ລິ້ງ ສຳຫລັບເຂົ້າຫາ

ຈີນສະແດງການຄັດຄ້ານ ຕໍ່ການພົບປະລະຫວ່າງ ປະທານາທິບໍດີ ບາຣັກ ໂອບາມາ ແລະອົງດາໄລ ລາມະ

  • ໄພສານ

ສະຫະຣັດ - ອົງດາໄລລາມະ: ຈີນຮຽກຮ້ອງ ໃຫ້ ສະຫະຣັດ ຍົກເລີກໃນທັນທີ ກ່ຽວກັບ ແຜນ ການພົບປະກັນທີ່ທຳນຽບຂາວ ໃນສັບປະດາໜ້າ ລະຫວ່າງ ປະທານາທິບໍດີ ສະຫະຣັດ ທ່ານ BARACK OBAMA ແລະອົງດາໄລລາມະ ຜູ້ ນຳທາງດ້ານຈິດໃຈ ຂອງຊາວທິເບດ ທີ່ລີ້ພັຍຢູ່ ໃນຕ່າງປະເທດນັ້ນ. ອົງການຂ່າວຊິນຫວາຂອງ ທາງການຈີນໃນວັນສຸກມື້ນີ້ ໄດ້ອ້າງຄຳເວົ້າຂອງ ທ່ານ MA ZHAOXU ໂຄສົກກະຊວງການຕ່າງ ປະເທດຈີນທີ່ກ່າວວ່າ ຈີນຄັດຄ້ານ ຢ່າງແຂງຂັນ ຕໍ່ການຢ້ຽມຢາມຂອງອົງດາໄລ ລາມະ ດັ່ງກ່າວ. ທ່ານ MA ຮ້ອງຂໍໃຫ້ ສະຫະຣັດ ເຂົ້າໃຈຢ່າງເຖິງຖອງ ກ່ຽວກັບ ຄວາມຫລໍ່ແຫຼມ ຂອງບັນ ຫາຕ່າງໆ ທີ່ພົວພັນກັບ ເຣື່ອງທິເບດ. ທຳນຽບຂາວ ໄດ້ປະກາດ ໃນວັນພະຫັດ ວານນີ້ວ່າ ວັນເວລາ ໃນການພົບປະກັນ ລະຫວ່າງທ່ານ OBAMA ແລະອົງດາໄລລາມະ ໄດ້ກຳນົດ ໃສ່ ວັນທີ 18 ກຸມພາ ຈະມານີ້. ຈີນໄດ້ສະແດງ ການຄັດຄ້ານ ຕໍ່ການພົບປະ ສົນທະນາ ໃດໆກໍຕາມ ລະຫວ່າງຜູ້ນຳ ຂອງສະຫະຣັດ ແລະອົງດາໄລລາມະ ທີ່ຈີນເອີ້ນວ່າ ຜູ້ຢາກ ແບ່ງແຍກດິນແດນ ທີ່ກຳລັງຊອກຫາຊ່ອງທາງ ໃຫ້ທິເບດເປັນເອກກະຣາດຈາກຈີນນັ້ນ.

ຄລິນຕັນ: ອະດີດ ປະທານາທິບໍດີ ສະຫະຣັດ ທ່ານ BILL CLINTON ໄດ້ເຂົ້າຮັບການ ພະ ຍາບານໂຕ ເພື່ອເປີດເສັ້ນເລືອດ ທີ່ອຸດຕັນ ຢູ່ ໃນໝາກຫົວໃຈຂອງທ່ານນັ້ນ. ພວກນາຍແພດ ໄດ້ສອດເຄື່ອງ ເຮັດໃຫ້ເສັ້ນເລືອດເປີດ 2 ອັນ ເຂົ້າໄປໃນເສັ້ນເລືອດ ຫລໍ່ລ້ຽງຫົວໃຈຂອງທ່ານ CLINTON ໃນວັນພະຫັດ ວານນີ້ ທີ່ໂຮງໝໍ ແຫ່ງນຶ່ງ ໃນນະຄອນນິວຢອກ ຫລັງຈາກທ່ານ ມີຄວາມຮູ້ສຶກ ແໜ້ນໜ້າເອິກຂອງທ່ານ ໃນໄລ ຍະ ສອງ-ສາມມື້ ຜ່ານມານີ້. ທ່ານ ALAN SCHWARTZ ທ່ານໝໍຂອງທ່ານ CLINTON ກ່າວວ່າ ທ່ານ CLINTON ບໍ່ໄດ້ເປັນຫົວ ໃຈວາຍ ຫລືຫົວໃຈຂອງທ່ານ ບໍ່ໄດ້ຮັບ ຄວາມເສັຽຫາຍ ໃດໆເລີຍ. ທ່ານ SCHWARTZ ເວົ້າວ່າ ຂັ້ນຕອນດັ່ງກ່າວ ໄດ້ດຳເນີນໄປ ດ້ວຍຄວາມສະດວກ ແລະທຳນາຍວ່າ ທ່ານ CLINTON ຈະຫາຍດີ ເປັນປົກກະຕິ. ທ່ານ SCHWARTZ ກ່າວວ່າ ທ່ານຫວັງວ່າ ທ່ານ CLINTON ຈະໄດ້ອອກໂຮງໝໍ ໃນວັນສຸກມື້ນີ້ ແລະກັບຄືນໄປເຮັດວຽກ ໃນວັນຈັນຈະມາ. ທ່ານ CLINTON ເຄີຍທຳການ ຜ່າຕັດມາແລ້ວ ໃນປີ 2004 ເພື່ອເປີດເສັ້ນເລືອດ ທີ່ອຸດຕັນ ໃນໝາກຫົວໃຈ 4 ເສັ້ນ.

ເຮຕີ: ໃນວັນສຸກມື້ນີ້ ຊາວເຮຕີໄດ້ພາກັນໄວ້ອາ ລັຍ ເນື່ອງໃນໂອກາດວັນຄົບຮອບນຶ່ງເດືອນຂອງ ການເກີດ ແຜ່ນດິນໄຫວຮ້າຍແຮງທີ່ໄດ້ທຳ ລາຍ ສ່ວນໃຫຍ່ຂອງ ນະຄອນຫຼວງ PORT-AU-PRINCE ແລະບໍຣິເວນ ອ້ອມແອ້ມ ແລະເຮັດ ໃຫ້ຫຼາຍກວ່າ 217 ພັນຄົນເສັຽຊີວິດ. ນອກນັ້ນ ຍັງມີປະຊາຊົນ ທີ່ບໍ່ມີບ່ອນ ພັກພາອາສັຍ ຢ່າງ ນ້ອຍ 1 ລ້ານຄົນ ຫຼັງຈາກໄດ້ເກີດແຜ່ນດິນໄຫວ ທີ່ມີຄວາມແຮງ ແທກໄດ້ 7.0 ຢູ່ທີ່ປະເທດເຮຕີ ໃນວັນທີ 12 ມັງກອນ ຜ່ານມາ. ການປະຕິບັດ ງານບັນເທົາທຸກ ຂອງອົງການ ໃຫ້ຄວາມຊ່ອຍ ເຫຼືອນາໆຊາດ ກຳລັງມີຄວາມກ້າວໜ້າ ໃນເຮຕີ ຊຶ່ງພວມດີ້ນຮົນ ທີ່ຈະຟື້ນໂຕຄືນ ຈາກລົມພາຍຸ ເຂດຮ້ອນ ທີ່ໄດ້ທຳລາຍ 15% ຂອງຜົນຜລິດ ທາງດ້ານເສຖກິດຂອງປະເທດໃນປີ 2008 ນັ້ນ. ໃນຕອນເຊົ້າ ຂອງມື້ວານນີ້ ໄດ້ເກີດຝົນຕົກໜັກ ຊຶ່ງພາໃຫ້ ມີຄວາມຢ້ານກົວວ່າ ຈະເກີດພັຍນຳຖ້ວມ ແລະການແຜ່ລະບາດ ຂອງພະຍາດ ໂຣຄາຕ່າງໆ ໃນໝູ່ປະຊາຊົນ ທີ່ບໍ່ມີບ່ອນ ພັກພາອາສັຍ.

ອີຣ່ານ: ສະຫະຣັດ ກ່າວວ່າ ການພະຍາຍາມ ຂອງອີຣ່ານ ທີ່ຈະປິດຂ່າວເກືອບຈາກທຸກສື່ມວນ ຊົນ ກ່ຽວກັບການປະທ້ວງ ໃນມື້ວານນີ້ສະແດງ ໃຫ້ເຫັນວ່າຣັຖບານອີຣ່ານ ຢ້ານປະຊາຊົນຂອງ ຕົນເອງ. ທ່ານ P.J. CROWLEY ໂຄສົກກະ ຊວງການຕ່າງປະເທດສະຫະຣັດ ໄດ້ອ້າງລາຍ ງານຂ່າວ ທີ່ເວົ້າວ່າ ໄດ້ມີການປິດໂທຣະພາບ ດາວທຽມ ໃນທ້ອງຖິ່ນ ໂທຣະສັບມືຖື ແລະບໍຣິ ການອິນເຕີແນັດ. ການປະທ້ວງ ຕໍ່ຕ້ານຣັຖບານ ໃນອີຣ່ານ ບັງເອີນມີຂຶ້ນ ພ້ອມໆກັບ ການໂຮມຊຸມ ນຸມ ເນື່ອງໃນໂອກາດ ວັນຄົບຮອບ 31 ປີ ໃນການສ້າງຕັ້ງ ສາທາຣະນະຣັດ ອິສລາມ ຂຶ້ນໃນອີຣ່ານ. ທ່ານ CROWLEY ເວົ້າວ່າ ອັນທີ່ເອີ້ນວ່າ ການສະກັດກັ້ນ ຂໍ້ມູນຂ່າວສານ ທີ່ວ່ານີ້ ແມ່ນແນໃສ່ ເພື່ອປ້ອງກັນ ບໍ່ໃຫ້ພວກ ເດີນຂະບວນປະທ້ວງ ສາມາດຕິດຕໍ່ ຫາກັນແລະກັນໄດ້. ພວກນັກເຄື່ອນໄຫວຝ່າຍຄ້ານ ກ່າວວ່າ ກຳລັງຮັກສາ ຄວາມສະງົບ ຂອງອີຣ່ານ ຍັງໄດ້ປາບປາມ ພວກປະທ້ວງ ດ້ວຍການໃຊ້ ຣະເບີດນຳຕາ ໄມ້ຄ້ອນ ແລະຈັບກຸມ ພວກເຂົາເຈົ້າ. ລາຍງານຂ່າວເຫລົ່ານີ້ ຍັງບໍ່ສາມາດ ໄດ້ຮັບການຢືນຢັນ ຈາກແຫລ່ງຂ່າວ ທີ່ເປັນອິສຣະເທື່ອ ຍ້ອນທາງການ ອີຣ່ານ ໄດ້ຫ້າມບໍ່ໃຫ້ ອົງການຂ່າວຕ່າງປະເທດ ເຂົ້າໄປເກັບກຳຂ່າວ.

ເກົາຫລີເໜືອ - ນິວເຄລັຽ: ລາຍງານຂ່າວ ຂອງເກົາຫລີໃຕ້ແຈ້ງວ່າ ເປັນທີ່ຄາດກັນວ່າຫົວ ໜ້າຄະນະ ເຈຣະຈາໃນດ້ານນິວເຄລັຽຂອງເກົາ ຫລີເໜືອ ຈະເດີນທາງ ມາຢ້ຽມຢາມສະຫະຣັດ ໃນເດືອນໜ້ານີ້ ທ່າມກາງ ການດຳເນີນຄວາມ ພະຍາຍາມຄັ້ງໃໝ່ເພື່ອຢາກໃຫ້ມີ ການເປີດເຈ ຣະຈາ 6 ຝ່າຍຄືນອີກ ກ່ຽວກັບ ໂຄງການນິວ ເຄລັຽ ຂອງເກົາຫລີເໜືອ. ໃນວັນສຸກມື້ນີ້ ອົງ ການຂ່າວຢອນຮັບ ຂອງເກົາຫລີໃຕ້ ໄດ້ອ້າງ ແຫລ່ງຂ່າວ ທາງດ້ານການທູດ ທີ່ເວົ້າວ່າ ທ່ານ KIM KYE GWAN ມີກຳນົດ ທີ່ຈະເດີນທາງ ມາຢ້ຽມຢາມ ສະຫະຣັດ. ການຢ້ຽມຢາມ ທີ່ວ່ານີ້ ແມ່ນຈະມີຂຶ້ນ ຫລັງຈາກການເດີນ ທາງໄປຢ້ຽມຢາມ ນະຄອນຫລວງພຽງຢາງ ໃນເດືອນທັນວາຜ່ານມາ ຂອງທູດພິເສດ ສະຫະຣັດ ທ່ານ STEPHEN BOSWORTH. ໃນວັນພະຫັດວານນີ້ ທູດພິເສດ ຂອງອົງການ ສະຫະປະຊາຊາດ ກໍໄດ້ພົບ ປະກັບທ່ານ KIM YONG NAM ຮອງຜູ້ນຳຂອງເກົາຫລີເໜືອ ທີ່ນະຄອນ ຫລວງພຽງຢາງ ຊຶ່ງເປັນ ພາກສ່ວນນຶ່ງ ໃນການດຳເນີນ ຄວາມພະຍາຍາມ ຂອງນາໆຊາດ ທີ່ຈະນຳເອົາ ເກົາຫລີ ເໜືອ ໃຫ້ກັບຄືນ ເຂົ້າມາສູ່ ໂຕະເຈຣະຈາ ກ່ຽວກັບການຫລຸດ ກຳລັງອາວຸດນັ້ນ.

ອີຣັກ: ການໂຄສະນາຫາສຽງ ຢ່າງເປັນທາງ ການ ໄດ້ເລີ້ມຂຶ້ນແລ້ວ ສຳລັບ ການເລືອກຕັ້ງ ທົ່ວໄປໃນອີຣັກ ຊຶ່ງຈະມີຂຶ້ນໃນວັນທີ 7 ມີນາ ຈະມານີ້. ການຕິດຮູບ ໂຄສະນາຫາສຽງຢ່າງ ເປັນທາງການ ໄດ້ມີຂຶ້ນໃນ ທົ່ວນະຄອນຫຼວງ ແບັກແດັດ ໃນວັນສຸກມື້ນີ້. ແຕ່ຄວາມເຄັ່ງຕຶງ ໃນອີຣັກ ແມ່ນມີສູງຢູ່ແລ້ວ ກ່ຽວກັບການຕັດ ສິນໃຈ ຫ້າມບໍ່ໃຫ້ ຜູ້ສະມັກທີ່ນັບຖືສາສນາ ອິສລາມ ນິກາຍຊຸນນີ່ ຈຳນວນນຶ່ງ ເຂົ້າແຂ່ງຂັນ ເອົາຕຳແໜ່ງຕ່າງໆ ຍ້ອນມີການ ກ່າວຫາວ່າ ພວກກ່ຽວ ມີຄວາມສັມພັນ ກັບພັກ BAATH ຂອງມື້ລາງ ຜູ້ນຳອີຣັກ SADDAM HUS SEIN. ໃນມື້ວານນີ້ ຄະນະຕຸລາການ ນຶ່ງຂອງອີຣັກ ໄດ້ປະຕິເສດ ຕໍ່ການຂໍອຸທອນຂອງ ບັນດາ ຜູ້ສະມັກສ່ວນໃຫຍ່ ທີ່ຖືກທາງການອີຣັກ ຫ້າມນັ້ນ. ມີແຕ່ 28 ຄົນ ຂອງຈຳ ນວນ 177 ຄົນ ທີ່ໄດ້ຂໍອຸທອນເທົ່ານັ້ນ ໄດ້ຮັບອະນຸຍາດ ໃຫ້ເຂົ້າແຂ່ງຂັນ ໃນການ ເລືອກຕັ້ງ ໃນວັນທີ 7 ມີນາໄດ້. ຣັຖບານ ພາຍໃຕ້ການນຳພາ ຂອງພວກທີ່ນັບຖື ສາສນາອິສລາມ ນິກາຍຊີໄອທ໌ ຂອງອີຣັກ ໄດ້ພະຍາຍາມ ທີ່ຈະກຳຈັດ ອະດີດສະມາຊິກ ຂອງພັກ BAATH ອອກຈາກຕຳແໜ່ງສູງໆ.

ສຣີລັງກາ: ສານສູງສຸດຂອງສຣີລັງກາ ໄດ້ຕັດ ສິນ ອະນຸຍາດໃຫ້ ພວກສນັບສນຸນທ່ານ SA RATH FONSEKA ຜູ້ສະມັກປະທານາທິບໍດີ ທີ່ເສັຽໄຊ ໃນການເລືອກຕັ້ງ ທຳການຂໍອຸທອນ ກ່ຽວກັບ ການຈັບກຸມທ່ານນັ້ນ. ໃນວັນສຸກມື້ນີ້ ສານສູງສຸດ ຂອງສຣີລັງກາ ໄດ້ແຜ້ວທາງໃຫ້ ມີການ ເປີດຮັບຟັງ ຄຳໃຫ້ການ ກ່ຽວກັບ ບັນ ຫາດັ່ງກ່າວ ໃນວັນທີ 23 ກຸມພາ ຈະມານີ້. ນອກນັ້ນ ສານສູງສຸດ ຍັງໄດ້ສັ່ງໃຫ້ ຣັຖບານ ອະນຸຍາດໃຫ້ ທ່ານ FONSEKA ໄດ້ຮັບການ ປິ່ນປົວ ພະຍາຍານ ແລະໃຫ້ສະມາຊິກ ໃນ ຄອບຄົວຂອງທ່ານ ໄປຢ້ຽມຢາມໄດ້. ພັລຍາ ຂອງອະດີດ ຜູ້ບັນຊາການ ທະຫານສູງສຸດ ຂອງສຣີລັງກາ ໄດ້ຍື່ນສຳນວນຄຳຮ້ອງ ພ້ອມກັບລາຍເຊັນ ຕໍ່ສານ ຫລັງຈາກເຈົ້າໜ້າທີ່ ໄດ້ຈັບທ່ານ FONSEKA ໃນມື້ວັນຈັນຜ່ານມາ ໃນຂໍ້ຫາ ສົມຮູ້ຮ່ວມຄິດ ຕໍ່ຕ້ານຣັຖບານ. ຂະນະດຽວກັນ ຜູ້ນຳພັກ ການເມືອງຝ່າຍຄ້ານ ຂອງສຣີລັງກາ ທ່ານ RANIL WICKRE MESINGHE ໄດ້ພົບປະ ກັບປະທານາທິບໍດີ ມາຮິນດາ ຣາຊພັກ ໃນວັນສຸກ ມື້ນີ້ ໃນ ຄວາມພະຍາຍາມ ເພື່ອຊອກຫາຊ່ອງທາງ ໃຫ້ປ່ອຍທ່່ານ FONSEKA. ການຈັບກຸມ ທ່ານ FONSEKA ໄດ້ພາໃຫ້ເກີດ ມີການປະທະກັນ ຢ່າງຮຸນແຮງ ທີ່ນະຄອນຫລວງ ໂຄລອມໂບ ໃນອາທິດນີ້.

ເຊີນຟັງຂ່າວລາຍລະອຽດ ໂດຍຄລິກບ່ອນສຽງ.

XS
SM
MD
LG