ການເລືອກຕັ້ງທີ່ອິຣັກ: ຄວາມວຸ້ນວາຍໃນນະຄອນຫລວງຂອງອິຣັກ ໄດ້ເຮັດໃຫ້ປະຊາຊົນອິຣັກເສັຍຊີວິດໄປຢ່າງນ້ອຍ 24 ຄົນ ໃນວາລະເລີ້ມຕົ້ນຂອງການເລືອກຕັ້ງ ສະພາແຫ່ງຊາດ ຄັ້ງທຳອິດຂອງປະເທດນັບແຕ່ ປີ2005 ເປັນຕົ້ນມາ. ແຫລ່ງຂ່າວຈາກກະຊວງພາຍໃນຂອງອິຣັກກ່າວວ່າ ຢ່າງນ້ອຍມີ 12 ຄົນເສັຍຊີວິດແລະອີກ 8 ຄົນໄດ້ຮັບບາດເຈັບເວລາລະເບີດແຕກຂຶ້ນທີແລະທຳລາຍອາຄານຫລັງນຶ່ງໃນກຸງແບກແດ໊ດ.
ເຫດລະເບີດອີກບັ້ນນຶ່ງ ທີ່ເກີດຂຶ້ນກ່ອນໜ້ານັ້ນເວລາໜ່ວຍປ່ອນບັດໄຂຂຶ້ນໄດ້ສັງຫານ 4 ຄົນແລະເຮັດໃຫ້ບາດເຈັບ 8 ຄົນ. ມີອີກ 8 ຄົນໄດ້ ເສັຍຊີວິດ ຍ້ອນເຫດລະເບີດໃນແຫ່ງອື່ນໆອີກຂອງນະຄອນຫລວງ.
ລູກປືນໃຫຍ່ຫລາຍລູກໄດ້ຕົກລົງໃສ່ຫລາຍບ່ອນ ໃນກຸງແບກແດ໊ດ ຮວມທັງໃນເຂດສີຂຽວຫລື Green Zone ທ່ີເປັນບ່ອນທ່ີຕັ້ງຂອງສະ ພາແຫ່ງຊາດ ຕລອດທັງພວກສະຖານທູດສະຫະຣັດແລະອັງກິດນຳ. ຜ່ານມາ ການໂຈມຕີສ່ວນຫລາຍແມ່ນມາຈາກເຂດຂອງປະຊາຊົນ ນິກາຍຊຸນນີ. ແຕ່ຢ່າງໃດກໍຕາມ ກໍຍັງມີຜູ້ຄົນ ພາກັນອອກໄປລຽນກັນ ເປັນແຖວຍາວ ລໍຖ້າປ່ອນບັດຢູ່ຕາມໜ່ວຍປ່ອນບັດຫລາຍແຫ່ງ.
ປະຊາຊົນອິຣັກກຳລັງປະກອບສ່ວນໃນກການເລືອກຕັ້ງ ທ່ີຖືກເບິ່ງເຫັນ ວ່າ ເປັນການທົດສອບທ່ີສຳຄັນທ່ີສຸດກ່ຽວກັບຄວາມສາມາດຂອງອິຣັກ ໃນການຮັກສາຄວາມປອດໄພ ແລະດຳເນີນການໂອນອຳນາດໄດ້ຢ່າງ ເປັນລະບຽບຮຽບຮ້ອຍຫລືບໍ ຫລັງຈາກການບຸກລຸກພາຍໃຕ້ການນຳພາ ຂອງສະຫະຣັດ ໃນປີ2003 ເປັນຕົ້ນມາ.
ປະຊາຊົນທ່ີມີສິດເລືອກຕັ້ງປະມານ 19 ລ້ານຄົນ ກຳລັງພາກັນໄປ ປ່ອນບັດ ເລືອກເອົາຜູ້ແທນເຂົ້າໄປນັ່ງບ່ອນນັ່ງ 325 ບ່ອນ ຢູ່ໃນສະ ພາແຫ່ງຊາດອິຣັກ ຈາກຜູ້ສມັກເລືອກຕັ້ງທັງໝົດປະມານ 6200 ຄົນ.
ທີ່ອັຟການີສຖານ: ປະທານາທິບໍດີ ອັຟການີສຖານ ທ່ານຮາມິດກາຊາຍ ໄດ້ເດີນທາງ ໂດຍບໍ່ໄດ້ປະກາດໃຫ້ຮູ້ລ່ວງໜ້າ ໄປຍັງເຂດ Marjah ທີ່ໝັ້ນເກົ່າ ຂອງກຸ່ມຕາລິບານ ໃນແຂວງ Helmand.ທາງການອັຟການີສ
ຖານກ່າວວ່າ ໃນລະວ່າງການຢ້ຽມຢາມນັ້ນ ມີລູກ ສອນໄຟ ຫລືປືນຄົກລູກນຶ່ງ ຍິງມາໃສ່ແລະຕົກລົງດິນ ແຕ່ບໍ່ລະເບີດ ຢູ່ປະມານສີ່ຫລັກກິໂລເເມດ ຫ່າງຈາກກຸ່ມຂອງປະທານາທິບໍດີ.
ພວກຕາລິບານກ່າວວ່າ ພວກຕົນເປັນຜູ້ທຳການໂຈມຕີ ແຕ່ໂຄສົກຄົນ ນຶ່ງຂອງກຸ່ມເວົ້າວ່າ ທ່ານກາຊາຍບໍ່ແມ່ນເປົ້າຂອງການໂຈມຕີ ແລະວ່າ ເປົ້າໝາຍແທ້ໆນັ້ນ ແມ່ນທ່ານ Gordon Brown ນາຍົກລັດຖະມົນຕີ ອັງກິດ. ແຕ່ທ່ານ Brown ຊຶ່ງໄດ້ໄປຢ້ຽມຢາມເມືອງ Marjah ເມື່ອ ວັນເສົາວານນີ້ ແລະໄດ້ເດີນທາງກັບອັງກິດແລ້ວ. ເຈົ້າໜ້າທີ່ກ່າວວ່າ ການໂຈມຕີຄັ້ງນີ້ບໍ່ມີໃຜໄດ້ຮັບບາດເຈັບ.
ຂະນະດຽວກັນ ທາງການອັຟການີສຖານກ່າວວ່າ ໄດ້ເກີດການປະທະ ກັນລະວ່າງກຸ່ມຫົວຮຸນແຮງມຸສລິມ ທີ່ເປັນຄູ່ແຂ່ງກັນໃນເຂດພາກຕາ ເວັນອອກສຽງ ເໜືອຂອງປະເທດ ທີ່ໄດ້ຍັງຜົນໃຫ້ມີຜູ້ເສຍຊີວິດ ຢ່າງໜ້ອຍ 50 ຄົນ.ເຈົ້າໜ້າທີ່ກ່າວວ່າ ການສູ້ລົບກັນລະວ່າງກຸ່ມຕາລິບານ ແລະກຸ່ມກະບົດ Zerb-i-Islami ໄດ້ລະເບີດຂື້ນເມື່ອວັນເສົາວານນີ້ ແລະດຳເນີນສືບຕໍ່ ມາ ຈົນເຖິງວັນອາທິດມື້ນີ້.
ທີ່ Chile: ຈະມີການຊັກທຸງລົງເຄິ່ງເສົາໃນທົ່ວປະເທດໃນວັນອາທິດມື້ນີ້ ເພື່ອເປັນ ຂີດໝາຍເລີ່ມຕົ້ນການໄວ້ອາໄລແຫ່ງຊາດເປັນເວລາ 3 ມື້ ເຖິງດວງວິນຍານຂອງພວກເຄາະຄ້າຍຫລາຍຮ້ອຍຄົນ ທ່ີໄດ້ເສັຍຊີວິດໄປຍ້ອນ ໄພແຜ່ນດິນໄຫວຄັ້ງຮ້າຍແຮງໃນປະເທດ ຫວ່າງບໍ່ດົນມານີ້. ບັນດາເຈົ້າໜ້າທ່ີຍັງກຳລັງຂຸ້ນຂ້ຽວ ພະຍາຍາມໃຫ້ຮູ້ຈຳນວນຜູ້ເສັຍ ຊີວິດທີ່ແນ່ນອນ ນຶ່ງອາທິດກ່ວາຫລັງຈາກໄພແຜ່ນດິນໄຫວທ່ີມີຄວາມແຮງ 8.8 ຕາມເຄື່ອງວັດແທກ Richter ແລະຄື້ນຟອງຍັກສຶນາມິໄດ້ ປະທະພາກກາງຂອງປະເທດ.
ຣັຖບານ Chile ໄດ້ລົດຈຳນວນຜູ້ເສັຍຊີວິດຈາກໄພແຜ່ນດິນໄຫວຢ່າງເປັນທາງການ ລົງຈາກຫລາຍກວ່າ 800 ຄົນມາເປັນ 452 ຄົນ. ບັດນີ້ທາງການເວົ້າວ່າ ເຂົາເຈົ້າຈະຕື່ມຈຳນວນຜູ້ເຄາະຮ້າຍທ່ີເສັຍຊີວິດໄປ ນັ້ນ ກໍຕໍ່ເມື່ອເວລາໃດມີການຢັ້ງຢືນຊາກສົບຢ່າງແນ່ນອນແລ້ວເທົ່ານັ້ນ. ໄດ້ມີການປ່ຽນແປງໂຕເລກຜູ້ເສັຍຊີວິດນີ້ ຫລັງ ຈາກມີການພົບເຫັນວ່າ ຜູ້ຄົນທ່ີຫາຍສາບສູນຫລືຍັງຊອກຫາບໍ່ເຫັນນັ້ນ ໄດ້ຖືກຮວມເຂົ້າໃນບັນ ຊີພວກທ່ີເສັຍຊີວິດ. ບັນດາເຈົ້າໜ້າທ່ີສາທາຣະນະສຸກຂອງ Chile ໄດ້ເລີ້ມໂຄງການສັກຢາກັນພະຍາດເພື່ອ ຊ່ອຍປ້ອງກັນການລະບາດຂອງເຊື້ອໂຣກ ໂດຍທຳການສັກຢາປ້ອງກັນບາດທະຍັກແລະຕັບອັກເສບ ແກ່ປະຊາຊົນທ່ີມີຄວາມສ່ຽງຕໍ່ການຕິດເຊື້ອພະຍາດດັ່ງກ່າວໃນຂົງເຂດ ທ່ີເກີດໄພຫາຍະນະນັ້ນ.
ກ່ຽວກັບລູກສອນໄຟຂອງອິຣ່ານ: ສື່ມວນຊົນຂອງລັດອິຣ່ານລາຍງານຂ່າວວ່າ ອິຣ່ານໄດ້ເລີ້ມຜລິດລູກສອນໄຟທ່ີຍິງໄດ້ໃນລະຍະສັ້ນຊນິດໃໝ່ ທ່ີສາມາດທຳລາຍເຮືອຣົບ ຂະໜາດໝັກເຖິງ 3000 ຕັນໄດ້.
ວິທະຍຸແລະໂທຣະພາບແຫ່ງຊາດອິຣ່ານກ່າວວ່າ ທ່ານ Ahmad Vahidi ຣັຖມຸນຕີປ່ອງກັນປະເທດ ປະກາດໃຫ້ຮູ້ໃນວັນອາທິດມື້ນີ້ໃນ ກຸງເຕຮິຣ່ານວ່າ ລູກສອນໄຟທ່ີຊື່ວ່າ Nash 1 ຫລືໄຊຊະນະ ສາມາດຍິງຈາກພາກພື້ນດິນ ຫລືຈາກເຮືອກໍໄດ້.
ອົງການຂ່າວ IRNA ທາງການຂອງອິຣ່ານອ້າງຄຳເວົ້າຂອງທ່ານ Va-hidi ວ່າ ອິຣ່ານຈະຜລິດລູກສອນໄຟລຸ່ນດຽວກັນນີ້ ອີກແບບນຶ່ງທ່ີສາມາດຍິງຈາກ ເຮືອບິນເຮລີຄອບເຕີແລະເຮືອດຳນ້ຳໄດ້.
ໂຄງການອະວະກາດແລະທະຫານທ່ີໃຫຍ່ໂຕຂອງອິຣ່ານໄດ້ສ້າງຄວາມ ເປັນຫ່ວງກັງວົນແກ່ບັນດາປະເທດຝ່າຍຕາເວັນຕົກ ຊຶ່ງພວກປະເທດເຫລົ່ານີ້ໄດ້ສະແດງຄວາມຢ້ານກົວວ່າ ອິຣ່ານອາດສາມາດນຳເອົາເທັກໂນໂລຈີແນວດຽວກັນນີ້ ໄປໃຊ້ໃນການຍິງຫົວລະເບີດນີວເຄລັຍໄດ້.
ທີ່ປະເທດ Iceland: ຊາວ Iceland ຜູ້ມີສິດປ່ອນບັດ ໄດ້ພາກັນລົງປະຊາມະຕິປະຕິເສດ ຢ່າງຖ້ວມລົ້ນຕໍ່ຮ່າງຍັດຕິຕົກລົງໃຊ້ຄືນ ໜີ້ສິນ ມູນຄ່າ 5 ພັນ300 ດອນລ້າ ໃຫ້ອັງກິດແລະປະເທດ Netherlands ສຳລັບຄ່າເສັຍຫາຍຂອງປະເທດທັງສອງ ໃນການພັງທະລາຍລົງໃນປີ2008 ຂອງທະນາ ຄານເອກະຊົນ Icesave ທ່ີໃຫ້ການບໍລິການທາງຄອມພີວເຕີຂອງ Iceland ນັ້ນ. ຜົນການລົງປະຊາມະຕິທີ່ໄດ້ມາເປັນບາງສ່ວນໃນວັນ ເສົາວານນີ້ ກ່ຽວກັບການໃຊ້ໜີ້ສິນດັ່ງກ່າວຄືນ ສະແດງໃຫ້ເຫັນວ່າ ໃນຈຳນວນປະຊາ ຊົນທ່ີໄປລົງປະຊາມະຕິ ຫລາຍກວ່າ 93 ເປີເຊັນ ໄດ້ປະຕິເສດຕໍ່ຮ່າງຍັດຕິດັ່ງກ່າວ ມີພຽງແຕ່ 1.5 ເປີເຊັນເທົ່ານັ້ນ ທ່ີເຫັນດີນຳ.
ຮ່າງຍັດຕິດັ່ງກ່າວໄດ້ຖືກຮັບຜ່ານຢ່າງວຸດວິດ ຢູ່ໃນສະພາແຫ່ງຊາດຂອງ Iceland ໃນເດືອນທັນວາປີແລ້ວນີ້ ແຕ່ປະທານາທິບໍດີ Olafur Ragnar Grimsson ບໍ່ຍອມລົງນາມອະນຸມັດໃຫ້ເປັນກົດໝາຍ ໂດຍກ່າວວ່າ ເງື່ອນໄຂໃນການຈ່າຍໜີສິນຄືນນີ້ ເຂັ້ມງວດໂພດ. ພາຍໃຕ້ແຜນການດັ່ງກ່າວ ພົນລະເມືອງແຕ່ລະຄົນຈະຕ້ອງຈ່າຍເງິນ
ສົມທົບໃນການໃຊ້ໜີ້ຄືນ ປະມານ 135 ດອນລ້າຕໍ່ເດືອນເປັນເວລາ 8 ປີ. ປະທານາທິບໍດີກ່າວວ່າ ພວກຄອບຄົວຊາວ Iceland ຫລາຍຄອບ ຄົວບໍ່ສາມາດຈ່າຍເງິນຈຳນວນນີ້ໄດ້.
ກ່ຽວກັບອີຢິບ: ທ່ານ Hosni Mubarak ປະທານາທິບໍດີອີຢິບ ໄດ້ຮັບການຜ່າຕັດ ເອົາໜິ້ວອອກຈາກພົກຍ່ຽວຢ່າງສຳເລັດຜົນ ຫລັງຈາກໄດ້ມອບອຳ ນາດຊົ່ວຄາວ ໃຫ້ແກ່ນາຍົກລັດຖະມົນຕີຂອງທ່ານ.
ການຜ່າຕັດດັ່ງກ່າວຂອງຜູ້ນຳອີຢິບ ມີຂື້ນໃນວັນເສົາວານນີ້ ທີ່ໂຮງ ພະຍາບານມະຫາວິທະຍາລັຍໃນເມືອງ Heidelberg ປະເທດເຢັຍ ລະມັນ ຫລັງຈາກນາຍແພດກວດພົບວ່າພົກຍ່ຽວຂອງທ່ານອັກເສບ. ປະທານາທິບໍດີ ມູບາຣັກ ກຳລັງຢ້ຽມຢາມເຢັຍລະມັນຢ່າງເປັນທາງ ການເມື່ອເຈລະຈາກັບ ນາຍົກລັດຖະມົນຕີ ທ່ານນາງ Angela Merkel ເວລາທີ່ທ່ານຮູ້ສຶກເຈັບທີ່ພົກຍ່ຽວ.ໜັງສືພິມທາງການຂອງອີຢິບ ກ່າວວ່າ ທ່ານ Ahmed Nazif ນາຍົກ ລັດຖະມົນຕີຈະຮັກສາການຕຳແນ່ງປະທານາທິບໍດີ ໄປຈົນກວ່າທ່ານ ມູບາຣັກ ຈະສາມາດກັບໄປທຳງານໄດ້ເປັນປົກກະຕິ.
ວັນເສົາ, ໒໗ ກໍລະກົດ ໒໐໒໔
