ຜູ້ບັນຊາການ ທະຫານອະວຸໂສ ຂອງກຸ່ມທາລີບານ ຖືກຈັບ ໃນການປະຕິບັດງານຮ່ວມ ສະຫະຣັດ - ປາກິສຖານ

ປາກິສຖານ: ເຈົ້າໜ້າທີ່ ສະຫະຣັດ ແລະປາກິສຖານ ກ່າວວ່າ ກຳລັງສືບລັບ ຈຳນວນນຶ່ງ ຈັບຜູ້ບັນຊາການ ທະຫານ ອະວຸໂສຄົນນຶ່ງ ຂອງກຸ່ມທາລີບານໄດ້ ໃນການປະຕິບັດງານລັບ ຮ່ວມກັນບັ້ນນຶ່ງ ເມື່ອຫລາຍໆມື້ ຜ່ານມາແລ້ວ. ເຈົ້າໜ້າທີ່ກ່າວວ່າ ນາຍ MULLAH ABDUL GHANI BARADAR ຜູ້ບັນຊາການ ກຸ່ມ​ຕາ​ລີ​ບານ ເວລານີ້ ຖືກເຈົ້າໜ້າທີ່ ປາກິສຖານ ຄວບຄຸມໂຕໄວ້. ກ່າວກັນວ່າ ນາຍ BARADAR ທີ່​ເປັນຄົນ ເຊື້ອສາຍ ອັຟການິສຖານນັ້ນ ເປັນບຸກຄົນສຳຄັນ ທີ່ມີອິດທິພົນຫລາຍ ເປັນອັນດັບ 2 ຮອງຈາກ MULLAH MUHAMMAD OMAR ຜູ້ກໍ່ຕັ້ງ ກຸ່ມທາລີບານນັ້ນ. ເຈົ້າໜ້າທີກ່າວວ່າ ນາຍ BARADAR ເປັນເຈົ້າໜ້າທີ່ ຄົນສຳຄັນສຸດ ຂອງກຸ່ມທາລີບານ ທີ່ໄດ້ຖືກຈັບ ນັບແຕ່ສົງຄາມ ໃນອັຟການິສຖານ ເລີ້ມຂຶ້ນ ໃນທ້າຍ ປີ 2001. ກຸ່ມທາລີບານ ໃນອັຟການິສຖານ ໄດ້ປະຕິເສດ ຂ່າວການຈັບໂຕ ນາຍ BARADAR ໂດຍເວົ້າວ່າ ລາຍງານທີ່ວ່ານີ້ ເປັນພຽງຂ່າວລື ເພື່ອສ້າງຄວາມແຕກແຍກ​.

ສະຫະຣັດ - ອີຣ່ານ: ຣັຖມຸນຕຣີການຕ່າງປະ ເທດ ອີຣ່ານ ໄດ້ປະຕິເສດ ຕໍ່ຄວາມເຫັນ ຂອງຣັຖມຸນຕຣີ ການຕ່າງປະເທດ ສະຫະຣັດ ທ່ານນາງ HILLARY CLINTON ​ໃນ​ມື້ວານ​ນີ້ທີ່ວ່າ ອີຣ່ານ ກຳລັງກາຍເປັນ ປະເທດຜະເດັດການ ທະຫານນັ້ນ. ສື່ມວນຊົນ ຂອງທາງການອີຣ່ານ ໄດ້ອ້າງຄຳເວົ້າ ຂອງທ່່ານ MANOUCHEHR MOTTAKI ທີ່ກ່າວໃນ ວັນອັງຄານ ມື້ນີ້ວ່າ ທ່ານນາງ CLINTON ພວມພະຍາຍາມ ທີ່ຈະຊັກຈູງ ຫາງສຽງປະຊາຊົນ ກ່ຽວກັບເຣື່ອງອີຣ່ານ ດ້ວຍການເວົ້າເຖິງບັນຫາ ທີ່ບໍ່ມີມູນຄວາມຈິງ ແລະບໍ່ຖືກຕ້ອງ. ໃນມື້ວານນີ້ ທ່ານນາງ CLINTON ໄດ້ກ່າວ ຕໍ່ພວກນັກສຶກສາ ທີ່ປະເທດກາຕ້າວ່າ ສະຫະຣັດເຊື່ອວ່າ ກຳລັງພິທັກ ປະຕິວັດ ກຳລັງ​ຈະ​ເຂົ້າມາແທນທີ່ ຣັຖບານອີຣ່ານ. ທ່ານ MOTTAKI ໄດ້ກ່າວຫາ ແບບດຽວກັນ ຕໍ່ສະຫະຣັດ ໃນວັນອັງຄານມື້ນີ້ ໂດຍເວົ້າວ່າ ສະຫະຣັດ ໄດ້ດຳເນີນການ ຄ້າຍຄືກັນ ກັບຈອມຜະເດັດການ ທາງທະຫານ ໃນການປະຕິບັດງານ ຂອງຕົນຢູ່ໃນອີຣັກ ແລະອັຟການິສຖານ.

ອັຟການິສຖານ: ກຳລັງຂອງ ອົງການນາໂຕ້ ກ່າວວ່າ ມີພົລເຮືອນ ອັຟການິສຖານ ຕື່ມອີກ 3 ຄົນໄດ້ເສັຽຊີວິດ ໃນການປະຕິບັດງານ ບຸກໂຈມຕີ ພວກກະບົດ ທາລີບານຄັ້ງໃຫຍ່ ທີ່ແຂວງ HELMAND ໃນພາກໃຕ້ ອັຟການິສຖານ. ຖແລງຂ່າວສະບັບນຶ່ງ ຂອງກຳລັງນາໆຊາດ ທີ່ນຳອອກເຜີຍແຜ່ ໃນວັນອັງຄານມື້ນີ້ກ່າວວ່າ ພົລເຮືອນ 2 ຄົນ ໄດ້ຖືກຂ້າຕາຍ ໃນເຫດການ​ຕ່າງ​ກັນ ຫລັງຈາກໄດ້ຖືກຍິງ ຍ້ອນບໍ່ຟັງຕຳເຕືອນ ສັ່ງໃຫ້ຢຸດ ເວລາຜູ້ກ່ຽວ ເຂົ້າໄປໃກ້ໆ ພວກທະຫານ. ສ່ວນອີກຄົນນຶ່ງນັ້ນ ມີລາຍງານວ່າ ໄດ້ເສັຽຊີວິດ ຫລັງຈາກ ຖືກລູກຫລົງ ໃນການສູ້ຣົບ ລະຫວ່າງ ກຳລັງປະສົມ ແລະພວກກະບົດ. ຜູ້ບັນຊາການ ກຳລັງນາໂຕ້ ກ່າວວ່າ ການໃຫ້ຄວາມຄຸ້ມຄອງ ແກ່ພົລເຣືອນ ແມ່ນບູລິມມະສິດ ໃນການບຸກໂຈມຕີ. ການດຳເນີນ ຄວາມພະຍາຍາມ ດັ່ງກ່າວ ໄດ້ປະສົບກັບບັນຫາ ໃນມື້ວັນອາທິຜ່ານມາ ເວລາຈະຣວດລູກນຶ່ງ ທີ່ຝ່າຍກຳລັງປະສົມຍິງ​ໄປ ໄດ້ຕົກໃສ່ເຮືອນ ຂອງປະຊາຊົນ ທີ່ເມືອງ MARJAH ເຮັດໃຫ້ມີ ຜູ້ເສັຽຊີວິດ 12 ຄົນ ຮວມທັງເດັກນ້ອຍ 6 ຄົນ.

ມຽນມາ: ມຽນມາ ໄດ້ຕັດສິນໂທດ ແມ່ຍິງ 4 ຄົນ ໃຫ້ຈຳຄຸກ ດ້ວຍການອອກ ແຮງງານໜັກ ເປັນເວລາ 2 ປີ ໃນຄວາມຜິດ ຖານເປັນຜູ້ກໍ່ ຄວາມວຸ້ນວາຍຂຶ້ນ. ແມ່ຍິງທັງ 4 ໄດ້ຖືກຈັບ ໃນເດືອນຕຸລາປີກາຍ ຫລັງຈາກ ໄດ້ມອບ ຂອງທານຈຳນວນນຶ່ງ ທີ່ຮວມທັງໜັງສື ທາງສາສນານຳດ້ວຍ ໃຫ້ແກ່ວັດ MAGWE PRYIYATTI ທີ່ມີຊື່ສຽງໂດ່ງດັງ ທີ່ເມືອງ DAGON ໃນພາກຕາເວັນອອກ ຂອງມຽນມາ. ທ່ານ KYAW HOE ທະນາຍຄວາມ ຂອງພວກແມ່ຍິງ ທັງ 4 ກ່າວວ່າ ລາວຈະຂໍອຸທອນ ຕໍ່ການຕັດສິນໂທດ ທີ່ວ່ານີ້. ພວກແມ່ຍິງທັງ 4 ເຄີຍພາກັນ ໄປສວດມົນ ພາວະນາ ທຸກໆອາທິດ ເພື່ອໃຫ້ທາງການ ປ່ອຍທ່ານນາງ ອອງຊານຊູຈີ ຜູ້ນຳປະຊາທິປະໄຕ ໃນມຽນມາ.

ທິເບດ - ປະທ້ວງ: ລາຍງານຂ່າວ ຈາກເຂດ ພາກຕາເວັນຕົກສຽງໃຕ້ ຂອງຈີນແຈ້ງວ່າ ມີພຣະລາມະ ຂອງທິເບດ ແລະພໍ່ອອກແມ່ອອກ ປະມານ 400 ຄົນ ພາກັນສເລີມ ສລອງວັນເລີ້ມຕົ້ນ ຫລື​ວັນ​ຂຶ້ນປີໃໝ່ ທາງຈັນທະຄະຕິ ຂອງທິເບດ ​ໂດຍ​ການ​ພາກັນ ນັ່ງປະທ້ວງ ຕໍ່ການສັງຫານ ພວກປະທ້ວງ ຊາວທິເບດ ເມື່ອເກືອບ 2 ປີ ຜ່ານມາແລ້ວນັ້ນ. ການປະທ້ວງ ໃນເຂດເມືອງ NGABA ແຂວງ SICHUAN ມີຂຶ້ນໃນ ມື້ວັນຈັນວານນີ້ ຢູ່ທີ່ຈະຕຸຣັດ ຕລາດໃຫຍ່ ໃນເມືອງດັ່ງກ່າວ. ເຈົ້າໜ້າທີ່ ສາສນາຄົນນຶ່ງ ຈາກວັດ KIRTY ທີ່ຕັ້ງຢູ່ໃກ້ຄຽງ ໄດ້ຮຽກຮ້ອງ ແຕ່ບໍ່ສຳເຣັດຜົນ ໃຫ້ພວກປະທ້ວງ ແຍກຍ້າຍກັນ ໜີໄປ. ໃນເວລາຕໍ່ມາ ເຈົ້າໜ້າທີ່ຈີນ ໄດ້ຢຶດ ໂທຣະສັບມືຖື ຂອງພວກທີ່ຖ່າຍວີດີໂອ ແລະຮູບພາບຂອງພວກປະ ທ້ວງ. ເມືອງ NGABA ໄດ້ມີຄວາມເຄັ່ງຕຶງ ນັບແຕ່ເກີດການປະທ້ວງ ໃນປີ 2008 ເປັນຕົ້ນມາ.

ກິມ - ວັນເກີດ: ເກົາຫລີເໜືອ ສເລີມສລອງ ວັນເກີດຄົບຮອບ 69 ປີ ຂອງທ່ານກິມ-ຈົງ-ອິລ ຜູ້ນຳຂອງເກົາຫລີເໜືອ ໃນວັນອັງຄານມື້ນີ້ ຫຼັງຈາກໄດ້ ມີການສເລີມສລອງ ເປັນເວລາຫຼາຍໆວັນ ທີ່ທັບກັນ ກັບວັນຂຶ້ນປີໃໝ່ ທາງຈັນທະຄະຕິ ໃນມື້ວັນອາທິດ ຜ່ານມາ. ວັນເກີດຂອງທ່ານກິມ ໃນແຕ່ລະປີນັ້ນ ແມ່ນໃຊ້ສຳລັບ ເປັນໂອກາດ ໃນການສະແດງອອກ ຊຶ່ງຄວາມຈົງຮັກພັກດີ ຂອງປະຊາຊົນ ຊາວເກົາຫລີເໜືອ ຕໍ່ຜູ້ນຳ ທີ່ເຄົາຣົບຮັກ ຂອງພວກເຂົາເຈົ້າ. ສື່ມວນຊົນ ຂອງທາງການ ເກົາຫລີເໜືອ ລາຍງານວ່າ ມີປະມານ 1 ແສນ ຄົນ ໂຮມຊຸມນຸມກັນ ທີ່ນະຄອນຫລວງ ພຽງຢາງ ເພື່ອສ​ແດ​ງ ການສນັບສນຸນ ຕໍ່ທ່ານກິມ ​ແລະ​ທາງຣັຖບານ ໄດ້​ເອົາຂນົມແຄນດີ້ ແລະຄຸກກີ້​ ໄປແຈກ​ຢາຍ ໃຫ້ພວກເດັກນ້ອຍ. ການສເລີມສລອງ ວັນເກີດປີນີ້ ມີຂຶ້ນໃນຊ່ວງ​ເວລາ ແຫ່ງຄວາມເຄັ່ງຕຶງສຳລັບ ທ່ານກິມ ແລະປະເທດຂອງທ່ານ ຂະນະທີ່ ຣັຖບານເກົາຫລີເໜືອ ຮັບມືກັບການກົດດັນ ຈາກນາໆຊາດ ເພື່ອໃຫ້ກັບ​ຄືນ​ໄປ​ສູ່ການເຈຣະຈາ ກ່ຽວ​ກັບ​ການ ຫາທາງຍຸຕິ ໂຄງການນິວເຄລັຽ ຂອງເກົາຫລີເໜືອ.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.