ນລະຫວ່າງສະຫະຣັດແລະອີສຣາແອນ ທ່ີຖືກກະຕຸ້ນໃຫ້ເກີດຂຶ້ນຍ້ອນການຕັດສິນໃຈຂອງອີສຣາແອນໃນຫວ່າງໄວໆມານີ້ທ່ີຈະສ້າງບ້ານເຮືອນໃໝ່ຂຶ້ນອີກ 1600 ຫລັງໃນເຂດຕາເວັນອອກຂອງ Jerusalem ນັ້ນ. ອີສຣາແອນປະກາດແຜນການນີ້ໃຫ້ຮູ້ໃນລະຫວ່າງການຢ້ຽມຢາມຂອງ ຮອງປະທານາທິບໍດີສະຫະຣັດທ່ານ Joe Biden ທ່ີ Jerusalem ໃນຕົ້ນເດືອນນີ້ ຊຶ່ງເປັນການເຄື່ອນໄຫວທ່ີຣັຖບານໂອບາມາເອີ້ນວ່າເປັນ ການໝິ່ນປະໝາດນັ້ນ. ທ່ານເນທັນຢາຮູແລະທ່ານນາງຄລິນຕັນ ຣັຖມຸນຕີການຕ່າງປະເທດສະຫະຣັດໄດ້ໂອ້ລົມກັນທາງໂທຣະສັບໃນສັບປະດາຜ່ານມາ ເພື່ອພະຍາຍາມຜ່ອນຄາຍຄວາມເຄັ່ງຕຶງດັ່ງກ່າວລົງ. ທ່ານນາງຄລິນຕັນກ່າວວ່າ ທ່ານເນທັນຢາຮູໄດ້ໃຫ້ຄຳຕອບທ່ີເປັນປະໂຫຍດແລະມີຜົນຕໍ່ຄວາມເປັນຫ່ວງຂອງສະຫະຣັດ ກ່ຽວກັບການຕັ້ງຖິ່ນຖານໃນເຂດດັ່ງກ່າວນີ້.
ທີ່ອັຟການີສຖານ: ບັນດາເຈົ້າໜ້າທ່ີ ກ່າວວ່າ ປະທານາທິບໍດີ Hamid Karzai ໄດ້ເລີ້ມທຳການໂອ້ລົມສົນທະນາ ໃນວັນຈັນມື້ນີ້ ກັບກຸ່ມກະບົດສຳຄັນກຸ່ມນຶ່ງທ່ີ ກຳລັງທຳການຕໍ່ສູ້ກັບຣັຖບານຂອງທ່ານແລະທະຫານຕ່າງປະເທດນັ້ນ. ທາງການອັຟການີສຖານກ່າວວ່າ ປະທານາທິບໍດີ Karzai ໄດ້ພົບປະ ຢູ່ທ່ີກຸງຄາບູລກັບຄນະຜູ້ຕາງໜ້າຂັ້ນອາວຸໂສຂອງກຸ່ມ Hezb-i-Islami ຊຶ່ງເປັນກຸ່ມມຸສລິມຫົວຮຸນແຮງກຸ່ມນຶ່ງ ທ່ີເປັນປໍຣະປັກກັບກຸ່ມຕາລີບັນ. ພວກເຈົ້າໜ້າທີ່ກ່າວວ່າ ກຸ່ມ Herz-i-Islami ໄດ້ສະເໜີແຜນການສັນຕິພາບຂອງຕົນຕໍ່ປະທານາທິບໍດີ ທ່ີມີຮວມທັງຄຳຮຽກຮ້ອງໃຫ້ຖອນທະຫານຕ່າງປະເທດນຳ. ປະທານາທິບໍດີ Karzai ວາງແຜນທ່ີຈະຮຽກກອງປະຊຸມສັນຕິພາບ ເປັນເວລາ 3 ມື້ຂຶ້ນທ່ີກຸງຄາບູລ ເລີ້ມຕົ້ນໃນວັນທີ 29 ເມສາເດືອນໜ້ານີ້ ເພື່ອທຳການໂອ້ລົມສົນທະນາກັນເຣື່ອງການນຳເອົາພວກນັກ ຕໍ່ສູ້ຂອງກຸ່ມຕາລີບັນ ເຂົ້າມາຮ່ວມໃນຊີວິດພົນລະເຮືອນນຳ.
ຊາວອາເມຣິກັນປະທ້ວງກ່ຽວກັບລະບົບຄົນເຂົ້າເມືອງ ຂອງສະຫະຣັດ: ພວກປະທ້ວງຫລາຍໝື່ນຄົນ ໄດ້ພາກັນໂຮມຊຸມນຸມໃນວັນອາທິດວານນີ້ທ່ີນະຄອນຫລວງວໍຊິງຕັນ ເພື່ອຮຽກຮ້ອງໃຫ້ບັນດາສະມາຊິກຣັຖສະ ພາ ທຳການປະຕິຮູບລະບົບຄົນເຂົ້າເມືອງຂອງສະຫະຣັດ. ພວກຈັດ ການໂຮມຊຸມນຸມເວົ້າວ່າ ພວກປະທ້ວງພາກັນເດີນທາງມາຈາກທົ່ວ ສະຫະຣັດ ເພື່ອສນັບສນູນແລະຕໍ່ສູ້ເພື່ອພວກແຮງງານຕ່າງປະເທດ.
ພວກເດີນຂະບວນຫລາຍຄົນພາກັນຖືປ້າຍຕ່າງໆ ຮຽກຮ້ອງປະທານາ ທິບໍດີບາຣັກໂອບາມາ ໃຫ້ຈື່ຈຳຄຳໝັ້ນສັນຍາຂອງທ່ານເວລາໂຄສະນາ ຫາສຽງເລືອກຕັ້ງ ທີ່ວ່າຈະທຳການປົວແປງບັນຫາຄົນເຂົ້າເມືອງໃນສະຫະຣັດນັ້ນ.
ພວກເດີນຂະບວນກ່າວວ່າ ເຂົາເຈົ້າພາດຫວັງທ່ີວ່າຫລັງຈາກທ່ານໂອບາມາດຳຣົງຕຳແໜ່ງມາເປັນເວລາປີປາຍແລ້ວ ເຣື່ອງການຮັກສາສຸຂະ ພາບ ເຣື່ອງການຫວ່າງງານແລະການເສດຖະກິດໄດ້ຄອບງຳລາຍການ ຂອງທ່ານໂອບາມາ ຫລາຍກ່ວາບັນຫາຂອງເຂົາເຈົ້າ.
ກະປະມານກັນວ່າມີພວກຄົນເຂົ້າເມືອງທ່ີຜິດກົດໝາຍ ຈຳນວນ 11ລ້ານຄົນອາໄສຢູ່ໃນສະຫະຣັດ.
ໃນລະຫວ່າງການໂຄສະນາຫາສຽງເລືອກຕັ້ງ ທ່ານໂອບາມາໄດ້ກ່າວວ່າ ທ່ານຈະດຳເນີນການເພື່ອຫາທາງທ່ີຖືກຕ້ອງຕາມກົດໝາຍສຳລັບພວກເຂົ້າເມືອງຜິດກົດໝາຍເຫລົ່ານີ້ ໄດ້ເຂົ້າເປັນສັນຊາດອາເມຣິກາ ແຕ່ພວກສະ
ມາຊິກສະພາສັງກັດພັກ Republican ຄັດຄ້ານຕໍ່ອັນທີ່ເຂົ້າເຈົ້າເອີ້ນວ່າ ໂຄງການນິຣະໂທດກັມຫລືໃຫ້ອະໄພໂທດແກ່ພວກ ເຂົ້າເມືອງຜິດກົດໝາຍທັງໝົດນັ້ນ.
ມຽນມ້າແລະສະຫະປະຊາຊາດ: ພວກຊາວມຽນມ້າ 3 ກຸ່ມທ່ີຄັດຄ້ານຣັຖບານມຽນມ້າ ໄດ້ສົ່ງໜັງສືເປີດ ຊອງສະບັບນຶ່ງໄປຍັງທ່ານພັນກິມູນ ເລຂາທິການໃຫຍ່ສະຫະປະຊາຊາດ ຮຽກຮ້ອງໃຫ້ປະຊາຄົມນາໆຊາດປະຕິເສດຕໍ້ກົດໝາຍເລືອກຕັ້ງຊຸດນຶ່ງ ທ່ີຣັຖບານທະຫານມຽນມ້າໄດ້ນຳອອກເປີດເຜີຍໃຫ້ຮູ້ນັ້ນ.
ໃນຈົດໝາຍເປີດຊອງສະບັບນີ້ ກຸ່ມພັນທະມິດພຣະສົງທັງໝົດຂອງມຽນມ້າ ກຸ່ມນັກສຶກສາຮຸ່ນ88 ແລະອົງການສະມາພັນນັກສຶກສາທັງໝົດຂອງມຽນມ້າ ຮຽກຮ້ອງໃຫ້ທ່ານພັນກິມູນເນ້ນຢ້ຳອີກເທື່ອນຶຶ່ງ ຖ້ອຍຖະແຫລງຂອງທ່ານທ່ີວ່າ ຖ້າບໍ່ມີການອະນຸຍາດໃຫ້ຜູ້ນຳຝ່າຍຄ້ານ ທ່ານນາງອອງຊານຊູຈີ ແລະພວກນັກໂທດການເມືອງທ່ີສຳຄັນທັງໝົດປະກອບສ່ວນນຳແລ້ວ ການເລືອກຕັ້ງດັ່ງກ່າວກໍຈະບໍ່ເປັນການເລືອກຕັ້ງທີ່ຄົບຖ້ວນ ຮວມເອົາທຸກພັກຝ່າຍ.
ພວກກຸ່ມເຫລົ່ານີ້ຍັງຮຽກຮ້ອງທ່ານພັນກິມູນເຊັ່ນກັນ ໃຫ້ຂໍໃຫ້ພວກປະເທດສະມາຊິກສະພາຄວາມໝັ້ນຄົງ ຮຽກກອງປະຊຸມສຸກເສີນຂຶ້ນເພື່ອ ທຳການໂອ້ລົມສົນທະນາກັນເຣື່ອງສະຖານະການໃນມຽນມ້າໃຫ້ໄວເທ່ົາ ທ່ີຈະໄວໄດ້ ເພື່ອໃຫ້ຣັຖບານທະຫານເລີ້ມທຳການເຈຣະຈາກັບກຳລັງ ປະຊາທິປະໄຕແລະພວກຜູ້ຕາງໜ້າຊົນກຸ່ມນ້ອຍຕ່າງໆ ເພື່ອແກ້ໄຂບັນ ຫາທາງດ້ານການເມືອງກັນຢ່າງສັນຕິນັ້ນ.
ທ່ານຄລິນຕັນແລະທ່ານບຸຊ ເດີນທາງໄປເຮຕີ: ສອງອະດີດປະທານາທິບໍດີຂອງສະຫະຣັດ ທ່ານ Bill Clinton ແລະທ່ານ George W. Bush ຈະເດີນທາງໄປຢ້ຽມຢາມເຮຕີໃນວັນຈັນມື້ນີ້ ອັນເປັນພາກສ່ວນນຶ່ງຂອງການດຳເນີນຄວາມພະຍາຍາມຫາເງິນຮ່ວມກັນຂອງພວກທ່ານ ເພື່ອຊ່ອຍບູຣະນະສ້າງສາປະເທດເຮຕິ ທ່ີໄດ້ຮັບຄວາມເສັຍຫາຍຈາກໄພແຜ່ນດິນໄຫວຄັ້ງຮ້າຍແຮງນັ້ນ ຄືນໃໝ່.
