ຂ່າວສະຖານະ ການໃນອັຟການີສຖານ: ບັນດາເຈົ້າໜ້າທ່ີກຸ່ມເນໂຕກ່າວໃນວັນອາທິດມື້ນີ້ວ່າ ການບຸກໂຈມຕີກວດລ້າງຖະໜົນຂອງກຳລັງນາໆຊາດ ພວມທຳຄວາມຄື້ບໜ້າໃນແຂວງ Helmand ໃນພາກໃຕ້ຂອງອັຟການີສຖານ ທ່ີເປັນທ່ີໝັ້ນແຫ່ງນຶ່ງຂອງກຸ່ມຕາລີບັນນັ້ນ. ກຸ່ມພັນທະມິດກ່າວວ່າ ການປະຕິບັດງານ ກວດລ້າງທີ່ຊື່ວ່າ Moshta-rak ໄດ້ປັບປຸງອິດສະຣະພາບໃນການເຄື່ອນໄຫວໄປມາໃນຂົງເຂດໃຫ້ ດີຂຶ້ນ. ກຳລັງຂອງອັງກິດ ສະຫະຣັດແລະອັຟການີສຖານ ໄດ້ເລີ້ມທຳການກວດລ້າງທາງພາກພື້ນດິນໃນເມືອງ Marjah ໃນຖານະເປັນພາກສ່ວນນຶ່ງຂອງຄວາມພະຍາຍາມ ເພື່ອເຂົ້າຄວບຄຸມເມືອງດັ່ງກ່າວ ຄືນ ຊຶ່ງເປັນນຶ່ງໃນບັນດາທ່ີໝັ້ນໃຫຍ່ໆຫລາຍແຫ່ງທ່ີຍັງເຫລືອຢູ່ຂອງກຸ່ມຕາລີບັນ. ເຖິງຢ່າງໃດກໍດີ ບັນດາເຈົ້າໜ້າທ່ີກຸ່ມເນໂຕ ກ່າວຢູ່ໃນຖະແຫລງການ ສະບັບນຶ່ງວ່າ ກຳລັງປະສົມໄດ້ປະເຊີນກັບລະເບີດແຄມທາງທີ່ພວກຕາ ລີບານຫ້າງໄວ້ ແລະການຍິງປືນນ້ອຍມາໃສ່ເລັກໆນ້ອຍໆ ຕລອດທັງໄດ້ພົບເຫັນອາວຸດທີ່ຝ່າຍກົງກັນຂ້າມ ປະໄວ້.ໃນຂະນະດຽວກັນ ກຸ່ມເນໂຕ ປະກາດໃຫ້ຮູ້ໃນວັນອາ ທິດມື້ນີ້ວ່າ ຕົນ ຈັບໄດ້ ພວກນັກຕໍ່ສູ້ຫົວຮຸນແຮງ 2 ຄົນ ຊຶ່ງຄົນນຶ່ງໃນນັ້ນ ສົງໄສວ່າ ເປັນຜູ້ບັນຊາການກຸ່ມຕາລີບັນ. ຊາຍທັງສອງຄົນນີ້ ຖືກຈັບໃນວັນສຸກ ຜ່ານມາ. ໃນວັນເສົາວານນີ້ ປະທານາທິບໍດີ Hamid Karzai ແຫ່ງອັຟການີສຖານໄດ້ຮຽກຮ້ອງອີກເທື່ອໃໝ່ ໃຫ້ກຸ່ມຕາລີບັນຮັບເອົາສັນຕິພາບແລະເຂົ້າຮ່ວມກັບຣັຖບານ.
ແຕ່ອົງການຂ່າວ Reuters ລາຍງານຂ່າວອ້າງຄຳເວົ້າຂອງໂຄສົກກຸ່ມຕາລີບັນຄົນນຶ່ງໃນວັນອາທິດນີ້ ທ່ີປະຕິເສດຕໍ່ຄຳຮຽກຮ້ອງໃຫ້ຮັບເອົາສັນຕິພາບຂອງປະທານາທິບໍດີ ໂດຍກ່າວວ່າ ທ່ານ Karzai ພຽງແຕ່ເປັນຫຸ່ນຄົນນຶ່ງທ່ີບໍ່ສາມາດເປັນຜູ້ຕາງໜ້າ ໃຫ້ປະເທດຫລືຣັຖບານໃດໄດ້.
ທີ່ພໍຈູກາລ: ເຈົ້າໜ້າທີ່ປະເທດພໍຈູກາລກ່າວວ່າ ໄພນ້ຳປ່າທີ່ໄຫລມາຖ້ວມຢ່າງໄວ ແລະດິນເຈື່ອນທີ່ເກີດ ຈາກຝົນຕົກໜັກທີ່ເກາະຕາກອາກາດ Madeira ໃນມະຫາສະມຸດແອັຕແລນຕິກ ຍັງຜົນໃຫ້ມີຜູ້ເສຍຊີວິດ ຢ່າງໜ້ອຍ 38 ຄົນ ແລະບາດເຈັບອີກຫລາຍກວ່າ 100 ຄົນ.ທ່ານ Francisco Ramos ລັດຖະມົນ ຕີຝ່າຍກິດຈະການສັງຄົມ ປະຈຳເຂດດັ່ງກ່າວ ບອກກັບພວກນັກຂ່າວໃນວັນອາທິດມື້ນີ້ວ່າ ຈຳ ນວນຄົນເສຍຊີວິດອາດມີເພີ່ມຂື້ນ ແລະທ່ານກ່າວວ່າ ຕອນນີ້ ຍັງບໍ່ ມີການປະເມີນໃດໆ ກ່ຽວກັບຈຳນວນຄົນຜູ້ຫາຍສາບສູນນັ້ນເທື່ອ.ທ່ານ ຣາໂມສ ກ່າວວ່າ ການຄົ້ນຫາຊາກສົບຍັງດຳເນີນຕໍ່ໄປ ໃນ ຂະນະທີ່ລໍຄອຍພວກກູ້ພັຍຈາກທາງແຜ່ນດິນໃຫຍ່ ພໍຈູກາລ.
ສື່ມວນຊົນທ້ອງຖິ່ນລາຍງານວ່າ ຝົນຕົກໜັກ ແລະລົມແຮງໃນຄວາມ ໄວຮອດ ນຶ່ງຮ້ອຍກິໂລເມດຕໍ່ຊົ່ວໂມງ ໄດ້ປະທະເກາະ Madeira ຕອນແລງວັນເສົາວານນີ້ ເຮັດໃຫ້ຕົ້ນໄມ້ໂກ່ນ ແລະຫັກລົ້ມຕັນຖະນົນ ຫົນທາງ ຂັດຂວາງແລະຖ່ວງດຶງການກູ້ໄພ ໃຫ້ຊັກຊ້າ.
ເກາະດັ່ງກ່າວ ຊຶ່ງເປັນບ່ອນທີ່ພວກນັກທ່ອງທ່ຽວມັກໄປຢ້ຽມຢາມ ຕັ້ງ ຢູ່ຫ່າງຈາກແຜ່ນດິນໃຫຍ່ ຂອງພໍຈູກາລ ໄປທາງກ້ຳຕາເວັນຕົກສຽງໄຕ້ ປະມານ 900 ຫລັກກິໂລເມດ. ເວລານີ້ຍັງບໍ່ເປັນ ທີ່ແຈ້ງ ຂາວເທື່ອວ່າ ມີພວກນັກທ່ອງທ່ຽວຮວມຢູ່ໃນພວກທີ່ເສຍຊີວິດ ຫລືໄດ້ຮັບບາດເຈັບໃນເຫດການຄັ້ງນີ້ນຳຫລືບໍ່.
ການເລືອກຕັ້ງທີ່ອິຣັກ: ກຸ່ມການເມືອງສຳຄັນກຸ່ມນຶ່ງຂອງຊາວຊຸນນີ ທ່ີເປັນຊົນກຸ່ມໃຫຍ່ໃນອິຣັກ ໄດ້ຖອນໂຕອອກຈາກການເຂົ້າປະກອບສ່ວນໃນການເລືອກຕັ້ງ ຊຶ່ງກຳ ນົດຈະມີຂຶ້ນໃນວັນທີ 7 ມີນາໜ້ານີ້ ໂດຍກ່າວຫາວ່າ ອິຣ່ານໄດ້ນຳພາໃນຄວາມພະຍາຍາມເພື່ອຫ້າມພວກສະມາຊິກຫລາຍຮ້ອຍຄົນຂອງກຸ່ມ ດັ່ງກ່າວ ບໍ່ໃຫ້ເຂົ້າຮ່ວມໃນການເລືອກຕັ້ງ.
ທ່ານ Haidar al-Mullah ໂຄສົກປະຈຳກຸ່ມແນວໂຮມສົນທະນາຫາລື ແຫ່ງຊາດ ຫລື National Dialogue Front ກ່າວໃນວັນເສົາວານນີ້ ວ່າ ກຸ່ມຊຸນນີ ບໍ່ສາມາດເຂົ້າຮ່ວມໃນອັນທ່ີທ່ານເອີ້ນວ່າ “ການດຳເນີນ ຂັ້ນຕອນດ້ານການເມືອງທ່ີຄວບຄຸມໂດຍຕ່າງປະເທດນັ້ນ”.
ທ່ານal-Mullah ກ່າວຕື່ມວ່າ ພວກຜູ້ນຳພັກໄດ້ທຳການຕັດສິນໃຈດັ່ງ ກ່າວ ຫລັງຈາກ ນາຍພົນ Ray Odierno ຜູ້ບັນຊາການທະຫານສູງສຸດຂອງສະຫະຣັດໃນອິຣັກ ກ່າວໃນຕົ້ນສັບປະດານີ້ວ່າ ມີຫລັກຖານ ໂດຍກົງ ທ່ີສະແດງໃຫ້ເຫັນວ່າ ອິຣ່ານຊຶ່ງພົນລະເມືອງສ່ວນໃຫຍ່ເປັນ ຊາວ Shi’ite ນັ້ນ ໄດ້ຊ່ອຍວາງແຜນໃນການເຮັດໃຫ້ພວກນັກການເມືອງນິກາຍຊຸນນີຫລາຍຄົນ ບໍ່ມີສິດເຂົ້າຮ່ວມໃນການເລືອກຕັ້ງຄັ້ງນີ້ທ່ີອິຣັກນັ້ນ. ນອກນີ້ທ່ານ al-Mullah ຍັງໄດ້ຮຽກຮ້ອງໃຫ້ພັກການ ເມືອງອື່ນໆ ຮ່ວມກັນຂ້ວາມບາດຫລືຄັດຄ້ານບໍ່ເຂົ້າຮ່ວມໃນການເລືອກຕັ້ງຄັ້ງນີ້ນຳ. ພັກ National Dialog Front ແມ່ນນຳພາໂດຍ ທ່ານ Saleh al-Mutlak ສະມາຊິກສະພາທ່ີມີຊື່ສຽງໂດງດັງຄົນນຶ່ງຂອງກຸ່ມຊຸນນີ ທ່ີຖືກຫ້າມບໍ່ໃຫ້ເຂົ້າຮ່ວມໃນການເລືອກຕັ້ງ ຍ້ອນຂໍ້ກ່າວຫາທ່ີວ່າທ່ານມີສາຍ ພົວພັນກັບພັກຂອງມື້ລາງຜູ້ນຳອິຣັກ ຊັດດັມຮຸສເຊນ ນັ້ນ.
ປາເລສໄຕນ໌ ແລະອີສຣາແອລ: ອີສຣາແອລໄດ້ປະຕິເສດຕໍ່ແນວຄິດ ທີ່ໃຫ້ນາໆຊາດຮັບຮູ້ປາເເລສຕາຍ ເປັນປະເທດນຶ່ງ ກ່ອນການເຈລະຈາ ຈະສຳເລັດລົງ.ທາງການອີສຣາແອລກ່າວໃນວັນອາທິດ ມື້ນີ້ວ່າ ການເຄຶ່ອນໄຫວແບບນັ້ນ ແມ່ນຈະຂັດຂວາງການດຳເນີນງານເພື່ອສັນຕິພາບ ແລະອຳນວຍ ເຫດຜົນ ໃຫ້ປາເລສຕາຍນຍົກຂຶ້ນມາອ້າງວ່າ ບໍ່ຕ້ອງມີທຳເຈລະຈາກັນ.ຄຳແຖລງດັ່ງກ່າວຂອງອິນຣາແອລ ແມ່ນເປັນການຕອບໂຕ້ ຕໍ່ຂໍ້ສະເໜີອັນນຶ່ງທີ່ນຳ ສະເໜີໂດຍລັດຖະມົນຕີຕ່າງປະເທດຝລັ່ງ ໃນການໃຫ້ສຳພາດຂ່າວ ທີ່ຖືກນຳອອກເຜີຍແຜ່ທາງໜັງສືພິມ. ທ່ານ Bernard Kouchner ໄດ້ບອກກັບອົງການຂ່າວ Journal du Dimanche ວ່າກຳລັງມີການຈັດຕັງອົງການຕ່າງໆທີ່ມີລັກສະນະເປັນຂອງປະເທດ ຢູ່ໃນເຂດ West Bank ຊຶ່ງໂຮມທັງກຳລັງຕຳຫລວດທີ່ ຝລັ່ງເປັນຜູ້ໃຫ້ການເຝິກອົບຮົມ ແລະທຸຣະກິດໃໝ່ໆຫລາຍຢ່າງ.
ທ່ານກ່າວວ່າ ທ່ານສາມາດຫລິງເຫັນການສະຖາປະນາລັດປາເເລສ ຕາຍ ແລະການຮັບຮູ້ຂອງນາໆຊາດ ກ່ອນໜ້າການເຈລະຈາຕໍ່ຮອງ ວ່າດ້ວຍແຂດແດນກັບອິສຣາແອລ ຈະສຳເລັດລົງ. ທ່ານ Salam Fayyad ນາຍົກລັດຖະມົນຕີປາເເລສຕາຍ ກ່າວວ່າ ທ່ານມີແຜນການທີ່ຈະສ້າງ ຕັ້ງລັດປາເເລສຕາຍຂື້ນ ພາຍໃນສອງປີ ໂດຍທີ່ບໍ່ສົນໃຈວ່າ ຂັ້ນຕອນການດຳເນີນການເພື່ອສັນຕິພາບ ຈະໄປຮອດໃສ.
ທີ່ຟີລິບປິນ: ບັນດານາຍທະຫານຟີລິບປິນ ກ່າວວ່າ ພວກຫົວໜ້າສູງສຸດຂອງກຸ່ມ Abu Sayyaf ທ່ີມີສ່ວນພົວພັນກັບກຸ່ມ al-Qaida ອາດຮວມຢູ່ໃນ ຈຳນວນພວກນັກຕໍ່ສູ້ຫົວຮຸນແຮງ 6 ຄົນ ທ່ີໄດ້ເສັຍຊີວິດໄປໃນການສູ້ ຣົບກັນໃນເຂດວຸ້ນວາຍທາງພາກໃຕ້ຂອງປະເທດ ໃນວັນອາທິດມື້ນີ້ກໍເປັນໄດ້. ເຈົ້າໜ້າທ່ີກ່າວວ່າ ໃນບັນດາພວກທ່ີເຊື່ອກັນວ່າ ຖືກຂ້າຕາຍໃນເກາະ Jolo ມີນາຍ Albadar Parad ຜູ້ນຳກຸ່ມ Abu Sayyaf ຮ່ວມຢູ່ນຳ ຊຶ່ງຜູ້ກ່ຽວເປັນຜູ້ນຳພາໃນການລັກພາໂຕ ພະນັກງານຂອງສະພາກາແດງ 3 ຄົນໃນປີແລ້ວນີ້.
ພວກນາຍທະຫານອື່ນໆກໍກ່າວວ່າ ນ້ອງຊາຍຂອງນາຍ Umbra Jumdail ນຶ່ງໃນບັນດາແກນນຳຂອງກຸ່ມAbu Sayyaf ກໍໄດ້ຖືກຂ້າຕາຍເຊັ່ນກັນ. ກອງທັບຟີລິບປິນກ່າວວ່າ ທະຫານຝ່າຍຣັຖບານ3 ຄົນໄດ້ຮັບບາດເຈັບໃນການປະທະກັນຄັ້ງນີ້. ໃນວັນສຸກຜ່ານມານີ້ ບັນດາເຈົ້າໜ້າທ່ີປະກາດໃຫ້ຮູ້ວ່າ ພວກເຂົາເຈົ້າ ໄດ້ຈັບກຸມຄົນນຶ່ງທ່ີສົງໄສວ່າເປັນກະບົດມຸສລິມ ທ່ີຖືກກ່າວຫາວ່າ ເປັນຜູ້ລັກພາໂຕນັກທ່ອງທ່ຽວອາເມຣິກັນ 3 ຄົນເມື່ອ 9 ປີຜ່ານມານັ້ນແລະວ່ານາຍ Jumadail Arad ໄດ້ຖືກຈັບກຸມໃນວັນພະຫັດສັບປະດາແລ້ວນີ້ທ່ີທ່າເຮືອແຫ່ງນຶ່ງຂອງກຸງມານີລາ.
ທີ່ມຽນມ້າ ລາຍງານຈາກນະຄອນຢ່າງກຸ້ງ ປະເທດມຽນມ້າ ເວົ້າວ່າ ລັດຖະບານ ທະຫານມຽນມາ ໄດ້ຕັດ ສິນໂທດ ຢ່າງງຽບງຽບ ໃຫ້ພຣະສົງອົງນຶ່ງຈຳ ຄຸກເປັນເວລາເຈັດປີ ໃນລະວ່າງການຢ້ຽມຢາມຂອງທູດພິ ເສດຮັບຜິດ ຊອບສິດທິມະນຸດຂອງອົງການໍສະຫະປະຊາຊາດ ໃນອາທິດຜ່ານມານີ້.
ທະນາຍຄວາມທ່ານນຶ່ງກ່າວເມື່ອວັນເສົາວານນີ້ວ່າ ພຣະ Gaw Thita ໄດ້ຖືກຈັບກຸມເມື່ອ ເດືອນສິງຫາ ຜ່ານມາ ໃນະຂະນະທິ່ທ່ານເດີນທາງ ກັບຈາກໄຕ້ຫວັນ ຊຶ່ງທ່ານໄດ້ຖືກຕັດສິນວ່າ ມີຄວາມຜິດຢູ່ທີ່ຄຸກ Insein ທີ່ມີຊື່ສຽງເໜ່ົາເໝັນຂອງມຽນມາ ເມື່ອວັນພຸດຜ່ານມາ ໃນຂໍ້ ຫາສາມກະທົງ ໂຮມທັງການຕັ້ງສະມາຄົມຂຶ້ນຢ່າງຜິດກົດໝາຍ.ທະນາຍຄວາມກ່າວຕື່ມວ່າ ນອກນັ້ນ ພຣະອົງສົງນີ້ຍັງຖືກຕັດສິນວ່າ ກະທຳຜິດ ທີ່ບໍ່ຍອມແຈ້ງວ່າຕົນມີເງິນຕາຕ່າງປະເທດຢູ່ໃນຄວາມຄອບ ຄອງ ແລະຝ່າຝືນກົດໝາຍເຂົ້າເມືອງ ຍ້ອນການເດີນ ທາງໄປໄຕ້ຫວັນ ນັ້ນ.
ວັນສຸກ, ໑໙ ເມສາ ໒໐໒໔
