<!-- IMAGE -->
ອົງການ UNICEF ຫລື ກອງທຶນເດັກຂອງສະຫະປະຊາຊາດໄດ້ບົ່ງຊື່ 28 ປະເທດແລະ ດິນແດນບ່ອນທີ່ ແມ່ຍິງແລະເດັກນ້ອຍ ມີຄວາມຕ້ອງການການຊ່ວຍເຫລືອຢ່າງຮີບດ່ວນທີ່ສຸດຢູ່ໃນ “ລາຍງານກ່ຽວກັບການປະຕິບັດການດ້ານມະນຸດສະທຳ” ຫລື Humanitarian Action Report ສຳລັບປີ 2010 ຂອງຕົນ.
ອົງການ UNICEF ຫລື ກອງທຶນເດັກຂອງສະຫະປະຊາຊາດກຳລັງຮ້ອງຂໍເອົາເງິນ ຫລາຍກວ່າ 1 ຕື້ ຫລື 1 ພັນລ້ານໂດລາ ເພື່ອໃຫ້ການຊ່ວຍເຫລືອແກ່ແມ່ຍິງ ແລະ ເດັກນອ້ຍ ຢູ່ໃນ ທົ່ວໂລກ. ອົງການດັ່ງກ່າວໄດ້ນຳເອົາ “ລາຍງານກ່ຽວກັບການປະຕິບັດການດ້ານມະນຸດ ສະທຳ” ຫລື “Humanitarian Action Report” ສຳລັບປີ 2010 ຂອງຕົນອອກເຜີຍແຜ່ ເຊິ່ງລາຍງານນີ້ ໄດ້ບົ່ງຊື່ 28 ປະເທດ ແລະດິນແດນພາຍໃຕ້ການຄຸ້ມຄອງຂອງປະເທດໃດນຶ່ງ ບ່ອນທີ່ ບັນຫາວິກິດການທີ່ ຮ້າຍແຮງທີ່ສຸດຂອງໂລກບາງຢ່າງ ໄດ້ສົ່ງຜົນກະທົບຕໍ່ຜູ້ ຍິງ ແລະເດັກນ້ອຍ ຢ່າງໜັກໜ່ວງ.
ລາຍງານເວົ້າວ່າ ປະເທດເຮຕິ ນັ້ນຖືວ່າ ໄດ້ປະເຊີນກັບວິກິດການມາດົນ ກ່ອນໜ້າເກີດແຜ່ນດິນໄຫວໃນເດືອນມັງກອນນັ້ນອີກ. ທ່ານນາງ Hilde Johnson ຮອງຜູ້ອໍານວຍການ ຝ່າຍ ບໍລິຫານຂອງອົງການ UNICEF ເວົ້າວ່າ ແຜ່ນດິນໄຫວພຽງ ແຕ່ໄດ້ໃຫ້ເຮັດໃຫ້ ຄວາມຕ້ອງການການຊ່ວຍເຫລືອ ມີຄວາມຮີບ ດ່ວນ ຫລາຍຂຶ້ນເທົ່ານັ້ນ. ແຕ່ພ້ອມດຽວກັນ ທ່ານນາງກໍກ່າວ ວ່າ ເດັກນ້ອຍໃນທົ່ວໂລກ ກໍມີ ສິດທີ່ຈະໄດ້ຮັບການຊ່ວຍເຫລືອ ຄືກັນກັບ ເດັກນ້ອຍຢູ່ແຫ່ງອື່ນໆ.
<!-- IMAGE -->“ລາຍງານກ່ຽວກັບການປະຕິບັດການດ້ານມະນຸດສະທຳ” ຂອງສະຫະປະຊາຊາດ ໄດ້ເວົ້າເຖິງຫລາຍບັນຫາ ທີ່ອົງການ UNI-CEF ເຫັນວ່າ ນັບມື້ນັບເປັນໄພຂົ່ມຂູ່ຕໍ່ສິດທິພື້ນຖານ ຂອງ ແມ່ຍິງ ແລະ ເດັກນ້ອຍ ຫລາຍຂຶ້ນເລື້ອຍໆນັ້ນ. ລາຍງານນີ້ ກ່າວວ່າ ການປ່ຽນ ແປງຂອງດິນຟ້າອາກາດໄດ້ເຮັດໃຫ້ເກີດ ໄພແຫ້ງແລ້ງ ແລະ ສະພາບການຂາດແຄນອາ ຫານການກິນຫລື ຄວາມບໍ່ໝັ້ນຄົງທາງດ້ານອາຫານ ຢູ່ໃນຫລາຍໆ ຂົງເຂດ ແລະ ລາຄາ ອາຫານທີ່ຖີບຕົວສູງຂຶ້ນ ພ້ອມທັງວິກິດການທາງ ການເງິນໂລກ ໃນປີ 2008 ແລະ 2009 ນັ້ນ ຍິ່ງເພີ້ມຄວາມ ທຸກຈົນ ແລະບັນຫາການຂາດແຄນອາຫານບຳລຸງ ໃຫ້ແກ່ກຸ່ມຄົນ ພວກນີ້ ຂຶ້ນອີກ. ນອກນັ້ນ ຄວາມຂັດແຍ່ງທາງອາວຸດ ຫລື ການສູ້ຮົບກັນຍັງສືບຕໍ່ເປັນໄພ ຕໍ່ຊີວິດຂອງຄົນເປັນລ້ານໆ ຄົນ.
ທ່ານນາງ Hilde Johnson ກ່າວຕໍ່ໄປວ່າ ເດັກນ້ອຍຍາມໃດ ກໍຕົກເປັນກຸ່ມຄົນທີ່ໄດ້ຮັບ ຜົນກະທົບ ຈາກການສູ້ຮົບຫລືການ ຂັດແຍ້ງກັນ ແລະໄພພິບັດຫລາຍທີ່ສຸດ ແລະພວກ ເຂົາປະເຊີນກັບການສ່ຽງຫລາຍຂຶ້ນຕໍ່ການຖືກຂົ່ມເຫັງ ຊຶ່ງລວມທັງການຖືກ ກະທຳຮຸນແຮງ ທາງເພດ ຫລືຖືກຂົ່ມຂືນຊຳເລົາ ແລະຖືກລະ ເມີດສິດທິ ຢ່າງຮ້າຍແຮງ ໃນດ້ານອື່ນໆ ອີກ.
ອົງການ UNICEF ໄດ້ຈັດການແກ້ໄຂເຫດການສຸກເສີນ ທີ່ ເກີດຂຶ້ນຢູ່ ທົ່ວໂລກປະມານ 200 ຄັ້ງໃນແຕ່ລະປີ. ຂົງເຂດ ທີ່ຕ້ອງການ ການຊ່ວຍເຫລືອຫລາຍທີ່ສຸດໃນປີກາຍນີ້ ແມ່ນຢູ່ເຂດໃຕ້ທະເລຊາຍຊາຮາຣາ ລົງໄປ ຫລືເຂດພາກໃຕ້ຂອງອາຟຣິກກາ. ລາຍງານ ສະບັບນີ້ ເວົ້າວ່າ ໄພແຫ້ງແລ້ງ, ການ ຂາດເຂີນດ້ານສະບຽງອາຫານ ແລະ ຄວາມວຸ້ນ ວາຍຫລື ສົງຄາມກາງເມືອງຢູ່ໃນຫລາຍປະເທດໄດ້ສົ່ງຜົນກະທົບຕໍ່ຄົນປະມານ 24 ລ້ານ ຄົນ.
<!-- IMAGE -->ຄວາມຮຸນແຮງ ແລະ ການພັດພາກຈາກບ້ານເຮືອນຂອງປະຊາຊົນ ເພື່ອລົບໜີໄພສົງຄາມຢູ່ພາຍໃນປະເທດນັ້ນແມ່ນເປັນບັນຫາທີ່ຮ້າຍ ແຮງເປັນພິເສດຢູ່ໃນຊູດັງ, ຊາດ, ສາທາລະນະລັດປະຊາທິປະໄຕ ກົງໂກ ແລະ ສາທາລະນະລັດ ອາຟຣິກາກາງ.
ຢູ່ເອເຊຍ, ອົງການ UNICEF ຄາດວ່າ ຄວາມຕ້ອງການ ການຊ່ວຍ ເຫລືອດ້ານການເງິນ ຂອງຕົນ ສຳລັບໃຊ້ຈ່າຍໃນວຽກງານດ້ານມະນຸສະທຳນັ້ນ ຈະມີເພິ່ມຂຶ້ນ ເປັນຫລາຍກວ່ານຶ່ງເທົ່າໂຕ ໃນປີນີ້ ຊຶ່ງສາເຫດສ່ວນນຶ່ງ ກໍຍ້ອນວ່າ ໄດ້ມີການເອົາປະເທດ ປາກິສຖານ ແລະ ຟີລິບປິນ ເພີ້ມເຂົ້າໃສ່ໃນບັນຊີພວກປະເທດທີ່ຕ້ອງການຊ່ວຍເຫລືອ ຄັ້ງຫລ້າສຸດນີ້. ລາຍງານເວົ້າວ່າ ຢູ່ປາກິສຖານ ມີຄົນຫລາຍ ກວ່າ 2 ລ້ານຄົນ ໄດ້ຖືກພັກດັນໃຫ້ອອກ ຈາກບ້ານເຮືອນຂອງຕົນຍ້ອນ ມີການສູ້ຮົບກັນຢູ່ໃນບໍລິເວນຮ່ອມພູ Swat ແລະ ຢູ່ໃນ ເຂດອື່ນໆ ຂອງພາກຕາເວັນຕົກ ສຽງເໜືອຂອງປະເທດ. ແລະ ຢູ່ໃນຟີລິບປິນນັ້ນ, ຍັງມີ ຫລາຍກວ່າ 2 ແສນຄົນ ອາໃສແລະດຳລົງຊີວິດຢູ່ຕາມບ່ອນພັກເຊົາຊົ່ວຄາວຢູ່ ຫລັງຈາກທີ່ໄດ້ປະສົບກັບພາຍຸຮ້າຍແຮງ ຫລາຍບັ້ນໃນປີກາຍນີ້.
